Read Masana SA MA KUSTA 11 Bible Online

SA MA KUSTA 11 - Masana bible

SA MA KUSTA 11

¹Gaŋ funa vaŋ goloŋo, kay hay vokka ɗawni naŋ ma fumu;

²vulaŋ gal ma kepna mi sumun siɗiya lebo glafandi noŋo, kay joota ta min co kay nagata naŋ may wa'ɗi.

³Hay li ma ɗugulla hobawa hiɗi niyna, nam si gaa kay nagata; la gun nigawa gaa'a, la nam nig gaa hay gal ma gaana lebo gal ma kayamna kaw, nam hin ɗawn hay liy ma nam nig gaa hayna na waŋ'.

⁴Sa ma iram cuki kuɗ simeɗna ŋiresl as cuk jaf gaaɗi, nam ma ɗuw ɗugulla dok-dokŋa as feɗ va noŋɗi kaw.

⁵Kay naŋ wi liyn ma simeɗ ma biwna may hay panɗi, lo naŋ may wiɗi kaw hay li ma busuwna tun hay cata kay li gooro, nala kaw lopna vi Lawna ma li kafna naŋ as kay wum cawamɗi.

⁶Cukaŋ slena vaŋ ma jafna gaa hay graw culum culum pa, naŋ ma hin ɓaŋ tun sukɗi hay vulatita, kay va ma min li'e naŋ wumɗi, la mi hena lebo hena, la nam pet ŋaa'a.

⁷Haraŋa kayni ŋaa'a, lo ŋaa'a kay ira a ɗuw fatta kaw.

⁸Nala la sana li busatawa ŋolo gaa kay nagata, nam ma firi kay busa na'ta lakŋi kaf, lo humam ma gum ala busata vi jufunda ka vokom ŋolo. Slen kaf ma co'o kayni mi va ma waa'a.

⁹Naŋ sa ma joriyona, laŋ firiya hay joriyota vaŋu, hin dikaŋ goy tam firita hay buura vi joriyota vaŋ kaf, laŋ kuɗ va ma dikaŋ daŋu, va ma iraŋ wum kaf ŋaa'a laŋga kaw, may waŋ goy haraŋ ala kuɗ slen kayni kaf Lawna ma yaŋ hay kitata.

¹⁰Slaŋ varta ta joota vi dikaŋ goyo, vi tuwaŋ goy gine hiɗi joota; kay joriyota hiɗi ŋarpita mi va ma waa'a.