Read Masana SA MA KUSTA 6 Bible Online

SA MA KUSTA 6 - Masana bible

SA MA KUSTA 6

¹Nan wi joota tara kep gaa kuɗ fatta, na' to sutay sana.

²Sana Lawna vulum farayn ŋolo, sle hena hena ŋolo hiɗi gajijita kaw, va ma dikam daramu, ma nam bay fumɗi mayɗi, may Lawna hinim ti mul kay slen ta-taɗi, hin firi kay sle namna kayni mi sa mara ma bugolomu. Kayni mi va ma waa'a, mi joo ma ŋolo kaw.

³La san vuɗ guron kis, mus hay nagat busat ŋolo, la buura vi irita valam ir ŋol nanige kaw, la dikam may hob hiɗi ŋaata-ŋoldaɗi, la zul ma pum hayam kaw mayɗi, nan fi di ala goor ma suroɓi goyna kaw suwumu.

⁴Kay nam vuɗ goy kayni waa'a, nam hot ɗawn kaw hay jufunda, semda valam kaw hin ɗawn dok-dok hay jufunda lay.

⁵Kay nam may wi fattaɗi, ɗuwa' hiɗi iramɗi kaw, nam ka hay tun-sukka suw sa ma farayna.

⁶May la sa ma farayna mus iri malam ir busat birim ma' kaw, la nam firi hay ŋaata-ŋoldaɗi ni, kaf kal kayni hay liy kepe ɗisu?

⁷Lopna kafe ma san lumna, nam lum kayni kay gar tina, may hiɗi kayni kaf darta valam may hobɗi.

⁸Sa ma yalla suw sa ma ɦay-ɦayna hiɗi mige? Sa ma ka hay makka poyta valam ta jar sumuna ŋaata va' mi mige?

⁹Va ma iraŋ wumna nam ŋaa'a suw niŋana vi darta, kayni lo mi va ma waa'a hiɗi jaŋga kuɗ simeɗna.

¹⁰Va ma ka vaydi mi va ma ay yiy hiɗi selem hay buur ma kalina yi', nay wi goy haraŋ ala sana ma yum ala sana as ci way hiɗi nam ma dono suwumnaɗi.

¹¹La dit ka ŋolo, sle ma waana ka haya' ŋolo kaw, ŋaata ma sana fum kuɗum kayn mi mige?

¹²Sana hay irita valamu, hay ŋaɓta vi buura vi irita valamu ta goy waata, ta ki ŋus-gun nalata, sa ma as wi va ma ŋaa'a kalamu mi gige? Sa ma as vi labara tam sana kay va ma min li bugolom gaa kuɗ fatta mi gige?