Read Masana SA MA KUSTA 12 Bible Online

SA MA KUSTA 12 - Masana bible

SA MA KUSTA 12

¹May hay buura vi joriyota vaŋu, humaŋ ma gaŋ kay nam ma kotaŋŋa, jew a buura ma joon co'o, jew ma busa ma joona ma teray goboyo, hay li ma naŋ ma di ala: Va ma firiyan may hayam loɗi,

²jew a fatta hiɗi haraŋa, tilla hiɗi mislekŋa kaw muɗ jufun kirip', hay li ma ɗugulla kus bugolomu hay li ma niyn saawa.

³Buur namna ɗawni, mi buur ma sum sa ŋom ziyna tuwsi muɗ visi bat-batna, mi buur ma sum sa donona ma hormos gaa'a, boy sa lutna kaw ma ba seh' kay nisi kiɗawa goyo, liyn ma nisi sa ɗuw hay ir-ziyna irsi ma duk gaa jufun kirip',

⁴cokoromna ma ma'na vi vun-galana ma duk kulo kay hagata, liyn ma del hiɗiy ma lutna muɗ tiy ɓislek loɗina, liyn ma tiyna vi layayn ma zana, liyn ma guro-boy sa gi nulla delsi ma sah goyo,

⁵liyna ma san li nari kay va ma ka kulo hiriŋ', liyn ma san tuɗ hay hagata kaw tuwam li nari, liyn ma gu-amandena tun caw ɓo'o, liyn ma baara muɗ nek zil', liy ma giɗejeŋŋa[2] muɗ lemdeke, kay sana tuɗ kayni iram vokom tam ziyna valam ma vatɗina, hay li ma boy sa tiyna ma ŋuy goy hay hagana.

⁶Jew a jaɓ ma koti hiɗi doorona ma ja goyo, doway ma koti hiɗi ora ma to goyo kaw, hay li ma duw-ganna ma ja gaa hay kaara, hay li ma diŋ-diŋ ma ligat niyna ma fut gaa hay kaara kaw;

⁷jew a butuwna hot gaa kay nagata ki nam ay nala, hay li ma ciwta ma hot tam Lawna ma vula'ayna.

⁸Slen kaf mi va ma waa'a, din mi sa ma kusta, slen kaf mi va waa'a.

⁹Sa ma kusta mayn mi sa ma yalla tutaɗi, lo nam hat wida mi sumuna, nam hum slena, fek slena, nam kot law ma nir-niramna goy ŋolo kaw.

¹⁰Sa ma kusta gar kay fi yoboy ma ŋaana, nam ɗom goy hay hagana valamu, kayni mi yoboy ma gasina.

¹¹Yoboyna vi sa ma yalla ŋray ca ki jalaŋŋa nala; sum sa di yoboyn namna ŋray ca ki osl ma ciy gaan nala, mi vulda vi sa ma ŋomda ma kepna.

¹²Va ma hini kayn ala, goora vanu, hataŋ yali kuɗ slen kayni, la sle ma diyna, kot ɗerwel ma ŋol hiɗi nam kaw yalam may dabɗi, hat ŋolo kayn makam mi tuw ɦawa.

¹³Humaŋ vatta vi dita vi sa ma kusta: Laŋ nar kuɗ Lawna, humaŋ vun-ma-gatna valamu, kayni mi va ma san gigekaw as a lumna.

¹⁴Kay Lawna ma ka kitata kay lopna kaf, kay slen ma ŋayayna kaf, la ŋaa'a la joo'o kaw.