Read Masana ESAYA 13 Bible Online

ESAYA 13 - Masana bible

ESAYA 13

¹Slen ma Esaya goora vi Amos wi vokomu, ma law joo'o kay Babilon.

²Kulo kay hiɗiyta ta ya' goy ɦawata, pigi bay-bayna, patgi delgi kulo katsiya, wulakgi ɓigiya, hinsi jik hay vun-galana vi sum sa hay jaf-mulda.

³Nan vul hagatawa tam nisi sa nan cuksina, sa donona vanu nan cuksiyawa kaw kay sleɗ ɦiyda van gaa'a, nisi sa li firiya kay kolda vanu.

⁴Ciriyna vi sumun kulo kay hiɗiyna, ŋray ca hiɗi sum sa ŋol dak-daki; Ciriy ma giji-gijina vi nagana vi jaf-sumun tapay ŋolo, Ma-Vatɗina vi vok-ma-duura ka sor sojena valamu vun duura.

⁵Nisi may hay nagata ta goy gine pa, goy sin naga hena pa, Ma-Vatɗina hiɗi zugulla vi ɦiyda valamu ma vul zumalda tam nagat kafe.

⁶Yorgi tuwgiya, kay buura vi Ma-Vatɗin ka goboyo, nam ka co'o ki ma Gaŋeraŋ-Petna ka ti ɓuraŋi nala.

⁷Kuɗ na'ta ɓam sumun kaf ma maŋ goyo, sumun kaf donosi vatiya.

⁸Narta bowsiyawa, sutay ma tona hiɗi tuw-tita visiyawa; nisi ka tiy tuwsi ki cata ta min puk nala; nisi sar tuwsi jar-tuwsi hiɗi ɦuyumda; irsi kulo sliy kuwa.

⁹Ɗuwgi buura vi Ma-Vatɗin ka co'o, buura vi mitta, buura vi purcakka hiɗi ɦiyda ŋolda, yam nagata ma hin goy ɦawa'a, sa sulukŋa ma vat goyo.

¹⁰Kay mislek ma dukalawna hiɗi mislek gurayna ma vul haraŋa valam loɗi, fatta ma muɗ jufunu hay dayta va' pa, tilla ma vul haraŋa valam loɗi.

¹¹Nan ma ka kitat kay nagata kuɗ joota va'a, nan ma ka kitat kay sa joona kuɗ raw-goyta visiya; nan ma vat subur-tuwta vi sa tiy sesina, nan ma vat jigal-tuwta vi sa las sumuna.

¹²Nan ma kiɗa sumun goyo suw or ma bay-rigasna, nan ma kiɗa sumun goyo suw or ma hay Ofir.

¹³Kuɗ kayni nan ma geɗ dukalawna, sem nagat ma tuni gaana ma geɗa, kuɗ ɦiyda vi Bum-Sumuna vi vok-ma-duura, kuɗ buura vi purcakka valam ta ŋolda.

¹⁴Ki dukga ta san ka digiɗa' nala, ki ɦuta sa may kuɗa' ŋoma'ɗi nala, gigekaw ma muɗ iram kir sumuna valamu, gigekaw ma pir hay nagata valamu valamu may.

¹⁵Nisi kaf sa sumun fisiyawa, kewn ma jiksiya, nisi kaf sa sumun yawsiyawa, kew-gaferaŋ ma calsi goyo.

¹⁶Gurona visi sa vuɗi wulina sumun ma cuksi goy gaa kay nagata vok irsiya, ziyna visi ma ŋalis goyo, sumun ma bur hiɗi boyna visi dono'o.

¹⁷Fuma tuwma'awa, nan min gi ir sum sa Meden katsiya, sum sa may var kay gurjutɗi, sum sa darta vi or may haysiɗina.

¹⁸Ɓarawta visiya ma cuk sum sa joriyon gaa kay nagata, nisi ma wi haw sum sa boyn vuɗsinɗi, gurona ma li kirsi haw noŋɗi.

¹⁹Babilon, ta jifiyta vi muliyana, ganta ta sleɗ hay sum sa Kaldeena, ma muɗ ki Sodoma hiɗi Gomora ma Lawn tom gaa'a nala.

²⁰Sa ma li ziy haya' noŋ loɗi, sumun as tok tuwsi haya' noŋ loɗi, tam jafsi voksiya. Sa ma Arabna ma pi guɗukŋa valam kulo haya'ɗi, sum sa ŋom farayna ma vi girlawna mi farayna visi haya' loɗi.

²¹May sle ma hay fulda ma lak ziy hay baŋal girlawna visiya, ɦuuna ma hob ziyna visiya, rigetna ma hob haya, fok-ŋekŋa ma liw haya,

²²Muur ma fulla ma ŋurnay hay ziyna visiya, cekemna ma lak kulo hay ziyna visi ma ŋaana. Liyna visi goboy a co'o, buura ma ɦur vokomɗi.