Read Masana LAW MA NIR-NIRAMNA 7 Bible Online

LAW MA NIR-NIRAMNA 7 - Masana bible

LAW MA NIR-NIRAMNA 7

¹Goora vanu, vaŋ yoboyna vanu, ŋomaŋ gatta van hay ɓaŋ kafe.

²Laŋ kuɗ dita vanu, nala naŋ ma mus iriya; ŋomaŋ hatta vanu ki wal-iraŋ nala.

³Naŋ ma juna' hay cita-ɓaŋu, naŋ ma ɗo' gaa hay tablena vi dikaŋu.

⁴Daŋ tam yalda ala: Naku ti ɓasunta! Wida-yalla naŋ ma ya' ala banaŋga!

⁵Kay nisi ma ŋomaŋ kay cata pulta, cata pulta ta di yoboy ma lumaɗna.

⁶Nan ay coli hay ir-ziyda van zaw, nan ka sar jar kawayna vi ir-ziyda.

⁷Nan wi goor ma joriyo kep jar sa to'ofayna, jar guro joriyona nan wi goor mara kep nam ɦay-ɦaya.

⁸Nam jik hay hagata, goboy hiɗi gef-hagata ta cata ta pulta kep ka coli hay zaw, nam tuɗ ŋali ŋali kat ziyna va'a.

⁹Kayni hay li ma liyn tun caw zima hay vulatita, jar henjeta hiɗi jufunda.

¹⁰Wum pa kayni, cat kep co talamu, na' li tuwa' ki cata-gawlaŋga nala, hiɗi ɗutta hay dika'a.

¹¹Cat kayni pat winek ŋolo, tuwa' wira'ɗi; se' may joy gaa vo hay ziyna va' noŋɗi;

¹²wum pa kayn na' goy hay hagan zaw', wum pa kayn na' hay liy ma lakŋa vi sumun zaw, wum pa kayn na' hay gef-hagan zaw, na' ka gar sumuna.

¹³Na' bow goor ma joriyona firiyimu, ka dum hiɗi del ma ɗutna ala:

¹⁴Nan min li ɗifini vi lop ma slugona, vaydi nan yi va kanu.

¹⁵Kuɗ na'ta kayni nan kali goy kiraŋu. kay garaŋu, may nan faŋawa.

¹⁶Va ma buura vanu nan bar borgonawa gaa kalamu, nan kotomawa hiɗi tapina ma Egiptena;

¹⁷Liyn ma buura vanu nan kotom tuwamawa hiɗi urdina miir, urdina alowes* hiɗi urdina sinamom*.

¹⁸Naŋaya, ɦoyay tuway hiɗi darta ta-ta goy grawta, hobay hayay hiɗi darta.

¹⁹Kay jufan may voɗi, nam kali hay rogoyta ta gineta;

²⁰birimta valam ta gurjuna nam sla' kalamu, nam hotay vo ɗawn hay til ma vokŋa.

²¹Na' nemenu hiɗi kaslana va'a, na' tanam kuɗa'a hiɗi yoboy ma ɗutna vi vuna'a.

²²Nam tun caw tuɗ kuɗa' de' ki putna ma naram hay liy ma ŋatna nala, ki sa ma ɦoyayna ma sumun junumu kay watamu nala.

²³Ta-ta nam co tam liyn ma ɓarawt duɓum gilesemu, ki layta zum kulo hay dena nala, bay wi ala irita va' ma ba'a.

²⁴Wulin kayni, gurona vanu, humangiya, tun ŋalda vigi tam goboyna vi vunanu.

²⁵Hin dikgi muɗ kuɗ boyn sa ki kayn nalaɗi, viy tuwgi goyo hay haga ma gurayna visiɗi.

²⁶Kay boy sa ki kayn nala vat sumunawa goy ŋolo, sum sa boyn ki kayn nala cisi goy mati nisi ka ŋolo.

²⁷Ziyna vi boy sa ki kayn naana mi hagata ma nar san hay liyna vi mitta.