Read Masana ESAYA 18 Bible Online

ESAYA 18 - Masana bible

ESAYA 18

¹Haha! Nak nagata ta zlimitn ka suwa hayag giti-gitita, goy bugol niy-lumna vi Etiopiya!

²Naku ta cuk sum sa sunda goloŋ hay niy-lum ma ŋolla, nisi ɓey hay lum-cerewna ma ka dol kulo kay niyna. Tuɗgiya, nigi sa sunda sa segi koloyna, tuɗgi tam jaf-sum sa wuli kulo fiyok siwleŋŋa, sa tuwsi wile'e, tuɗgi tam sum sa sumun lisi nari hay tun cawta visi pa, jaf-sum sa dono'o sa tay slen gaa sesi kafe, sum sa niy-lumna ka ŋuyi hay nagata visi dak-dakŋa.

³Nisi kaf, jaf-sum sa hay nagat kuɗulu, nigi sa lakay gaa kay nagata, nigi sa cuk irgi kat bay-bayna ma piy kulo kay hiɗiyna, nigi ma huma hay li ma togolomna ma buwa.

⁴Kay Ma-Vatɗina di tan ala: Nan may ge'ɗi, nan mus kiliŋ kay ɗuwa goy hay liyn ma musta van pa, ki buur ma liyn tuni kiliŋ nala, ki maɗay ma gina hay liyna vi feɗna nala.

⁵Ki kayn nala, jew feɗna, hay li ma ɓona vatawa, hay li ma vuɗna vi gulda-guldan tun caw niya, nam pom ɓalam hiɗi hiramna, nam yawam goyo, nam kaam ɓalam goyo.

⁶Nam kaf ma hinis goyo mi layayn ma ti slena ma kay hiɗiyna, hiɗi muuriyan ma gaa kay nagata; layay ma ti sumuna ma vat menda tam ŋumna visiya, muuriya ma kay nagat kaf ma vat cayd hay liy namna.

⁷Hay liy namna ɗawni, sum sa wuli kulo fiyok siwleŋŋa hiɗi tuwsi wilena ma mar vulda tam Ma-Vatɗina vi vok-ma-duura, kayni si sum sa san lisi nari hay tun-cawta visi pa, jaf-sum sa dono'o sa tay slen gaa kafe, sum sa niy-lumna ka ŋuyi hay nagata visi dak-dakŋa, nisi ma maram hay liyn ma semda vi Ma-Vatɗina vi vok-ma-duura ka yi haya, kulo kay hiɗiyta vi Siyon.