Read Masana SA MA KUSTA 8 Bible Online

SA MA KUSTA 8 - Masana bible

SA MA KUSTA 8

¹Nam ma ŋiray hiɗi sa ma yalla nam gige? Ma wi kay di caw slen goyo nam gige? Sa ma yalla vokom muɗ wileɗ pirik pirik', varta joota vi dikam as muɗa kaw.

²Nan daŋu, humaŋ kuɗ dita vi mulla, kay va ma naŋ yum kaŋu vok Lawna.

³Naŋ ma li tuwaŋ koloyo kay pir goy vokom gineɗi, naŋ ma so'ot dikaŋ hay va ma jooɗi kaw, kay nam as li va ma nam min kaf taŋu.

⁴Kay nanige kaw dita vi mulla ka hiɗi donot kuɗa'a; ma as dum ala naŋ lum kayni mi mige ka su?

⁵Sa ma hum kuɗ vun-ma-gatna nam may wi sle ma joona noŋɗi, sa ma yalla dikam wi liyna hiɗi kitata.

⁶Kay slen kaf liyna valamu ma cona hiɗi kitata ka'a, hay li ma lawta joota to sutay sanawa.

⁷Kay na'ta nam may wi va ma min co'o noŋɗi; sa ma as dum ala van kayni ma co nala nala mi gige?

⁸Donota vi sana kay tel sukka kay na' kal goyɗi tayɗi, lo gaŋeraŋa valam ne' kaw may kay buura vi mittaɗi, nam as but tuwam goyo hay duur namna tanɗi, sum sa li joot kaw joot as suɗsi goyɗi lay.

⁹Nan wi slen kayni kaf, hay li ma nan tun ŋalda vanu kay sle ma ka li gaa kuɗ fatta, liyn ma sana kol kay sa hena kay lasamu ka'a.

¹⁰Nala nan wi sa jiw-zlata ka fi mitta, nisi pisi gaa hay zulda hiɗi tun-sukka. May nisi sa li ɗigerta ka kal goy gine'e hiɗi liyna ma peldetna, sum sa hay hoyok-ziyna yisi jok kay sle ma nisi lumna. Kayni mi va ma waa'a lo.

¹¹Kay kitata kay lop ma joona may ka' gosoy wit' deɗi, kuɗ kayni dik sum-wurana hobay hiɗi darta kay li sle ma joona.

¹²May hiɗi kayni kaf, la sa ma sulukŋa li joota sem kis, may buura valam ɦur vok kaw, va kep ma nan wum kayni ala: ŋaata-ŋolda kayni kay sa ma li nar kuɗ Lawna.

¹³May ŋaata-ŋolda may kay sa jiw-zlatnaɗi, nisi as li buur ŋolo gaa kay nagata suw ŋus-gunɗi, kay mige nisi may li nar kuɗ Lawnɗi.

¹⁴Ɗuwgi va ma waa'a ma gaa kay nagata natige: Lop ma li tam sum sa ɗigera kayni mi lop ma as a li tam sa jiw-zlata, lop ma li tam sa jiw-zlat kayni mi lop ma as li tam sa ɗigera. Nala nan di ala nam kayni mi va ma waa'a.

¹⁵Nan subur firita, kay ŋaata vi sana gaa kay nagata kayni mi tina, cina, hiɗi firita, kayni mi va ma as tap kuɗ sana hay lopna valamu, hay buura vi irita valamu ma Lawn vulumu gaa kuɗ fatta.

¹⁶Hay li ma nan vul tuwan goyo kay wi yalda, kay wi naata vi slena ma ka li gaa kay nagata, kay ir san may duk gaa sene hay henjetɗi, hay falayɗi kaw.

¹⁷Nan sar lopna vi Lawnawa kafe. Awa ŋaa'a! Nan waawa ala san as fi caw sle ma li gaa kuɗ fatta kafɗi, nam mak tuwamu kay gara, may nam may fumɗi, la sa ma yalla min wi va'a kaw, nam as fi va namnaɗi.