Read Masana SA MA KUSTA 10 Bible Online

SA MA KUSTA 10 - Masana bible

SA MA KUSTA 10

¹Rawna ma mitina ɓulak mula vi sa ma kot urdina, buwum kaw, nala kaw, ɦay-ɦayta ne' ɦawa kol kay yalda hiɗi gajijita.

²Sa ma yalla dikam gum iram hay gal ta jufta, sa ma ɦay-ɦayna dikam gum iram hay gal ta gulda may.

³Hay li ma sa ma ɦay-ɦayna ka tuɗ hay hagata, yalla valam kiɗay goyo, nam di kay gigekaw ala sa ma ɦay-ɦayn kilani.

⁴La sa ma ka ti mul kaŋu varta valam fokawa kulo kaŋu na, naŋ ma pir deɗi, kay musta hay ŋal kiliŋga bar sulukŋa ŋolo ŋolo.

⁵Nan wi joo tara kep gaa kay nagata, kayni ti joota ta may goy kuɗ nam ma ti mulda.

⁶Sa ma ɦay-ɦayna musi kulo vok sumuna, may sa ma farayna hoti goy cawi.

⁷Nan wi sa ma gorvona ka ɓe kay kulumayna, may sa muliyana ka poy gaa hiɗi sesi ki sa gorvon nala.

⁸Sa ma jugoɗ zulda nig hay zulda ta nam jugoɗa'ta, nala kaw sa ma ɦo gulmunna gaa'a guy ma calamu.

⁹Sa ma to hiɗiyna ma fi milla, sa ma ɓar guna fi joota kaw.

¹⁰La ceɗna siyam tuloɓiya, siyam may ciy goyɗi ni, san li lop hiɗi nam ɗawni hiɗi ŋiriyam vat', may hiɗi yalda san as kay li slen bay lopo.

¹¹La guyn cal sa'a may gu ma lum kalamna mayɗi, ŋaata vi sa ma li gu namna mayɗi kaw.

¹²Dita ta may goy vun sa ma yalla na' hobay hiɗi slugota ŋolo; may dita vi sa ma ɦay-ɦayna kalam hay ba-goyta may.

¹³Kay hay tun cawta vi dita valamu, nam ki to'ofay nala, vat ɓakŋa valam goy hay ɦay-ɦayta.

¹⁴Sa ma ɦay-ɦayna law ŋol dak-dak. Sana may wi va ma min coonɗi, may ma min dum kay sle ma min co bugolomu mi gige?

¹⁵Lopna vi sa ma ɦay-ɦayna tom sutiyamu, kay mige nam may wi kay tuɗ hay hoyok-ziy ma ŋollaɗi.

¹⁶Joota kay nagata ta ti mul ka' kayn mi goorgooro, joota kay nagata ta sum sa ŋulona va' kaf ti funa visi graw culum culum.

¹⁷Sle'ta kagu, nak nagata ta mulla vagu hay jaf ma farayna, ti nagata ta sum sa li lopna va'a ti funa hay liyna valamu kay fi dono'o, may kay vul tuwsi goy tam dolaynɗi.

¹⁸Hay li ma ɓaŋ sileɗay gaa kuɗaŋ ma' laki, yam-ziyda ɦuɗuk gaa'a, hay li ma ɓamta ma' may li lopɗi, ziyda sut niy du-du' kaw.

¹⁹Sumun kot tin kayni kay val irsiya, nisi ci dolayn kayni kay sleɗ haysiya, may ma hob vun slen kulo kafna kayni ti gurjuta.

²⁰Naŋ ma di joo kat mullaɗi, hay varta vaŋɗi kaw, hay li ma naŋ buri gaa kalaf hay ziyda vaŋ waŋ' kaw, naŋ ma di va ma joo tam sa ma faraynɗi; kay layayn ma dukalawna as slaŋ deleŋu, muur ma zlimitna kaw as kay kal dita vaŋ goyo.