Read Masana LAW MA NIR-NIRAMNA 8 Bible Online

LAW MA NIR-NIRAMNA 8 - Masana bible

LAW MA NIR-NIRAMNA 8

¹Yalda may siwelɗi su? Yamda-wida may siwel dela' kuloɗi su?

²Na' ka coli kulo kay liyn ma ɗiŋiriŋŋa goboy hiɗi hagana, na' ka coli jar haga ma gra-grana;

³na' ka coli tam vun-ziyna, tam vun-galana vi hoyok-ziy ŋulona, kalaf dig vun-ziyna na' ka di dela' kulo'o:

⁴Sumuna, nan siwel kayn katgi nigiya, delan ka di kayni kat gurona vi sum-wurana.

⁵Nigi sa bay yalla, hatgi kay poŋ ir slena; nigi sa ɦay-ɦayna, hatgi wida-yalla.

⁶Humgiya, kay nan ka hiɗi sle ma ŋulo'o kay di'e: vunan ka mal goyo kay hat sle ma ɗigera.

⁷Kay vunan di gasita, sinanu ka gaw hiɗi sinda;

⁸yoboy ma hay vunanu kaf mi gasita, sinda may jaramɗi kaw, va ma calay goyo may jaramɗi kaw.

⁹Dita van kaf haraŋi kay sa ka hiɗi yamda-wida, na' ɗigere kaw kay sa ma fi wida.

¹⁰Mingi hatta vanu suw gurjuta, mingi wida suw or ma ŋaana;

¹¹kay wida na' ŋaa'a suw kermena, na' tek ŋolo suw sle ma gusta valam lop ŋolo.

¹²Nanu, yalda, ziyn ma musta vanu yum ala poŋ ir slena, nan ka hiɗi wida vi varta.

¹³Narta kuɗ Ma-Vatɗina kayni mi ka-gawta hiɗi joota, ɦawlata hiɗi subur-tuwta, hagata vi joota, vun ma di ma di joota, lakŋi mi sle ma nan ka gaw hiɗi namu.

¹⁴Vul gatta, ɗek yalla kayni mi lopna vanu; nanu mi yam ta wida, donota ka hay ɓanu.

¹⁵Muliyan ti mulda kayn hiɗi nanu, gurona vi muliyan di law ma hay liyamna kayn hiɗi nanu.

¹⁶Sum sa ŋulona ŋom nagat kayn hiɗi nanu, sum sa donona hiɗi sum sa ka kitat gaa kay nagat kafe.

¹⁷Nan min nisi sa minanu, nisi sa garanu as fanu.

¹⁸Farayna hiɗi gajijita ka hay ɓan nanu, faray ma mus ta-tana hiɗi ɗigerta kaw.

¹⁹Vuɗna vanu nam ŋaa'a suw ora, suw or ma bay-rigasna, vuɗna vanu ŋaa'a suw gurjuta.

²⁰Nan poy hay hagata vi ɗigerta, jar haga gurayna ma bay gunna,

²¹kay vul farayna mi nisi sa minanu, kay hob timgilla visiya.

²²Ma-Vatɗina tunan jew lop ma nam lumna kafe, tunan jew lopna valam ma ɓa-ɓana.

²³Nan ay tuni (mulu) hay liy ma jew ɓa-ɓana pa, hay cawa'ta-tunita, jew tun cawta vi nagata.

²⁴Nam vuɗan kayni hay li ma zul ma wiŋŋa ay tuwaɗi, hay li ma niy ma jaŋ goyna mayɗi;

²⁵jew a hiɗiyna ɓal ɗeŋe, jew a liy ma ɗiŋiriŋŋa li'e, nan ay vuɗi ɓa-ɓa;

²⁶hay li ma nam bay kot nagat tuwa, bay kot sinen tuwa, bay kot butuw ma dir nagat tun caw hiɗi namna tuwa.

²⁷Hay li ma nam kot dukalawna, nan aya; hay li ma nam ɓir diŋ-diŋŋa kulo kay zul-ma-wiŋŋa,

²⁸hay li ma nam lak ɗugulla kulo dukalawna, hay li ma niy-ma-riŋŋa vi zul ma wiŋŋa ka riŋ goy hiɗi dono'o,

²⁹hay li ma nam ɓir jaara vi niy-lum ma ŋolla, kay niyna kulfut kulo deŋelɗi, hay li ma nam tun sem nagat gaa'a,

³⁰nan ay hay lopna hiɗi namu, nan ay firiyim dikamu hay buurta kafe, nan ay liw vok iramu dok-doko.

³¹Nan ay liwa kay yam nagata valamu, hayan ka sleɗa jar gurona vi sumuna.

³²Wulin kayni, gurona vanu, humangiya, sle'ta ka kay nisi sa sli hagata vanu!

³³Humgi hatta, kay nigi ma muɗ yali, nigi ma noy hatta goyɗi.

³⁴Sle'ta ka kay sa ma humanu, sa ma mus jiger hay vun-galana vanu hay buurta kaf, sa ma ŋom vun-galana vanu.

³⁵Kay sa ma fanawa nam fi iritawa, nam ma fi slugota vi Ma-Vatɗina.

³⁶May sa ma li suluk katanu ka ɓulak ciwta valamu; nisi kaf sa ka gaw hiɗi nanu min mitta.