Read Masana NUL MA SUW NULLA 1 Bible Online

NUL MA SUW NULLA 1 - Masana bible

NUL MA SUW NULLA 1

¹Nul ma suw nulla, vi Salomon

²Hinim ŋaf vunam hiɗi nanu, coɗan hiɗi vunam noŋo, kay darta vaŋu na' kiran ŋaa'a suw vinna.

³Urdina vaŋu his ŋaa'a ŋolo, semda vaŋu ki urdin ma yamam goyo nala; kuɗ na'ta kayni guro-boyna ka minaŋu.

⁴Tapanis kuɗaŋu, numa min jaŋis kuɗaŋu. Mulla kalanawa kulo hay ziyda valamu, numa ma kal hay firita ŋolda kuɗag naku; numa ma li firi kay darta vagu suw firita vi vinna. Nisi minag kayn hay liyamu.

⁵Nan wura nil', may nan jifiya, guro-boyna vi Yerusalem, nan ki guɗukŋa vi Kedar nala, ki tapina vi Salomon nala.

⁶Nigi ma muɗ ɦuyum' kay wurata vanɗi, muɗan wura kayn ti fatta, gurona vi sunu diksi ɓulakay katanu, nisi musan goy ŋom gulda-guldana, gulda-guldana van kay tuwanu nan may ŋomomɗi.

⁷Daniya, naŋu ma dikan minaŋŋa, danay kay liyn ma naŋ ŋom farayna vaŋ hayna, danay kay fara ma naŋ molom haya kay tun sukan hay falayta, a nan ma viy goy tiŋ-tiŋ' jar farayna vi nuriyoŋŋa kayni kay mige?

⁸Nak ta jifiy suw boyn kafta, la nak may wiɗi na, kalag ay goy hay sem fukunayna, ŋomag guro fok-meena vagu goboy tam gurona vi sa ŋom fok-dimina.

⁹Nak bananta, nan ŋirag hiɗi kulum ta cata ta ka tam kekena vi Farawn.

¹⁰Geliyag jifiy ŋolo jar kermena, dekdelag jifiy ŋolo jar dif ma kella.

¹¹Numa ma kotag jaɓ ma ora, hiɗi dooron ciy jaramu.

¹²Hay li ma mulla ay ŋuyi hiɗi sumuna, urdina ma yum nard ma setay tanna ka hisim faya.

¹³Dukanna kiran kayni ŋiray ca ki urdina miir nala, nam buur kulo war-diganu.

¹⁴Dukanna kiran kayni ŋiray ca, ki ɓona vi goroŋgona[1] nala hay sine gulda-guldana vi En-Gedi.

¹⁵Nak jifiy ŋolo bananta, nak jifiy ŋolo, irag ki ir gukayn nala.

¹⁶Naŋ jifiy ŋolo, dukanna, nan minaŋ ŋolo. Liyn ma buura vaya nam goɗiya,

¹⁷gu-malla vi ziyna vaya mi gu-gamna. Dig-ziyna vaya koti hiɗi gu-siprena.