Read Masana SA MA KUSTA 9 Bible Online

SA MA KUSTA 9 - Masana bible

SA MA KUSTA 9

¹Awa, nan tun varta vanu kay slen kayni kafe, nan var kay wak slen kayni kafe, nan wi ala sa ma ɗigera hiɗi sa ma yalla, hiɗi lopna visiya kaf ka kayn hay ɓam Lawna, minda hiɗi gawta kaw, may sumuna wi kaynɗi, kay slen kaf ka voksiya.

²Va mige kaw ma li tam sana, co tam sumun kafe, nam co tam sa ma ɗigera ki tam sa ma jiw-zlat nala kaw, tam sa ma li ŋaata, tam sa ma ŋaana ma bay-liwisna ki tam sa ma liwisna nala kaw, tam sa ma li ɗifinna ki tam sa ma li ɗifinɗina nala kaw, sle ma li tam sa ma ŋaana mi tam sa ma sulukŋa kaw, tam sa ma yi slen kalamu ki tam nam ma li nar kay yi slen kalamu nala kaw.

³Kayni ti joota ta jar sle ma ka li gaa kuɗ fatta kafna; kayn di ala sumun kaf va ma co kisina mi va namna na kepe; lo, dik sum sa wurana hobawa hiɗi jiw-zlata, ɦay-ɦayta ka hay diksiya hay buura vi irita visiya; bugol kayni, nisi kal hay mitta.

⁴Kay nisi sa irina kaf cubta sle'ta ka kisiya, diyna kaw hay li ma nam ka iriya, nam suw zlo ma mitina.

⁵Sa ka irina kaf, wi ala nisi ma mita, may sa mitina may wi va' ne' loɗi, wurakŋa visi may loɗi, kay yam sumuna jokawa kisiya may.

⁶Minda visiya, gawta visiya, hiɗi hunayta visi pet vati goyo; slen ma ka li gaa kuɗ fatta galla visi may hayam noŋ loɗi.

⁷Tuɗaŋu, taŋ funa vaŋ hiɗi firita, caŋ dolayna vaŋ hiɗi hayaŋ sleɗiya; kay Lawna min lopna vaŋawa hay jew ɓa-ɓa.

⁸Hin sligara vaŋ muzi goy haɓ tal-tal' hay buurta kaf, mula ma li ɦokay kaŋ dok-doko kaw.

⁹Firiyaŋu hay irita vaŋu hiɗi cata ta naŋ mina'ta, hay buura vi irita vaŋ ta waata ta Lawna vulaŋga gaa kuɗ fatta kaf, hay buura vi irita vaŋ ma waana kaf, kay kayni mi galla vaŋu ma naŋ fum kuɗ lopna vaŋu ma naŋ lum hay irita vaŋu gaa kay nagata.

¹⁰Slen kaf ma naŋ fum a li'e hiɗi donota vi ɓaŋu, laŋga; kay liyna vi mitta ma naŋ tuɗ hayamna ɗawni, lop ma li mayɗi, var mayɗi, wida tayɗi, yalla mayɗi kaw.

¹¹Lo, nan wi ala gaa kuɗ fatta kayni, jaŋŋa may vi sum sa koloy suwna tutaɗi, duura may vi sum sa jufay suwna tutaɗi, tina may vi sa yal suwna tutaɗi, farayna may vi sa wi yalla tutaɗi, ŋaata may vi sa yal suw kafnaɗi kaw, kay law ma ŋaana hiɗi ma joona co kisi nisi kafe ŋray ca.

¹²Sana kay tuwamu may wi ŋata-fatta valamɗi, nam ŋray ca ki kulufna ma den vumna nala, ki layna ma jawta vumna nala kaw, sum-wurana kaw nala, ka ŋuyi cusl' kay joota, na' co kisi kayn tukusi' de'.

¹³Nan wi yalda ta ŋol tara kep lo ta suwan yanu gaa kuɗ fatta tani.

¹⁴Hoyok-ziy mara ma goor ay kep hiɗi sumun hayam kiɗaya; mul ma dono mara'a kal kay sli hoyok-ziy namna, nam ŋuyumu, gi zlaɓ ma ŋol kulo talamu,

¹⁵hay hoyok-ziyn namna, san ay kep, nam mi sa ma hawna, may mi sa ma yal kalamu, nam suɗ hoyok-ziy namna goyo. may sa jak humam kay sa ma haw namnaɗi.

¹⁶Nan di ala: Yalda na' ŋaa'a ŋolo suw donota, may yalda vi sa ma hawna sumun ɗuwa' birek-ceke, dita valam kaw sa vi kuɗa'ɗi.

¹⁷Nala dita vi sa yalla ta sumun huma' hiɗi ŋalda na' suw siwelda vi mulla ma ka ti mulda kay sum sa ɦay-ɦayna.

¹⁸Yalda na' suw sle-ma-duura; may sa ma sulukŋa kep na kay' ɓulak sle ma ŋaan ŋolo.