Read Masana NUL MA SUW NULLA 5 Bible Online

NUL MA SUW NULLA 5 - Masana bible

NUL MA SUW NULLA 5

¹Nan kali hay jardeŋŋa vanu, ɓasunta, bananta; nan ja hum miir hiɗi aromatna vanu, nan ti yumda vanu hiɗi soora va'a, nan ci vinna vanu hiɗi miira vanu. Tigiya, boniyonna, cigiya, ɦoygi hiɗi darta.

²Nan ay buri sene, may dikan ka iri tuwa. Della vi dukanna ka yi ala: Malan vun-ziyn goyo, ɓasunta, bananta, gukka van ta jifiyta vanu. Kay yan ŋuruɓi kay maɗayna, kay ɗuŋusan ŋuruɓi kay maɗay ma henjetna.

³Nan pat sligar-tuwna vanawa goyo; nan hot cukum ɗawn nana loge? Nan muz senawa goyo; nan hot gesem ɗawn nana loge?

⁴Bananna kal ɓalamiyawa hay baŋana, dikan tun caw van bat-bat' kuɗum namu.

⁵Nan fokawa kulo yo kay mal vun-ziyd goy mi dukanna, urdina miir ka giy roso hay ɓanu, urdina ma hay cita-ɓanu jaŋ gaa kay cokoromna vi vun-ziyda.

⁶Nan mal vun-ziyd goyo mi dukanna, may dukanna muɗ ŋoromawa, nam capawa. Hay li ma nam ka law tanu, sukka van tay hayanɗi. Nan garamu, nan may fumɗi, nan yumu, nam may hotan ditɗi.

⁷Sa ŋomda sa ŋuy hoyok-ziyna ŋaf hiɗi nanu; nisi tonu, nisi kaan tuwan goy mili, nisi yaw mantilla van goy kanu.[4]

⁸Nan jobgiya, guro-boyna vi Yerusalem, la nigi fi dukanna, nigi ma dum talam mige? Nigi ma dum ala nan liy moyo kay darta.

⁹Dukagŋa va ma nam suw segen hiɗi namu mi mige? Nak ta jifiyag suw boyn kafta, dukagŋa va ma nam suw segen hiɗi namu mige, a nak jobma ki kayn nala?

¹⁰Dukanna haɓi, slaw keŋ' kaw; nam ɗek tuwam goy jar sum sa birim doogona.

¹¹Yalam ki or ma bay-rigasna nala, ɗuŋus ma kalamna ka dola, wura'a ki gaw-gawna nala.

¹²Iramu ki ir gukka nala, goboy kat niy ma vidikŋa, muz tuwam hiɗi miira tun suk gaa jar asta.

¹³Girekŋa valamu ŋray ca ki aromatna ma piy yam tuwamu nala, ki tikisina vi ɓona ma his fayna nala, vunamu, geliyamu ŋray ca ki tayna ma urdina miir tol gaa talamu nala.

¹⁴Balamu ki jaɓna ma ora ma koti hiɗi hiɗiyn krisolit; tuwam ki siy-slokŋa ma tuwam goriya, hiɗiyn safir kori talamu nala;

¹⁵Gayamu ki dolla vi hiɗiy ma haɓna ma ini kulo kay ora ma bay rigasna nala. Tuwam noŋ kaf sli Libaŋ nala, nam ir valamu ki gu-gamna nala.

¹⁶Vunamu lumaɗ ŋolo, tuwam noŋ kaf san as daramu. Dukanna nam ki kayn nala, bananna nam ki kayn nala, guro-boyna vi Yerusalem.