Read Masana ESAYA 1 Bible Online

ESAYA 1 - Masana bible

ESAYA 1

¹Slen ma Esaya goora vi Amos wi vokomu kay Yuda hiɗi Yerusalem, hay liyna vi Oziyas, Yotam, Ahaz hiɗi Ezekiyas muliyana vi Yuda.

²Dukalawna, humaŋu, nagata, jakag humagu, kay Ma-Vatɗina ka ɓaka. Nan vul tin mi gurona, nan wulsiyawa kulo'o kaw, may nisi yaw kulo katanu.

³Putna wi mulamna, kuron wi jokŋa vi mulamna kaw; may sa Israyel hayɗin wi va noŋɗi, sumuna vanu min humɗi.

⁴Joot kay jaf-sum sa sulukŋa, hiɗi sum sa hobi hiɗi ci-matta, joot kay jaf-sum sa li jiw-zlata, joot kay sum sa muɗi liwisna! Kay nisi noy Ma-Vatɗina goyo, ma Peldetna vi Israyel muɗawa kirsi bisi, nisi hot tuwsiyawa goy bugolo.

⁵Wulini nan watgi ɗawni hay galgi marige? Kay jiw-zlata vigiya jorawa voko. Yigi kaf kaay goy mili, dikgi kaf ka ci lasi.

⁶Gaa segi pa ta-ta kulo kigi dab', va ma hini ŋaa'a may loɗi; tuwgi ma kaay goy milla, vun libetna hiɗi mil ŋayakŋa kaf sa may junum vunamɗi, muzum vunam goyɗi, li va vunamɗi, ɦok mul vunamɗi kaw.

⁷Nagata vigi hini goyo, hoyok-ziyna vigi ŋalay kay kuta, sum sa pulla ka ti nagata vigi vok irgiya. Nagat hini goy ɦawa'a, ki ɦo-gaata ta sum sa pulla mara' kigiya nala.

⁸Goota vi Siyon muɗi ki ziy-coora goy jar sine gulda-guldana nala, ki guɗukŋa viy jar sinena vi kurdina nala, ki hoyok-ziy ma sumun may tom gaaɗi nala.

⁹Lali Ma-Vatɗina hinay caw sum segen hiniɗi, nay muɗ ɗawn ki Sodoma nala, nay li ɗawn ki Gomora nala.

¹⁰Humgi yoboyna vi Ma-Vatɗina, nigi sa ŋulona vi Sodoma, jakgi humgi tam gatta vi Lawna vaya, nigi sum sa hay Gomora.

¹¹Ɗifinna vigi ma dak-dakŋa nan as lum hiɗi nam mi mige? Din mi Ma-Vatɗina. Nan asay hiɗi ɗifin ma ŋal-goyna vi fok-gamalana vigiya, hiɗi mula vi guro-luwayna; busuwna vi luway-gujuna, guro fok-dimina hiɗi busuwna vi fok-ŋekŋa may kiran ŋaa'a loɗi.

¹²Sa ma vulgi hagat kay nigi co vok-iranu kay tay wur-daŋŋa van gaa'a kayn mi gige?

¹³Vulda ta goy waata nigi ma mara' vok iran loɗi, urdi ma hisna nam kiran bisi; til ma wulina vigiya, sabatna vigiya hiɗi tokŋa vigiya, iran min wi yuldeta vigiya ta rigasay hiɗi jiw-zlata vigit noŋɗi.

¹⁴Nan ka gawi hiɗi til ma wulina vigiya hiɗi yuldena vigiya, nam can neke, nan as kay ziyim loɗi.

¹⁵Hay li ma nigi meɗ ɓigi goyo, nan muɗ iran goy kigiya; la nigi li siɗawt ŋol kaw, nan as kay humgiɗi, kay ɓigi hobi hiɗi busuwna.

¹⁶Muzgi tuwgi goyo, porgi tuwgiya, lopna vigi ma joona nigi ma yawam goy vok iranu. Joota ta nigi la'ta nigi ma hina' goyo.

¹⁷Hatgi kay li ŋaata, gargi ɗigerta, sa ma vun curo'da nigi ma hotomay hay hagata ŋaata, ligi ɗigerta tam sa ma kuyuna, gutgi kuɗ cata duhulta.

¹⁸Nigiyaya tiyay tuwaya, din mi Ma-Vatɗina. La sulukŋa vigi ka slaw keŋe, nam ma muɗ haɓ tal-tal'; la nam slawi ki sligar ma slawn nala kaw, nam ma muɗ haɓi ki ɗuŋus miris ma haɓna nala.

¹⁹La nigi vilekawa kay hot yigi gaa'a, nigi ma ti vuɗ ma ŋaana vi nagata;

²⁰may la nigi minɗi, la nigi muɗ ŋel gatta, kew-gaferaŋa ma calgi goyo, kay vun Ma-Vatɗina daawa goyo.

²¹Mige lo! Hoyok-ziy ma ɗigera muɗi mi liyn ma viyuwna, hoyok-ziy namna ay hobay hiɗi ɗigerta, gasita ay musi haya, may wulini nam hobay hiɗi sa ci matna.

²²Gurjuta vigi muɗi goy suɗoy-kawaya, vinna vigi rigasay hiɗi niyna.

²³Sa ŋulona vagu muɗi ŋel gatta, vunsi ŋray hiɗi sa kuliyana, nisi kaf min gurjuta, nisi jaŋ kuɗ wurakŋa, nisi may gut kuɗ sa ma kuyunɗi; diksi may tisi kay cata-duhultaɗi.

²⁴Kuɗ na'ta kayni, Bum-Sumuna, Ma-Vatɗina vi vok-ma-duura, ma donona vi Israyel ka di ala: Haha! Nan min sleɗ hayan tam sa gawt kanna, nan min job yan tam sa gawt kanna.

²⁵Nan ma meɗ ɓan goy kay Yerusalem sem mara lo, nan ma yor wayna va'a hay zulla, ki yorom hiɗi potasna nala,[1] plomna ma hini haya'na nan ma yawam goy kafe.

²⁶Sa ka kitata visiya nan ma hotsiyaya, ki nisi ka jew ɓa-ɓa nala, sa vul gatta va'a nan ma hotsiyaya, ki nisi ay hay tun-cawt nala. Bugol kayni nisi ma yag ala hoyok-ziyna vi gasita, hoyok-ziy ma ɗigera.

²⁷Siyon ma butis goyo hay li ma na' li ɗigerta, hiɗi nisi sa min ham goyo kuɗ gasita.

²⁸May nisi sa ŋel gatta hiɗi sa sulukŋa kaf, ɓulakka ma co kisiya, nisi sa noy Ma-Vatɗina goyna nisi ma ba goyo.

²⁹Ki kayn nala sumun ma li zulo'o kay terebintena, ma nigi minim ŋolla,[2] nigi ma muɗ zulo'o kay jardeŋŋa vigiya ma nigi vilekemna;

³⁰nala nigi ma muɗ ki terebintena* ma humam yakay goyna nala, ki jardeŋ ma niy may kuɗumɗina nala.

³¹Sa ma donona ma muɗ ki baraw ma tufna nala, lopna valam ma muɗ ki kut ta yak kulota nala. Nam ma' pet ma ŋal goyo, sa ma as telem mayɗi.