Read Masana ESAYA 10 Bible Online

ESAYA 10 - Masana bible

ESAYA 10

¹Joot kay nisi sa vul gat ma slugutina, joot kay sa wi-ɗota sa ɗo gat ma bay-gasina,

²vok kitata nisi hin gasita vi sum sa hawn goyo, lawta hay liya'ta vi sum sa maŋayna vanu nisi hina' ɦawa'a, nisi ti slen kay boy sa duhulla, nisi vurum sum sa kuyuna kaw.

³Hay li ma buura vi kitat coowa, nigi ma li linige? Hay li ma ɓulakka coyawa goy gine pa, nigi ma yaw jaŋi kay ŋay tam gige? Nigi ma ŋay farayna vigi arige?

⁴Hini kayni kay nigi ma guɗof gaa jar sum sa daŋgayna, lebo kay cuk gaa hiɗi sa mitina. May hiɗi kayni kaf ɦiyda may vat goyɗi, ɓalam ka goy meɗay dok-doko.

⁵Joot kay sum sa Asiriyana, libetna vi ɦiyda vanu, zugul ma ka hay ɓisina kayni mi zugul ma nan min job yan hiɗi namna.

⁶Nan min cuksi kat jaf-sum sa waana, nan min gisi irsi kat jaf-sum sa ɓulakan dikanu, kay nisi ma ti slen ɓuraŋi, vurum slena kaw, kay nisi ma taysi gaa sesiya ki torɓok ma hay hagan nala.

⁷May sum sa Asiriyan may varay kay li naɗi, diksi may tuni kay li naɗi, kay diksi tuni kayni kay ɓulak-goyta tuta, nisi min kayn kay cim sum sa ŋol hini-hinin goyo tuta.

⁸Kay nisi di'e: sa yerimana vuma'a say si muliyan kay tuwsiɗi su?

⁹Numa li tam Kalno ki numa li tam Karkemis nala kaw ɗisu? Numa li tam Hamat ki numa li tam Arpad nala kaw ɗisu? Lebo numa li tam Samariya ki numa li tam Damas nala kaw ɗisu?

¹⁰Ki ɓan coowa ta-ta tam muliyana vi lawayn ma waana, sa slena visi ma ceɗayna suw ma hay Yerusalem hiɗi ma hay Samariya,

¹¹slen ma nan lum tam Samariya hiɗi lawayn ma waana visiya, nan as lum tam Yerusalem hiɗi slena visi ma sli tuw san nalana ɗisu?

¹²May, hay li ma Bum-Sumuna hob vun lopna valamawa kat hiɗiyta vi Siyon hiɗi Yerusalem kafe, nan ma ka kitat kay lopna vi mulla vi Asiriya kuɗ suburta vi dikamu, kuɗ jigal-tuwta valamu

¹³Kay nam di ala: Slen kayni nan lum hiɗi donota vi ɓanu, nan wi slen ŋol kayn kuɗ yalda vanu. Nan muɗ jar nagana vi sumuna, nan yaw farayna visi goy kisiya, lo ki sa ma donon nala, sa lakay kulo kay mulda nan jiksi gaa'a.

¹⁴Ɓan tunawa tam farayna vi sumuna, ki ɓam sumun tun tam tokosayna vi layna nala, ki san yaw sena ma hini goyna nala, nan yaw naganawa kafe, sa ma as poŋ glaŋam kulo mayɗi, sa ma mal vunam goy mayɗi, sa ma as pat winek mayɗi kaw.

¹⁵Ceɗna as kay subur tuwam tam sa ma li lop hiɗi namna su? Siina as muɗ ɦiy tam sa ma li lop hiɗi namna su? Libetna as geɗ sa ma slum kulona su? Zugulda as sli va ma may gunaɗin kulo su?

¹⁶Kuɗ na'ta kayni, Bum-Sumuna Ma-Vatɗina vi vok-ma-duura ma gi ŋokŋa ay jar sum sa ɗorayna, kut ma do jar gurona vi mulda ki kuta ta zak nala.

¹⁷Haraŋa vi Israyel ma muɗ ki kuta nala, ma peldetna valamu ma muɗ ki sin-kuta nala, na' ma ŋal gu-zigiyna hiɗi olla goyo hay buur kep ɦawa;

¹⁸gajijita vi juruna visiya hiɗi gu ma vuɗna na' ma ŋalam goy kafe, ŋray ca ki sa ma moyn ka zo'otomu nala.

¹⁹Gu ma hay fulda vi Asiriya ma hin kiɗaya, goorgoor kaw as ŋaɓam goyo.

²⁰Van ma li nala, hay buur namna ɗawni, caw Israyel ma hin goyna, hiɗi sa suɗ goy kuɗ jafna vi Yakubna ma tun vida kay sum sa cisi goyna loɗi, nisi ma tun vida ɗawni kay Ma-Vatɗina, ma peldetna vi Israyel.

²¹Cawsi ma hinina ma hotiya, caw sumuna vi Yakub ma hin goyna ma hotay tam Lawn ma Gaŋeraŋa.

²²Nigi sa Israyella, la sumuna vigi ŋol dak-dak ki ŋesl ma goloŋ kel niy-lum ma ŋolla nala kaw, ma hotay ɗawn mi cawsi ɦawa'a, kay hagata vuli vul kay ci-goyta, na' ma kulfut ɗigerta goyo.

²³Kay hagata ta vuli vul kay ci-goyta kayni, Bum-Sumuna, Ma-Vatɗina vi vok-ma-duura hoba' vuna'awa hay nagata Israyel kafe.

²⁴Kay na'ta Bum-Sumuna Ma-Vatɗina vi vok-ma-duura ka di ala: Humgiya, nigi sumuna vanu sa ka li ziy hay Siyon, ligi nar kay sum sa Asiriyanɗi, nisi cigi hiɗi zugulla, nisi poŋ libetna visi kulo kisiya, ki sum sa Egipten ay li nala.

²⁵May hini neeɗa ɦawa, purcakka vanu ma vat goyo, ɦiyda vanu ma muɗ ti ɓulak-goyta visiya.

²⁶Bum-Sumuna vi vok-ma-duura ma geɗ libetn kulo kisiya, ki sum sa Madiyan fi ci-goyta tam hiɗiyta vi Horeb nala, nam ma poŋ zugulla valam kulo'o kay niy-lumna, ki nam li kat Egipte nala.

²⁷Hay buur namna ɗawni, jakŋa valam ma nam tunum kigi nekŋa, nam ma slum goyo, nam ma sli jukŋa valam goy pelgiya; mul-sliwna ma kus jukŋ goyo.

²⁸Nam ma co hay Ayat, jik hay Migron, hin jakŋa valamu hay Mikmas.

²⁹Nisi cap hiɗi gufutna, liyna vuma tuni hay Geba, Rama ka wira, sum sa hay Gibeya vi Sawul mun jaŋi.

³⁰Tiygi hiɗi zimiyna, guro-boyna vi Gallim, ligi ŋali, nigi sum sa hay Layis. Be'da kigiya, nigi sum sa hay Anatotna.

³¹Sum sa hay Madmena meray goyo, sum sa hay Gebim gar liy ma ŋayna.

³²Vaydi nam vi yalam hay Nob, hiɗi ɓalamu nam geɗ hiɗiyta vi goota vi Siyon, nam geɗ hiɗiyta vi Yerusalem.

³³Ɗuwgi Bum-Sumuna Ma-Vatɗina vi vok-ma-duura tige, nam ka kus gu-gomon goy hiɗi dono'o, gu-gomo ma wuli kulo fiyokŋa yalam poŋ goyo, ma kulo fiyok suwna yaki gaa'a.

³⁴hiɗi kawayna nam ka juru ma ɦisikŋa gaa'a, gu-gamna ma donona vi Libaŋ yak goy gaa'a.