Read Masana LAW MA NIR-NIRAMNA 9 Bible Online

LAW MA NIR-NIRAMNA 9 - Masana bible

LAW MA NIR-NIRAMNA 9

¹Yalda in ziyna va'awa, na' ceɗ dolla va' ma siɗiyanawa.

²Na' ŋat putnawa, na' kot vinnawa tun tablena va'awa kaw.

³Na' cuk boy sa sunda va'awa goyo, na' ka siwel hay liy ma ŋulona vi hoyok-ziyna ala:

⁴La sa ma bay-yal ka'a, nam jik ay tani, tam sa ma ɦay-ɦayna, na' ka di ala:

⁵Nigiyaya, tigi funa vanu, cigi vinna vanu ma nan kotomna kaw;

⁶hingi bay-yalla goyo, nala nigi ma lak iriya, tungi irgi hay hagata vi yamda-wida.

⁷Sa ma di sa ma burahta kiramu, mara' kalam ti panta ɦawa, sa ma ɗek sa ma joona nam fi ŋulda.

⁸Sa ma burahta naŋ dum kiramɗi, kay mige nam ɗawn ma kaŋ gawi. Sa ma yalla naŋ ma dum kiramu, nam ma minaŋu may.

⁹Vulaŋ va'a mi sa ma yalla, nam ɗawn ma muɗ yal suwa, hataŋ sa ma ɗigerta, nala nam ma jor wida valamu.

¹⁰Tun cawta vi yalla mi narta kuɗ Ma-Vatɗina; Wida-ŋolda vi sum sa peldetna kayni ti yamda-wida.

¹¹Buura vaŋu ma li dak-dak ɗawn kuɗan nanu, busata vaŋ hay nagata ma li ŋol dak-daki kaw.

¹²La naŋ yali, yalda ma gutaŋ naŋu, la naŋ mi sa ma burahta, naŋ vaŋ kep ma ziy zumalda.

¹³Cata ɦay-ɦayta pat winek ŋolo, na' bay-yali, wi va noŋɗi kaw.

¹⁴Na' mus goy hay vun-ziyna va'a, na' mus kay jaŋgalla, kulo hay liy ma ɗiŋiriŋŋa vi hoyok-ziyna.

¹⁵Kay siwel tam sum sa jik hay hagata sa cap voksi ɗigera ala:

¹⁶La sa ma bay-yal ka'a, nam kal ay kalaf tani, na' di tam nisi sa ɦay-ɦayna ala:

¹⁷Niy ma cum goy ŋayayna nam ŋaa'a ŋolo, fu ma tum goy kulla nam jifiy ŋolo.

¹⁸Sum sa fi yita va'a may wi ala ɗawni mi liyna vi mittaɗi, nisi may wi ala kayni mi lokŋa vi mittaɗi.