Read Masana ESAYA 14 Bible Online

ESAYA 14 - Masana bible

ESAYA 14

¹Kay Ma-Vatɗina ma li slugot kay jafna vi Yakub lo, nam ma hot vilek Israyel lo, nam ma hot tunsi hay nagata visiya; sum sa pulla ma tap tuwsi tisiya, nisi ma tap tuwsi hay ziyna vi Yakub.

²Sumun ma yawsiya, ma narsi hay nagata visiya, ziyna vi Israyel ma visi voco'o hay nagata vi Ma-Vatɗina, ki sa sunda sa jufayna hiɗi sa boyna nala, sum sa yawsi gorvona nisi ma yawsi gorvo'o, nisi ma vurna baŋal sum sa ti mulda kisina.

³Ki kayn nala, hay buur ma Ma-Vatɗin vulgi tun-sukkawa, bugol makka vigiya hiɗi hiwirta vigiya, bugol gorvota ta galakka ta nisi tuna' kigiya,

⁴Hay na'ta nigi ma law joo kat mulla vi Babilon, nigi ma di ala: Meloge! Sa ma curoɗ sumuna may loɗi, lasta vatawa.

⁵Ma-Vatɗina kus libetna vi sa joonawa goyo, sa ti mulda nam kus zugulda visiyawa goyo.

⁶Namu ma hay purcakka valamu ay ci sumuna, nam may mak kay citaɗi, namu ma hay ɦiyda valamu ka kol kay jaf-sumuna, ka digiɗsi bay kir-hawta.

⁷Wulini nagat kaf tuni hay sle'ta hiɗi kiliŋga, sumun ka gi nul ma firina.

⁸Gu-siprena kaw, hiɗi gu-gamna ka firi kuɗaŋu, hay buur ma naŋ nig gaana pa, sa may co ka gu namna gaa loɗi.

⁹Liyna vi sa mitina ka ciriy ta-ta gaa zulu, kay vaŋ hiɗi firita hay cota vaŋu, nam zliy sa mitina kulo kaŋu, sum sa ŋom nagata kafe, muliyana vi jaf-sumun kaf nam foksi kulo'o, hay zlamda-mulda visi pa.

¹⁰Nisi kaf sli dita kay di taŋ ala: Naŋ kaw, naŋ muɗi bay dono'o ki numa nala, naŋ muɗi ŋray ca ki numa nala.

¹¹Firita vaŋu nigawa gaa hay liyna vi sa mitina, hiɗi del dilla vaŋu, jufulla ka moli gaa kuɗaŋu, jufulla muɗi mi sligar ma naŋ baram kaŋŋa.

¹²Meloge! Naŋ nigawa gaa hay wuralawn pa, mislek ma wilena, goora vi ŋarpita, naŋ pukawa gaa kay nagata, naŋu ma kol kay jaf-sumuna.

¹³Naŋ ay di hay dikaŋ ala: nan ma jik ta-ta kulo'o hay wuralawna, nan ma tun zlamda-mulda vanu kulo bugol mislekŋa vi Lawna, nan ma mus kulo kay hiɗiyta ta fi-tuwna vi Lawna, hay gal ma gaa ginena;

¹⁴nan ma jik kulo kay yam ɗugulla, nan ma li ŋray ca hiɗi ma Kulo-Jamna.

¹⁵May wulini naŋ zuti gaa hay liyna vi sa mitina, hay zul ma gaa wiŋŋa.

¹⁶Nisi sa waŋu cuk irsi kiraŋu, nisi saraŋ ŋiresl, zawni mi sa ma ay wir nagatna su? Zawni mi sa ma ay jiriy muliyana su?

¹⁷Sa ma ay hin yam nagat goy fulu, sa ma ay to hoyok-ziyna va' gaa'a, sa ma min hin sa daŋgayn noŋɗina zawni mi nam su?

¹⁸Awa, muliyana vi jaf-sumun kaf buri gaa'a hiɗi gajijita visiya, gigekaw hay ziyna valamu valamu.

¹⁹May naŋu, naŋ giy goy gine'e hiɗi zulda vaŋu, ki ɓam gu ma liwisna nala, ki sum sa fi cita hiɗi kew-gaferaŋa nala, ki sa zuti gaa hay zul hiɗiyna nala, ki tuw sa ma mitina ma zuti goyna nala.

²⁰Naŋ may piy hiɗi nisiya hay zullaɗi, kay naŋ ɓulak nagata vaŋ goyo, naŋ ci sumuna vaŋ goyo, jafna vi sum sa joona sa as ŋaɓsi noŋɗi.

²¹Kotgi hagata kay ci guron goyo, kuɗ joota vi sumaysiya, hinsi hot yaw kulo'o kay ti nagat loɗi, hinsi hob nagat hiɗi gawt loɗi.

²²Nan ma fok kulo katsiya, din mi Ma-Vatɗina vi vok-ma-duura, semda vi cawsi ma hinina vi Babilon nan min kaam goyo, gurona visiya hiɗi jafna visiya, din mi Ma-Vatɗina.

²³Nan ma muɗum mi liyn ma lakka vi cem-cemna hiɗi goloŋŋa, nan ma toksi goyo hiɗi sumatna vi ɓulak-goyta, din mi Ma-Vatɗina vi vok-ma-duura.

²⁴Bum-Sumuna vi vok-ma-duura yi va kalam ala: Awa, van ma li'e ki nan vari nala, va ma nan di kalamna ma li'e:

²⁵Nan ma ci sa ma Asiriyana hay nagata vanu, nan ma tayam gaa kay hiɗiyta vanu; juk ma kelemna ma sliys goyo, jak ma nam tunum pelsina ma yawis goyo.

²⁶Kayni mi va ma nan dum tam nagat kafna, kayni mi ɓan ma meɗay goy kay jaf-sumun kafna.

²⁷Ma-Vatɗina vi vok-ma-duura col dita valamawa, sa ma as kusa'a mi gige? Ɓalam goy meɗiya, sa ma as hota' kulo'o mi gige?

²⁸Hay busata vi mitta vi mulla Ahaz, lawta joota kayni diya kat sa Filistina.

²⁹Nak Filistiya noŋ kaf, nak ma li firiɗi, firi ala zugul ma cak hiɗi namna kusawa goyoɗi. Kay hay so'ol guyna, makay siwle-siwlet ma kali goyo, jafna valamu ma muɗ mi guy ma ɗigera ma zlimitna.

³⁰Ki kayn nala sum sa haw suw kafna as ŋom farayna, sum sa vun lasta as tun suksi hay sle'ta; may nan ma ci so'olla vigiya hiɗi mayta, Cawgi ma hinna ma fi ci-goyta.

³¹Vun-galana, yoraŋ tuwaŋu, hoyok-ziyna, tiyaŋu, hin tuwag vag bat-bat', nak nagat Filistiya kafe. Kay nukŋa ka may hay gal gaa pa, sa gawta jarsi may ja goy noŋɗi.

³²Nay as hot dit mige tam sa di sunda vi jaf-sum nisina? Nay as hotsi dit ala Ma-Vatɗina tun sem Siyonawa gaa'a, a sumuna visiya sa hay lasta ma fi tun-suku.