Read Masana NUL MA SUW NULLA 4 Bible Online

NUL MA SUW NULLA 4 - Masana bible

NUL MA SUW NULLA 4

¹Nak hayɗin jifiya, bananta nak hayɗin jifiya, irag ki gukka nala, kalaf dig sligar ma kusuɓi kagŋa. Duŋusag ki ɗuŋus farana vi fok-meena kulo kay hiɗiyna nala.

²Siyagu ki siy fok-dimina ma may hay goloŋŋa pa, hay li ma nisi cawam ɗuŋusam goyo nala, ɓosiyom-tuwamna ka kafe, ɦu ma getay may jaramɗi.

³Vunag ma goy jiyna ki baraw ma slawna nala, vunag ma dina jibete. Geliyag ki gal grenadinna nala kalaf, hay dig sligar ma baray kagŋa,

⁴dekdelagu ki simdira vi David nala, iniya kay cuk sle-ma-duura haya; maray ma duura birimi ka cuki hayamu, kuroŋŋa vi sum sa donon kaf.

⁵Miira vag ma ma'na ki gurona vi buɗugoota ma', ma ka ti hatna jar tayna nala.

⁶Jew a simeɗ ma graw culumta tun caw biwa, jew a ɗuŋus-guna pir jaŋi, nan ma tuɗ tam hiɗiyna vi urdina miir, tam jiŋiliŋŋa vi urdi ma no'osna.

⁷Nak jifiy ŋolo, bananta, va ma joo'o may tag noŋɗi.

⁸Tuɗag ay hiɗi nanu goy hay Libaŋ pa, bananta, tuɗag ay hiɗi nanu goy hay Libaŋ pa, ɗuwag kulo kay sin-hiɗiyta Amana, kulo kay sin hiɗiyta Senir hiɗi Hermon, liyn ma zlon mol gaa haya, hiɗiyna vi zinilla.

⁹Nak sleɗan hayanawa, ɓasunta, bananta, nak sleɗan hayanawa hiɗi irag ma ɗuwan sem na kepna, hiɗi dif ma giy dekdelag kep na waŋŋa.

¹⁰Nak jifiya hay lumaɗa vagu, ɓasunta, bananta, lumaɗa vagu suw vinna, urdina vagu hista valamu suw aromatna.

¹¹Yumda ka tol gaa'a hay vunagu, bananta; yumda hiɗi miira ka hay vunagu, hista vi sligara vagu ŋray ca hiɗi hista vi Libaŋ.

¹²Nak ki jardeŋŋa ma vunam dukina nala, ɓasunta, bananta, nak ki kaara ma vunam duki nala, ki niy-ma-riŋŋa ma vunam dukiya nala.

¹³Niy goloŋŋa vagu riŋ kuɗ gu-grenadinna ma vuɗna valam jibete, hiɗi goroŋgona,[3] hiɗi urdina nard.

¹⁴Urdina nard hiɗi safranna, usna ma his faya, hiɗi sinamomna. hiɗi gun kaf ma no'osna valam his fayna; urdina miir hiɗi alowes hiɗi aromatna ma ŋaana kafe.

¹⁵Na' ki niy-ma-riŋ goy hay jardeŋŋa, kaata vi niy-ma-irina, na'a ki goloŋŋa vi Libaŋ.

¹⁶Fokaŋay kulo'o, simeɗ ma Libaŋŋa, naŋaya, simeɗ ma gal kayamna, biwaŋ kay jardeŋŋa vanu, kay hista valamu ma biyays goyo. Hin dukanna kal ay kulo hay jardeŋŋa valamu, hinim ti vuɗna vi jardeŋŋa ma jibetna.