Read Masana LAW MA NIR-NIRAMNA 6 Bible Online

LAW MA NIR-NIRAMNA 6 - Masana bible

LAW MA NIR-NIRAMNA 6

¹Goora vanu, la naŋ col tuwaŋ hay baŋal sugoloŋu, la naŋ col tuwaŋ hay baŋal sa mara'a,

²la naŋ juni kay yoboyna vi vunaŋu, la yoboyna vi vunaŋ vaŋawa,

³Goora vanu, kayni ma va ma naŋ ma lumu: naŋ ma tuɗ talamu kay naŋ pukawa gaa'a kuɗ gaŋeraŋa valamu, nala naŋ ma tuɗ talamu, girifaŋ gaa'a, giɗelem delemu.

⁴Hin iraŋ duk gaa senɗi, hin goŋ-iran duk gaa mirikɗi.

⁵Piraŋ goyo, ki dukga pir goy hay ɓam sa ma li gawna nala. Ki layta hay ɓam sa ma vi layna nala.

⁶Naŋ sa ma zulomda, tuɗaŋ tam telella, saraŋ poyta valamu, muɗaŋ yali.

⁷Telella sa ma ŋolla valam mayɗi, Sa ma ŋomda valam mayɗi, sa ma gatta mayɗi kaw.

⁸Nam kot tina valamu hay menda, hay liyna vi feɗna nam tok sle ma tina.

⁹Naŋ sa ma zulomda, naŋ ma bur gaa na waŋ' ta-ta lancitige? Naŋ ma zliy kulo'o hay senda lancitige?

¹⁰Naŋ min kal sen neeɗa, naŋ min tun sukaŋ neeɗa, naŋ min slew ɓaŋ war-digaŋ neeɗa, kal sene.

¹¹Nala hawta ma bowoŋu ki sa ma cigeɗna nala, kiɗata ma co kaŋu ki sa ma duura nala.

¹²Sa ma bay-yalla mi sa ma bay-ɗigera, nam tuɗ hiɗi sinda hay vunamu.

¹³Nam ci iram mirik-mirik', law hiɗi gayamu, ɗek slen hiɗi cita-ɓalamu;

¹⁴joota ka hay dikamu, nam var sle ma joona hay buur kaf, nam mar cirepta.

¹⁵ki kayn nala ɓulakka valamu ma co koloyo, nam ma kirap goy gosoyo bay fi gu ma muɗum goy ŋaa'a.

¹⁶Slen ma Ma-Vatɗina ka gaw hiɗi namu ka karkiya, ma kir Ma-Vatɗin bisna ka siɗiya noŋo:

¹⁷Ira ma subur tuwamna, vun ma ɗutna, ɓamna ma ɦok busuw sum sa bay li joon goyna,

¹⁸dikga ta var vaara ma bay-ɗigera, gayna ma jaŋ kuɗ joota,

¹⁹sa li di-goyta ta hobay hiɗi sinda, hiɗi sa mar cirepta jar ɓosiyom-tuwsina.

²⁰goora vanu, ŋomaŋ gatta vi buŋu, noy hatta vi suŋu goyɗi.

²¹Naŋ ma ŋoma' hay dikaŋ dono'o, naŋ ma juna' kulo keleŋu.

²²Na' ma ɗigeraŋu hay poyta vaŋu, na' ma ŋomaŋ hay liyn ma buura vaŋu, na' ma law hiɗi naŋu hay liyn ma naŋ zliy kulo'o.

²³Kay gatta na'a mi fitilla, hatta na'a mi haraŋa, ɗek-kirta vi gatta ŋom san hay hagata vi irita:

²⁴nam ma ŋomaŋ kay cata liwista, kay dita ma lumaɗna vi cata pulta.

²⁵Dikaŋ ma dar ca na'ta kuɗ jifiyta va'ɗi, hin tuwaŋ ɗut kay wal-ira'ɗi.

²⁶Kay kuɗ cata gawlaŋga, san ba dir funa valamu, may cata ta kuɗ jufa'ta gan jawta vok irita ŋaata vi sana.

²⁷San as vi kut hay war-digamu bay sligara valam do kuwa su?

²⁸San as tuɗ kulo kay veŋ ma kuta bay selem loɗ goy su?

²⁹Sa ma tuɗ gar cata vi sugolomna nam ki kayn nala kaw, sa ma jo cata vi sugolomna nam hin bay fi kitatɗi.

³⁰La sa kul va'a kay nam min tumu, hay li ma mayt ka cumu, san kayni joo dok-doko.

³¹La vumawa hay kulda, nam ma wurak va namna goy sem siɗiya, nam ma vul sle ma ka vo hay ziyna valamu kaf.

³²May sa ma li zlata bulo'o hiɗi ca'a nam bay yali, sa ma min ba tuwam goyo nam ki kayn nala kaw.

³³Nam ma fum mi milla hiɗi zulota tuta, zulota valamu ma ɦas goy noŋɗi.

³⁴Kay hunayta muɗ san ɦiy ŋolo, kir-hawta valamu mayɗi hay li ma nam min job yalamu;

³⁵nam may min wurakŋaɗi, la naŋ vulum slen ŋol dak-dak kaw, nam may vumɗi.