Read Masana SA MA KUSTA 2 Bible Online

SA MA KUSTA 2 - Masana bible

SA MA KUSTA 2

¹Nan di tam dikan ala: Tuɗaya, nan min wakag hiɗi firita, nan min ɗuwa' ti ŋaata-ŋolda dok-doko. Ɗuwgiya, nam kayni kaf mi va waa'a.

²Nan di ala cenda kayni mi va ma ɦay-ɦaya, nan di kaw ala firita ŋaata va' mi mige?

³Nan var kay vul tuwan goyo mi dolayna, may hin dikan hay yalda, lo, nan di'e kay vul tuwan goy tam sle ma ɦay-ɦayna, ta-ta nan min wi'e la ŋaa'a kay sa-wurana kay li slen ki kayn nala gaa kuɗ fatta hay buura vi irita valamu.

⁴Nan li lop ma ŋulo suw asa, nan in ziyn ŋolo, nan pi gu gulda-guldan ŋolo,

⁵nan li jardeŋŋa hiɗi sinena ma guna ma vuɗ vuɗ guna ma tina kuɗ jafamu jafamu haya.

⁶Nan kot goloŋŋa dak-dak kay gi niyna kuɗ juruta ta gun ka wul haya'ta.

⁷Nan gus gorvona sa jufayna hiɗi sa boyna, gurona visi vuɗ vo hay ziyna vanu; nan ka hiɗi farana vi luwayna hiɗi fukunayna ŋolo, suw nisi kaf sa ay vokanu hay Yerusalem.

⁸Nan tok doorota kulo ŋolo hiɗi ora kaw, hiɗi slen ma ŋaana vi muliyana hiɗi naga ma juni kuɗanna. Nan ka hiɗi vokŋa vi jufayna hiɗi boyna sa gi nulla kan tisl' ta', nan jugo jibetta vi sum-wurana, nan yaw boyn ŋol zututu kaw.

⁹Nan muɗ ŋolo, muɗ gajiji suw nisi kaf sa mus vokan hay Yerusalemna. Nan ka musi dok-dok hiɗi yalda vanu kaw.

¹⁰Va mige kaw ma iran vumna, nan hinim goy galan bay lumɗi, va ma dikan minimu may nan lumɗi mayɗi, kay dikan ka li firi kay lopna ma nan lum kafna, kay kayni mi va ma nan fum kuɗumna.

¹¹Bugolda nan muɗ iran tam lop ma nan lum hiɗi ɓanna kaf, hiɗi makka ma nan fi'e kuɗ lop namna, nan ɗuw kayni, slen namna kaf waa'a, mi jaŋga kuɗ simeɗna kaw. Va ma ŋaa'a ne' ma nay fum kuɗ lop ma nay lum gaa kuɗ fatta tani mayɗi.

¹²Nala nan muɗ iran kay ɗuw yalda, bay-yalda hiɗi ɦay-ɦayta. Ki kayn nala sa ma vurna hay baŋal mulla lum ɗawn mi mige? Kay va namna ay liy vatiya.

¹³Nan wi goy haraŋ ala yalda na' ŋaa'a suw bay-yalda, ki haraŋa nam ŋaa'a suw jufunda nala kaw;

¹⁴kay sa ma yalla kayni iram kir tuwam ca, may sa ma ɦay-ɦayna poy hay jufunda, may nan wi kaw ala dabta visiya ŋray ca ki tuwa' nala.

¹⁵Nan di hay dikan ala: dabta vanu ma li ɗawn ki sa ma ɦay-ɦayna nala kaw, la nala nan li yali kay mige? Nala nan hot di hay dikan ala nam kayni mi va waa'a.

¹⁶Kay sa ma yalla yal ma kay toɗonomna as ŋom ta-ta hay vatɗita suw sa ma ɦay-ɦaynɗi, kay hay li ma buur ka ɦur vokom kayni, sle ma li hay buur namna kaf kayni yam san as kay jok kalamu, kay sa ma yalla mit ŋray ca ki sa ma ɦay-ɦayna nala kaw.

¹⁷Nan ka gawi hiɗi mus ma irina, kay slen ma lum gaa kuɗ fatta kaf muɗ kiran bisi, kay slen kaf mi va waa'a, mi jaŋa kuɗ simeɗna.

¹⁸Lop ma nan lum gaa kuɗ fatta kaf muɗ kiran bisi, ɦilay hiɗi nam ɗawni mi sa ma min vurna bugolan hay mulda.

¹⁹Sa ma wi ala sa namna ma li ɗawn yali lebo ɦay-ɦaya mi gige? May nam ma mus mi ma ŋolla kay lopna van kaf, kay lop ma nan lum hiɗi makka hiɗi yalda gaa kuɗ fatta kafe. Kayni lo mi va waa'a.

²⁰Hay li ma nan ɗuw yam-dabta vi lopna van ma nan lum gaa kuɗ fatta kaf, nan gar kay so tuwanu a li va loɗi.

²¹Kay sa hena li lop hiɗi yali, hiɗi wida kaw, slen kaf ma nam lumna li hay liyamu kaw, may nam hin vuɗna vi lop namna hay ɓam sa mara ma fi makka hayam noŋɗi, nala nam kayni mi va ma waa'a, ti tuw ŋolo kaw.

²²Ŋaata ma san fum kuɗ makka vi lopna ma nam lum gaa kuɗ fatta mi mige?

²³Buura valam kaf mi hiwirta, varta valam ram ŋalɗi, dikam tun suk hay henjetɗi kaw. Nam kayni mi va ma waa'a.

²⁴Ŋaata ta san fa'ta kayni hay li ma nam ti'e, ci'e, vul firita mi dikamu kuɗ lopna valam ma nam lumna. May nan wi ala slen ma ki kayn nalana may hay ɓam Lawni pa.

²⁵Hay gasita, sa ma as ti'e, ci'e, mus hay firita kaw nam gige? Mi nan deɗi su?

²⁶Kay Lawna vul mi sa ma kiram ŋaana yalda, wida vi slena hiɗi firita, may nam vul nekka mi sa ma sulukŋa kay tok slena, tapam yam tuwamu kaw, kay vulum mi sa ma kiram nam Lawn ŋaana. Kayni lo mi va ma waa'a, mi jaŋga kuɗ simeɗna.