Read Masana ESAYA 16 Bible Online

ESAYA 16 - Masana bible

ESAYA 16

¹Vulgi guro fok-dimina tam mulla vi nagata, hay Sela, hay fulda pa tam hiɗiyta vi goota vi Siyon.

²Guro-boyna vi Mowab ma jik hay liy ma ɦaw kulona vi goloŋŋa Arnon ɗawni, nisi ma muɗ ŋray ca ki layayn ma meray goyna, ma digiɗiy goy hay ziyam pana nala.

³Vulgi gatta, colgi kay lawta, meɗgi ŋus-guna vigi goy falay calak' ki hay henjet nala, ŋaygi sum sa pir goyna, patgi dir sum sa pir jaŋŋa goyɗi!

⁴Hin sumuna van sa Mowabna sa pir goyna lak hay nagata vigiya, nigi ma ŋaysi kay sum sa tisi ɓuraŋŋa, kay vurumta ya' dabawa, nam ma tay sumun gaana ma mitis goyo.

⁵Zlamda-mulda muɗ dono'o kuɗ ŋaata-ŋolda, sa ma ka kitata ma min ɗigerta, ma dikam min gasita ma mus kay zlamda-mulda na'ta, hiɗi hagata gasita.

⁶Numa humi kay jigal-tuwta vi Mowab, jigal-tuwta ta suwiya, firita visiya hiɗi subur-tuwta visiya, purcakka visiya hiɗi niŋata visi ta waata.

⁷Kuɗ kayni Mowab ka yor tuwa'a kay Mowab, gigekaw yor tuwamu, nigi ka ŋurnaya kay ɦo gaata vi Kir-Hareset, kay na' toy gaa dono ŋolo.

⁸Kay sinena vi Hesbon ka so goyo, sa di law jaf-sumuna cal so'ol gulda-guldana vi Sibmawa goyo, namu ma vunam ka ta-ta hay Yayezer, nam ma ka dayay hay fulda kafe, ɓalam ma daɓay goyna suw niy-lum ma ŋolla.

⁹Kuɗ kayni nan ma tiy kay gulda-guldana vi Sibma ki Yayezer ka tiy nala, nan ma ŋuruɓgi hiɗi zimiyna vanu, Hesbon hiɗi Eleyale, kay luluta vi duura coowa ci'e kay sinena vigiya hiɗi wa ma feɗemna.

¹⁰Firita hiɗi cenda may hay sinen loɗi, hay sine gulda-guldana, sa may gi nul loɗi, sa may firi loɗi. Sa ma ja gulda-guldan may keslem hay doway-firin loɗi, ciriyna vi firita nan vatamawa.

¹¹Kuɗ kayni hayan ka wira kay Mowab ki dilla ka wira nala, dikan ka tanu kay Kir-Hares kaw[8]

¹²Sum sa Mowab ka tuɗ mak tuwsi kulo kay liyn ma ɗiŋiriŋŋa, nisi co kulo kay liyn ma ɗifinna visiya kay siɗawa, may nisi as fi vaɗi.

¹³Kayni mi yoboyna ma Ma-Vatɗina dum goy jew ɓa-ɓa kay Mowabna.

¹⁴May wulin kayni Ma-Vatɗina ka di ala: Hini busat ɦidi, ŋaɓi ki busata vi sa ma li lop kay gurjut nala, gajijita vi Mowab ma muɗ goy bisi, hiɗi ŋolda vi sumun pet, cawsi ma hinina ma muɗ mi va ma kiɗaya, ma gasita valam mayɗi.