Read Masana SA MA KUSTA 1 Bible Online

SA MA KUSTA 1 - Masana bible

SA MA KUSTA 1

¹Kayni mi dita vi sa ma kusta, goora vi David, mulla vi Yerusalem.

²Slen kaf mi va waa'a, din mi sa ma kusta, slen kaf mi va waa'a.

³Ŋaata ma san fum kuɗ makka vi lop ma nam lum gaa kuɗ fatta kafna mi mige?

⁴Jaf mara kala, jaf mara vurna'aya, may nagat ka dok-dok hay liya'na waŋ'.

⁵Fatta day kulo'o, na' ɗig gaa'a; na' gar liyna ma na' dayay hay pana kay hot day mara lo.

⁶Simeɗna biw hay gal ma kayamna, hot biw hay gal ma gaana, gi duwli lo, hot gi duwli kayn hay liyam na kay'.

⁷Niy-lum ma gurayna kaf jaŋ kayn hay niy-lum ma ŋolla, may niy-lum ma ŋolla hob noŋɗi, dok-dok niy-lum ma gurayna ka jaŋ malam na kay'.

⁸Slen kaf ka mak tuwam kay li lopo, san as kay di kayn diy loɗi; ira fi mak kay ɗuwɗi, humda fi mak kay humɗi kaw.

⁹Va ma aya, mi va ma min co'o, va ma liyna mi va ma min li'e kaw, va ma ala kayni wuliya gaa kuɗ fatta mayɗi.

¹⁰La va mara ka'a ma nay di kalam ala van kayni wuliya ni, va namna ay liy hay busa ma kali ɓa-ɓan li'.

¹¹Humay may gay kay slena ma kali jew ɓa-ɓan loɗi, nala slen ma min co'o, nisi sa bugolomna humsi ma gisi kalam loɗi kaw.

¹²Nan sa ma kusta, nan ti mulda kay sa Israyella hay Yerusalem.

¹³Nan tun varta vanu hiɗi yali kay gar a fek slen kaf ma ka li gaa kay nagata, nam kaf kayni mi va ma lop ŋolo ma Lawna hot yam sum-wuran gaa kuɗumu.

¹⁴Nan ɗuw lopna kaf ma ka li gaa kuɗ fatta; ɗuwgiya, nam kaf kayni mi va ma waa'a, mi jaŋga kuɗ simeɗna kaw.

¹⁵Va ma hormosina as moɗ kuloɗi, va ma mayɗina as kal hay ŋaɓtaɗi kaw.

¹⁶Nan ka ɗi hay dikan ala: Nan wulawa hiɗi yalda, nisi kaf sa ti mulda jewanu hay Yerusalem nan suwsiyawa hiɗi yalda kaw, nan wi yalda hiɗi yamda-wida ŋolo kaw.

¹⁷Nan vul dikan goyo kay gar yalda, kay gar bay-yalda hiɗi ɦay-ɦayta kaw; nan wi goy haraŋ ala nam kaf kayni mi va waa'a, mi jaŋga kuɗ simeɗna kaw.

¹⁸Kay hiɗi wida vi slen ŋolo, yorta jor ŋolo, hiɗi yamda-wida ŋolo, lasta jor ŋolo may.