Read Masana NUL MA SUW NULLA 8 Bible Online

NUL MA SUW NULLA 8 - Masana bible

NUL MA SUW NULLA 8

¹He! Lali naŋ mi ɓasunu klasige! La li wulaŋ mi miir sunu klasige! Nan ɗawn ma ŋafaŋ iraŋ goy jiya, nan ɗawn ma bowoŋ kip', sa ma as panan kuɗ kayni mayɗi.

²Nan ɗawn ma tun vokaŋu, nan ma kalaŋ kalaf hay ziyda vi sunu; naŋ ɗawn ma hatanu, nan ɗawn ma vulaŋ vin ma his fayna, vin ma jibetna ma kotom hiɗi grenadinna.

³Hin ɓalam ta gulda tuni kuɗ yanu, hin ɓalam ta jufta sawan tuwanu may.

⁴Nan di tigiya, guro-boyna vi Yerusalem, geɗgi dartaɗi, zliygi darta kulo'o jew minda va'ɗi.

⁵Na' ta ka tuɗ hay fulda gaɓay tam duka'na kilan ti gige? Nan zliyaŋawa kulo'o kuɗ gu-pomna, hay liy ma suŋ sli haya hiɗi naŋu, hay liy ma na' ta vuɗaŋga sli haya hiɗi naŋu.

⁶Naŋ ma tunan hay dikaŋu ki soona nala, naŋ ma tunan hay gilaŋaŋu ki soona nala; kay darta na' dono'o ki mitta nala, hunayta na' lop ŋolo ki zulla vi mitta nala, kuta va' vidik ŋolo, kayni ti kuta vi Ma-Vatɗina.

⁷La niyn ŋol kaw nam as tew dartaɗi, niy-lumna as ɗuɓ darta gaaɗi; la san vul slena valam ma hay ziyna valamna goy kaf, kay muɗum hiɗi darta kaw, sumun panam paniya.

⁸Basuma'ta ta goot ka kep, miir ma diga'na bay day tuwa; hay buur ma sumun tun caw law kay ɓasuma'ta ɗawni, numa ma la' linige?

⁹Lali na' mi gulmunu, numa in ziy ma doorona kulo ka'a, lali na' mi vun-ziya, cokorom ma numa cum vuna'na ɗawni, ceɗayn mi gu-gamna.

¹⁰Nanu ti gulmunu, miiranu ki simdira nala, nan vok ira'a ki na'a ta fi toyta nala.

¹¹Salomon ka hiɗi sine gulda-guldana hay Baal-Hamon; nam vul gulda-guldana hay ɓam sa ŋomda, gigekaw mar gurjuta ir sikel* birim kep kep, kuɗ vuɗna vi gulda-guldana.

¹²Sine gulda-guldana vanu, nam ka vok iranu, maŋ naŋu Salomon, sikel ma birim kepna, sikel kis ma' mi nisi sa ŋom vuɗna vi gulda-guldana.

¹³Nak ta li ziy hay jardeŋŋa, boniyogŋa humsi jaki tam delagu. Hinan humag delagu.

¹⁴Piraŋ jaŋi dukanna, laŋ tuwaŋ ki buɗugoora lebo goora vi dukga nala, kulo kay hiɗiyna vi Aromatna.