Read Masana NUL MA SUW NULLA 6 Bible Online

NUL MA SUW NULLA 6 - Masana bible

NUL MA SUW NULLA 6

¹Dukagŋa kali arige, nak ta jifiyta vag suw boyn kafta? Dukagŋa kal iram gal arige? Hinma garam hiɗi nak kuɗ tuwaya tige?

²Dukanna kali hay jardeŋŋa valamu, hay liy ma aromatna piy hayna, kay ŋom farayna valamu hay jardeŋŋa, kay ja hum tayna.

³Nanu vi dukanna, dukanna nam vanu; nam ŋom farayna valamu jar tayna.

⁴Nak jifiya, bananta, ki Tirsa nala, jifiy ŋolo ki Yerusalem nala. ɦuyumda kuɗag ŋolo ki vok-ma-duura ka ganay bugol drapota kay duura nala.

⁵Muɗag irag goy kiran muɗge, kay nam ton sutiyanu. Ɗuŋus ma kagŋa ki farana vi ɗuŋus fok-dimina ma jikay gaa hay Galaad pa nala.

⁶Siyagu ki siy farana vi fok-dimina ma may goloŋ ci niyn pa nala, ɓosiyom tuwamna ka kafe, ɦu ma getay may jaramɗi.

⁷Geliyagu ki gal grenadinna nala, kalaf dig sligar ma kusuɓi kagŋa.

⁸Boyon sa muliyana dok-karkiya, boy sa sunda dok-glafandi, guro sa boyna may ŋaɓɗi.

⁹Gukka van ira'ta tayɗi, ta jifiyta vanu, na' kuɗ su' va' kepe, na'a ti ta wile suw kaf vok ir su' ta vuɗa'ta. Guro-boyn irsi cuk ka' kayni, nisi di ta' ala sle'ta kagu, boy sa muliyana hiɗi boy sa sunda kaw, nisi subura'a.

¹⁰Na' ta vul tuwa' goyo, ki liyn ma cal goy ŋarpita nala kayn ti tarige? Jifiya ki tilla nala, wile'e ki fatta nala, may ɦuyumda kuɗa' ŋolo ki vok-ma-duura ka ganay bugol drapota kay duura nala?

¹¹Nan kali hay sinena vi coɗonna kay ɗuw coɗonna ma ka wula hay lokŋa, kay ɗuwa la gulda-guldana ka ɓo'o, la gu-grenadinna ka ɓo'o.

¹²Nan may wiɗi, may darta vanu muɗan ŋiray ca ki kekena vi sumuna vanu sa asayna nala.