Read Masana LAW MA NIR-NIRAMNA 4 Bible Online

LAW MA NIR-NIRAMNA 4 - Masana bible

LAW MA NIR-NIRAMNA 4

¹Gurona vanu, humgi hatta vi bugiya, lakgi ŋal kiliŋ kay hum caw yalda;

²Kay nan vulgi gatta ta ŋaata, noygi hatta van goyɗi.

³Nan ay mi goora vi bunu, goor ma lumaɗna, goor ma valam kepna kaw kuɗ sunu.

⁴Bunu ay vulan hatta, nam ka di tanu: Naŋ ma ŋom yoboyna vanu hay dikaŋu, humaŋ kuɗ gatta vanu, nala naŋ ma mus iriya.

⁵Gara'n yalda, garaŋ yamda-wida, yaŋ ma jok yoboy ma hay vunannaɗi, naŋ ma cal goyɗi kaw.

⁶Naŋ ma noy yalda goyɗi, nala na' ma ŋomaŋu, naŋ ma mina'a, nala na' ma koɗ ŋarak kaŋu.

⁷Kayni mi tun cawta vi yalla: Garaŋ yalda, hiɗi slena vaŋ kaf ma ka hay ɓaŋu naŋ ma gar yamda-wida.

⁸Naŋ ma tiya' se'a, nala na' ma slaŋ yaŋ kulo'o, nala na' ma vulaŋ gajijita, la naŋ firi hiɗi na'a.

⁹Na' ma tun bogorayna vi slugota kaŋu, na' ma ganaŋ hiɗi jakawata ta jifiyta.

¹⁰Humaŋu goora vanu, vaŋ yoboyna vanu, nala buura vi irita vaŋu ma li ŋolo.

¹¹Nan ɗekaŋ hagata vi yalla, nan naraŋ hay hagata vi ɗigerta.

¹²La naŋ ka tuɗa, seŋ as cal goy noŋɗi, la naŋ ka jaŋa, seŋ as sli zlaraŋgaɗay noŋɗi.

¹³Ŋomaŋ hatta, naŋ ma ga' goyɗi, naŋ ma ŋoma'a, kay na'a ti irita vaŋu.

¹⁴Naŋ ma tuɗ hay hagata gurayta vi sum sa joonɗi, poy hay hagata vi sa sulukŋɗi kaw.

¹⁵Tel tuwaŋu, jik haya'ɗi, calaŋ goyo, jikaŋ goy hay liy mara'a.

¹⁶Kay la nisi bay li joo, nisi as kal senɗi, la nisi bay gi sa gaa'a, senda as visiɗi.

¹⁷Kay nisi tum mi tina vi joota, kay nisi cum mi vinna vi waskayta.

¹⁸Hagata vi sum sa ɗigera ki haraŋa ma wile'e nala, ma haraŋa valamu jor voko ta-ta hay falay calak' nala.

¹⁹Hagata vi sum sa joona ki jufunda nala; va ma min puksi gaana nisi may wumɗi.

²⁰Goora vanu, jak humaŋ tam yoboyna vanu, tun humaŋ tam ɓakŋa vanu.

²¹Hinim tuɗ goy gine hiɗi naŋɗi, ŋomom hay dikaŋ kalafi;

²²Kay kayni mi irita kay nisi sa fumu, mi yerta-goyta kay tuwsi kafe.

²³Ŋom dikaŋu suw sle hegen kafe, kay irita may goy hay nam pa.

²⁴Yaw sinda goy hay vunaŋu, yaw ɗutta goy hay vunaŋu, hina' goy gine hiɗi naŋu.

²⁵Hin iraŋ ɗuw vokaŋ ɗiger, hin goŋ cuk vokaŋ ɗiger.

²⁶Kotaŋ hagata ta naŋ jik haya'ta, hin hagata vaŋ koti ŋaa'a.

²⁷ɦod iraŋ goy gal jufɗi, gal gulɗi kaw, tel tuwaŋ kay joota.