Read Masana SA MA KUSTA 5 Bible Online

SA MA KUSTA 5 - Masana bible

SA MA KUSTA 5

¹Naŋ ma hin vunaŋ di koloyɗi, hin dikaŋu var koloyo vok Lawnɗi lay; kay Lawna ka kulo hay wuralawna, naŋ hayɗin ka gaa kay nagata, nala dita vaŋ ma li dak-dakɗi.

²Kay duwayta as daŋ kayni hay li ma varta hobawa hay dikaŋu, nala del sa ma ɦay-ɦayna nay as humum kayni hay dita ma dak-dakŋa.

³Hay li ma naŋ yi vaawa kaŋu vok Lawna, naŋ ma vi yaŋɗi kay hobom vunamu, kay Lawna min ɦay-ɦaytaɗi, nala naŋ ma hob vun va ma naŋ yum kaŋŋa.

⁴A naŋ yi va kaŋu, may hobom vunamɗi kayni, marya naŋ yi va kaŋɗi.

⁵Hin vunaŋ kalaŋ hay sulukɗi, sa ma giy ay sun kataŋŋa naŋ ma dum ala kayn mi law ma waa'aɗi. A Lawn muɗ ɦiy kataŋu, ɓulak lopna vaŋ goy kaw kayn ŋaa su?

⁶Kay hay duway ma dina, sle ma waana ka'a, hay dit kaf kaw slen ma waana ka lay; nala naŋ ma li nar kuɗ Lawna.

⁷La naŋ wi hay hoyok-ziyn mara'a ala sumun ka curoɗ sa ma hawna, la nisi ka li wasta tam ɗigerta hiɗi gasita, naŋ ma li ɦuyum' kay kaynɗi, kay sa ma musi ŋol damni musi kayni gaa kuɗ gaŋeraŋa vi sa ma ŋol suwum ma dum lawamna, may ma musi kisi ŋol kafna ka'a.

⁸Slen ma nagat vulumna nam vi sumun kaf, mulla kaw fi suburta kuɗ lopna vi sinena.[1]

⁹Sa ma min gurjuta, gurjuta may hobomɗi, sa ma gar farayna, farayn may gutumɗi, kayni kaf mi va ma ɦawa'a lo.

¹⁰Hay li ma slen biyawa ŋolo, sum sa tumna biya ŋolo kaw; ŋaata vi farayna tam mulamna kayni mi ɗuw ma nam ɗuwum hiɗi iram ɦawa ɗuwna tuta.

¹¹Sa ma li lopna kal sen lumaɗ ŋolo, la nam ti malam ŋolo, ti malam kiɗaya kaw; may sa ma farayna hobta cep-cepta hinim bur senɗi.

¹²Nan wi joo tara kep lo gaa kuɗ fatta, kayn di ala faray ma san ŋomomna muɗ beke'e kalamu.

¹³Faray namna ba goyo kuɗ law ma waa'a, goor ma nan vuɗumna va may hin hay ɓalamɗi.

¹⁴Ki nam kali goy hay sulum pa nala, nam ma hot ɗawn ki nam may nala kaw, lop ma nam lumna nam as sli mara kuɗum noŋ ne'ɗi.

¹⁵Nam kayni mi joo ma ŋolo yo. Nam hot ɗawni ŋray ca ki nam may nala, ki kayn nala ŋaata ta nam fa' kuɗ lopna valam ma nam lum hay simeɗna mi mige?

¹⁶Lo, buura irita valamu, nam ba' kayni hay jufunda dok-dok, kicaɓna ka ŋolo, lasta hiɗi ɓulak dikga ka kaw.

¹⁷Kayni mi va ma nan wumu: Ŋaa'a ŋolo kay san ti'e, ci'e, ɗuw ŋaata-ŋolda jar lop ma nam lum gaa kuɗ fatta kafna, jar buura vi irita ma Lawn vulumtina, kay kayni mi galla valamu.

¹⁸May la Lawna vul farayna hiɗi sle hena mi sanawa, la Lawna vulum hagatawa kay ti kuɗumu, kay yaw ir falamna, firiya kaw kuɗ lopna valam ma nam lumna, nam kayni mi vulda vi Lawna.

¹⁹Kay nam as var ŋolo kay buura vi irita valamɗi, kay mige Lawna hob firitawa hay dikamu.