Read Masana ESAYA 17 Bible Online

ESAYA 17 - Masana bible

ESAYA 17

¹Law joo'o kat Damas hiɗi Israyel Damas ma muɗ ɗawni mi hoyok-ziy loɗi, na' ma muɗ ɗawni mi yam-jono ɦawa.

²hoyok-ziyna vi Arower hini goyo, nam hini goy mi muuriyana, muuriyan bur haya, sa ma geɗem loɗi.

³Gulmunna vi Efrayim yalam vatawa, mulda vi Damas hiɗi caw nagata vi Siriya ma li nala kaw. Gajijita vi gurona vi Israyel ya' ma dab nala kaw. Dita vi Ma-Vatɗina vi vok-ma-duura.

⁴Hay buur namna ɗawni, gajijita vi Yakub ma maŋ goyo, sliwsi ma ɗorayna ma ŋok goyo.

⁵Nisi ma muɗ ɗawni ki sa ma feɗ alkamarena mol alkamaren kulo kay selemu, hiɗi ɓalamu nam feɗem yalam may nala, ki hay li ma san gar ɦelena lokŋa vi Refayim nala.

⁶Cawsi ma hin ɗawn ki vuɗna vi gu-olive ma hin kulo hum mulam kep-kepna, bugol gaz ma gazam gaana nala, vuɗna ma' lebo ɦidi hin hay sinem ma kulona, fiɗi lebo vasl ma hin hay ɓalam ma vuɗna. Dita vi Ma-Vatɗina, Lawna vi Israyel.

⁷Hay buur namna ɗawni, ira vi sana ma cuk kay nam ma kotomna, iram ma peɗ ma peldetna vi Israyel.

⁸Giwin-ma-ɗifinna ma nam kotom hiɗi ɓalamna, nam ma cuk iram kalam loɗi, sle ma nam kotom hiɗi cita-ɓalamna nam ma peɗem loɗi, lawn ma waana vi Asera* hiɗi slen ma ini kay girif fatta nam ma saram loɗi kaw.

⁹Hay buur namna ɗawni, hoyok-ziyna visi ma donona ma noyis goyo, ki juruta hiɗi yam-hiɗiyna nala, noyay goyo vok gurona vi Israyel, ɓulak-goyta ma li'e.

¹⁰Kay yigi jok Lawn ma su'da vigiyawa, humgi may gigi kay hiɗiyn ma donona vigiɗi, kuɗ kayni nigi pi gu ma ŋaanawa, nigi pi gu ma pullawa gaa kay nagata;

¹¹Buur ma nigi pumna, nigi ŋuy zlaɓn talamu, hay graw culum na'ta, jaf ma nigi pum gaana ɓo'o, may feɗna pirawa jaŋi, hay buur ma nigi li firi hiɗi namna, tuw-tita may vatɗi.

¹²Ciriyna vi sum sa ŋol dak-dakŋa ki niy-lumna ka suwa nala, sumun ka ci gumu ki niy ma ŋulon ka ci gum nala.

¹³Sumun ka ci gumu ki niy ma ŋulon ka ci gumu nala. Nam baysiya, nisi mun jaŋ vokomu, doli goyo ki hoso ma kulo kay hiɗiyna nala, kuɗ biwna vi simeɗna, ki hiwliŋ ma pat nagan kulo vok biira nala.

¹⁴Hay li ma vulatit co'o, nam mar narta, jew liy ma fo goyna, nam may loɗi. Kayni mi ir ɓurawta vi nisi sa tay ɓuraŋi, va ma nisi sa vurumaya ma fumna.