Read Masana NUL MA SUW NULLA 2 Bible Online

NUL MA SUW NULLA 2 - Masana bible

NUL MA SUW NULLA 2

¹Nanu ti milereta vi Saron, tayna ma hay lokŋa.

²Bananta jar guro-boyn kayni ŋray ca ki tayna jar gu-zigiyna nala.

³Dukanna jar guro-joriyon kayni, ŋray ca ki gu-nurlona jar guway ma kuɗ jurut nala. Gaa kuɗ ɗuŋusamu, nan min kay musa, vuɗna valamu jibete hay vunanu kaw.

⁴Nam kalanawa kalaf hay ziy ma ci vinna; bay-bayna ma nam vum goy kanu, ti darta.

⁵Muɗan dono'o hiɗi hambulla vi vuɗ gulda-guldana, nigi sleɗan tuwanu hiɗi nurlona; kay nan liy moyo kay darta.

⁶Hin ɓalam ta gulda tuni kuɗ yanu, hin ɓalam ta jufta sawan tuwanu may.

⁷Nigi guro-boyna vi Yerusalem, nan sumalgi hiɗi buɗugoora hiɗi dukŋa, ala nigi ma jo dartaɗi, nigi ma zliy darta kulo jew minda va'ɗi.

⁸Law kayni mi della vi dukanna, nam ɗaw tuɗayni. Ka pir kulo kay hiɗiyna, ka ɦal kulo kay jiŋiliŋŋa.

⁹Dukanna ŋray ca hiɗi buɗugoora, ki goora vi dukga nala. Nam zaw goyni, nam ka colay ŋor gulmunna vaya, nam ka sar ir-ziyda, iram ka wile'e jar salyana.

¹⁰Dukanna sli ditiya di tan ala: Fokag kulo'o bananta, naymani, nagaya.

¹¹Kay ɗuwagu menda kalawa, niy ma sin vatawa, niy ma sin kalawa.

¹²Sle ma hay nagatna tun caw ɓo'o, liyn ma gi nulla coowa, nay ka hum della vi gukŋa hay nagata vaya.

¹³Vuɗna ma jewna vi tulumna tun caw tuna, gulda-guldana ma ɓona tun caw his faya. Fokag kulo'o bananta, naymani, nagaya.

¹⁴Guk-gabayta vanu, ta ka col hay zul hiɗiyna, ta ŋayay jar jomgona vi hiɗiyna, hinan ɗuwag vok iragu, hinan humag delagu. Kay delag lumaɗi, irag do birek-bireke kaw.

¹⁵Nigi ma yawma cekemna, guro-cekemna ma ka ɓulak gulda-guldana, kay gulda-guldana vuma ka ɓo'o.

¹⁶Dukanna nam man nanu, nan malam namu kaw; nam ŋom farayna valamu jar tayna,

¹⁷jew a simeɗ ma graw culumta biwa, jew a ɗuŋusna pir jaŋi, hotaŋiya. dukanna, naŋ ma li ŋray ca ki buɗugoora nala, hiɗi goora vi dukga kulo kay hiɗiy ma jaram jay goyna nala.