Read Masana SA MA KUSTA 7 Bible Online

SA MA KUSTA 7 - Masana bible

SA MA KUSTA 7

¹Sem ma tiyna nam suw mul ma koti hiɗi urdina. Nala kaw buura vi mitta suw buura vi vu'da.

²A tuɗ hay ziy ma mitta li haya kayni, kiran ŋaa'a ŋol suw tuɗ ma hay ziy ma yuldet ka haya, kay ziy ma mitta hayna dabta vi sumun kaf hayamu, sa ma irina as li ŋali,

³kay yorta na' ŋaa'a suw cenda, kay la iraŋ ka turkusi kaw, dikaŋ as mus hay sle'ta.

⁴Sum sa yalla diksi tuɗsi hay ziyn ma mitta ka haya, sa ɦay-ɦayna diksi tuɗsi hay liy ma firina.

⁵Ŋaa'a kay hum bayna vi sa ma yalla suw nulla vi sa ɦay-ɦayna.

⁶Ki gu-cekcelemna mun gaa kuɗ dowayt tel' tel' nala, cenda vi sum sa ɦay-ɦayn kaw na' nala. Kayni lo mi va ma waa'a.

⁷Curo'da muɗ sa ma yalla ɦay-ɦaya, sle ma vulum ɦawana dugun vun sana may.

⁸dabta vi slena nam ŋaa ŋolo suw cawam ma tuni gaa pana; dikga ta ŋal kiliŋi suw dikga ta sli yam tuwa' kulo'o.

⁹Naŋ ma muɗ ɦiy koli de deɗi, kay ɦiyda mus kayni hay dikga vi sa ma ɦay-ɦayna.

¹⁰Naŋ ma di ala: Buur ma kali jewna nam ŋaa'a suw buur ma wulin kayn kay mige? Naŋ ma di naɗi, kay jobta vaŋ kayni yalda tay haya'ɗi.

¹¹Yalda na' ŋaa'a suw vocota, na' ŋaa'a suwa kay nisi sa gaa kuɗ fatta.

¹²Kay hay li ma nay ka gaa kuɗ ŋus yalla, kayni ŋiray ca ki nay ka gaa kuɗ ŋus gurjut nala; kay ŋaata vi wida kayn ala sum sa ka hiɗi yalda mus iri kuɗa'a.

¹³Ɗuway lopna vi Lawna tige! Va ma nam hormosomna sa ma as moɗom ɗawn mi gige?

¹⁴Hay buura vi ŋaata ŋolda, sleɗaŋ hayaŋu, hay buura vi joota, varaŋ kaŋu, nam cani Lawna lum ŋiray ca ki tuwam nala, kay sana may wi va ma min li vokŋaɗi.

¹⁵Slen kayni kaf nan wumu hay buura vi irita vanu ma waana gaa kay nagata. Sa ma li ɗigerta kilana mit hiɗi ɗigerta valamu, may sa ma joona buura valam ɦur voko hiɗi joota valamu.

¹⁶Naŋ ma kal ɓam ɗigerta vaŋɗi, lo naŋ ma ɗek tuwaŋ goyo ki naŋ yal suwa naɗi kaw, naŋ min ci tuwaŋ goyo kay mige?

¹⁷Naŋ ma kal ɓam joota vaŋɗi, naŋ ma muɗ ɦay-ɦayɗi kaw. Naŋ min ci tuwaŋ goyo jew buura vi mitta vaŋu kay mige?

¹⁸Ŋaa'a kay naŋ ma vi slen kayni kulo kaŋu, yaŋ ma jokomɗi kaw; kay sa ma li nar kuɗ Lawna hulot goy vun slen kafe.

¹⁹Yalda muɗ sa ma yalla dono'o suw guverner sa doogo hay hoyok-ziyn kepna.

²⁰Gasiya, gaa hay nagat tan kayni, sa ma ɗigera mayɗi, sa ma li sulukɗi kep kaw mayɗi.

²¹Naŋ ma jak humaŋ tam sle ma sumun dum kafnaɗi, la naɗina fat tara kep naŋ ma hum sa ma sunda vaŋ ŋulaŋu.

²²Kay dikaŋ ka daŋ ala naŋ kay tuwaŋ kaw ka ŋul sumun ŋolo.

²³Nan wak slen kayni kaf hiɗi yalda. Nan di ala nan ma fi yalda yo, may yalda sli haya' goy gine hiɗi nanu.

²⁴Va ma ka goy gine'e, va ma ka gaa zulu, zul suw asa, sa ma as fum gige?

²⁵Nan vul dikan goyo kay wi yalda hiɗi ŋaata vi slena, kay fekem cawamu, kay garamu kaw, lo kay wi ɦay-ɦayta vi jiw-zlata hiɗi ɦay-ɦayta vi ɦoyta.

²⁶Nan fi va ma ti tuw ŋolo suw mitta kayni, ti cata ta dika' ŋray ca hiɗi jawta hiɗi luwanda kaw, ɓa' ŋray ca ki zigew-ŋokŋa nala; sa ma kir Lawna ŋaa'a pir goy ka'a, may sa ma li sulukŋa na' ma wumu.

²⁷Sa ma kusta di lo: Hay li ma nan fek slen kalam kep kep kay fi gasita, nan fi kayni;

²⁸ɗuwgi va ma nan ka garam hiɗi dikan kaf may nan bay fum tuwana. Kayn ala jar sumun birim ɗaw nan fi sa kepe, may cata ta jar boyn ki kayn nala nan may fa'ɗi.

²⁹Kayni mi va ma nan lumna: Lawn kot sumun kaf ɗigere, may nisi min lawta gunita ŋolo.