Read Masana LAW MA NIR-NIRAMNA 5 Bible Online

LAW MA NIR-NIRAMNA 5 - Masana bible

LAW MA NIR-NIRAMNA 5

¹Goora vanu, jak humaŋ tam yalda vanu, jakaŋ humaŋ tam wida vanu,

²kay naŋ ma li ŋomiya hiɗi jiɓera, kay vunaŋu ma ŋom wida.

³Kay vun cata pulta jibet ki yumda nala, kay yoboyna va'a sleɗe suw mula.

⁴May hay dabta yoboyna va' galak ɗiwek ki goyo-goyna nala, siy hiliw-hiliw ki kew-gaferaŋa ma siyam ma'na nala.

⁵Gaya'a jik gaa hay liyna vi mitta, se' co ta-ta hay liyna vi sa mitina.

⁶Na' may var kay hagata vi iritɗi, na' viy goyo hay hagata va'a, na' wi liyn ma na' jik hayamnaɗi.

⁷Wulin kayni, gurona vanu, humgi delanu, calgi goy gine hiɗi ɓakŋa vanɗi.

⁸Calgi goy hay hagata ta tuɗ hay ziyna va'ta, Nigi ma tuɗ tam vun-galana vi ziyna va' goboyɗi.

⁹Kay a nigi ma vul donota vigi goy mi sum saraɗi, kay a nisi ma vul busata vigi goyo mi sum sa ci matnaɗi.

¹⁰Kay la naɗi, sum sa pulla ma hob haysi hiɗi farayna vaŋu, kay a sle ma naŋ fum kuɗ lopna vi ɓaŋu ma hob hay ziyna vi sa maraɗi.

¹¹Kay a naŋ ma tiya hay vun dabta vaŋɗi, hay li ma sliwaŋu hiɗi tuwaŋu ka loɗ goyo.

¹²kay a naŋ ma di ala: Nan noy gatta goyo kay mige? Dikan ɗuw gatta birek-ceke kay mige? A naŋ ma di naɗi.

¹³Nanige nan min hum vun sum sa hatannaɗi, nan min jak human tam sa ma ɗekannaɗi kay mige? A naŋ ma di naɗi.

¹⁴hini neeɗa ɦawa a nan jugo joot kafe jar tokŋa hiɗi vokŋa vi sumuna.

¹⁵Caŋ niyna vi goloŋga vaŋu, niyn ma kali goy hay kaata vaŋ pa:

¹⁶Kaata vaŋu naŋ ma hina' niya' yam goy hay liyn mara su? Niy-ɓatna vaŋu, naŋ ma hinim jaŋ goy hay liy ma sumun lak hay kafna su?

¹⁷Hinim li vaŋ naŋ kepe, may sa ma pulla ma li hiɗi naŋɗi.

¹⁸Hin kaata vaŋu fi bolda, firiyaŋu hiɗi cata vaŋu ta hay joriyo tuwaŋga,

¹⁹Na'a ti dukga ta minda, buɗugoota ta hobay hiɗi slugota, naŋ ma li hobay hiɗi darta va'a hay buurta kaf, minda vaŋ ta ka'ta ma li hobay dok-doko.

²⁰Goora vanu, dikaŋ as taŋ kay cata pulta kay mige? Naŋ as vi pona vi cata ta naŋ may wa'ɗita hay ɓaŋu kay mige?

²¹Kay hagata vi sana ka vok ir Ma-Vatɗina, Ma-Vatɗina wi hagata valam ta gurayta kafe.

²²Sa ma joona sulukŋa valam vumti mi nam kay tuwamu, sulukŋa valamu slewem tep-tep'.

²³Nam ma mita kay sa ma ɗekem mayɗi, nam ma geɗa kuɗ ɦoyta valam ta ɓa' kalita.