Read Masana ESAYA 19 Bible Online

ESAYA 19 - Masana bible

ESAYA 19

¹Law joo'o tam Egipte. Ɗuwgi Ma-Vatɗina ka ɓey kulo kay ɗugul ma koloyna tige, nam ka co hay Egipte, laway ma waana vi Egipte tuwam ma vum vokom bat-bat', sum sa Egiptena diksi ka ɓirsiya.

²Nan ma gan sum sa Egipten kat tuwsiya, gigekaw ma dur ɓasulumna, gigekaw ma dur banamna, hoyok-ziyna ma dur hoyok-ziyna, mulda ma dur mulda.

³Kursulita vi sum sa Egipten ma vat goy jarsiya, ŋra-vunda visiya nan ma vata' goyo, sumun ma job kuɗ lawayn ma waana, kuɗ sa da-fulla, sa job kuɗ sa mitina hiɗi sa tun gireyta.

⁴Nan ma vul Egipte goy hay ɓam sum sa taŋgasna, mul ma dikam joo'o ma ti mul kisiya, din mi Bum-Sumuna, Ma-Vatɗina vi vok-ma-duura.

⁵Niy-lum ma ŋulona ma so goyo, niy-lumna ma so goyo, hayam ma hin goy ɦawa'a;

⁶niy-lumna ma muɗ his joo'o, ɓam niy-lumna Nil ma muɗ gooro, ma so goyo kaw, cerewna hiɗi zlayna ma liwek goyo.

⁷Deŋel niy-lumna Nil ma hin goy soya, kuɗ fiyokka vi niy-lumna Nil kafe, jaf ma cuki gaa kel niy-lumna Nil kaf ma so goyo, ma mer goyo, ma vat goyo kaw.

⁸Sum sa ciw kulufna ma tiy tuwsiya, nisi sa cuk siwitna goloŋ hay Nil kaf ma ti do'olla, nisi sa ɓal den goloŋ hayna kaw ma hin goy ɦawa'a.

⁹Nisi sa duɓar barawna, hiɗi nisi sa cil sligar ma haɓna kaf ma muɗ zulo'o.

¹⁰Nisi sa gut kuɗ nagata sutaysi ma to'o, sum sa li lop kay gurjut kaf diksi ma yora.

¹¹Sa ŋulona vi Sowan si sum sa ɦay-ɦay waa'a, sa yalla sa vul gatta mi Farawn, vulumti ti gatta ta ɦay-ɦay waa'a. Nigi as di tam Farawn ala: Nanu mi goora vi sum sa yalla, goora vi muliyan sa jew ɓa-ɓana, nigi as di nala ir nanige?

¹²Sa yalla vigi wulini ka arige? Hinsi ɗekgi goy kay sle ma ŋayayna, kay sumun ma hum caw va ma Ma-Vatɗina vari kay lum tam Egipte.

¹³Sa ŋulona vi Sowan nisi ɦoyaya, sa yerimana vi Nof ka viy tuwsi goyo, sa ŋulona vi jafna ka viy Egipte goyo;

¹⁴Ma-Vatɗina gi ŋusta ta tuwur irawa jarsiya, kay viy sum sa Egipten goyo hay lopna visi kaf, ki sa ma dolayn lumna viy goy jar vinna valamu nala.

¹⁵Nala va ma yamda hiɗi giɗera lumna Egipte ma lumɗi, va ma ɓam gu-gomona hiɗi cerewn lumna nisi ma lumɗi kaw.

¹⁶Hay buur namna ɗawni, Egipte ma muɗ ki boyna nala, tuwa' ma wira'a, na' ma muɗ nari, ma li ɗawni, hay li ma ira' wi ɓam Ma-Vatɗina vi vok-ma-duurawa geɗa, hay li ma nam ma poŋ ɓalam kulo ka'a.

¹⁷Nagata vi Yuda ma muɗ vi tuw Egipte bat-bat', sa ma ya' se'awa tuwam ma li nari, kuɗ sle ma Ma-Vatɗina vi vok-ma-duura colom colla.

¹⁸Hay buur namna ɗawni, hoyok-ziy ma law vunna vi Kanaaniyan ma li vasl hay Egipte, sum sa hayamna ma yi va kisiya hay semda vi Ma-Vatɗina vi vok-ma-duura, kep jar hoyok-ziy namna ma ya' ala Ir-Haheres.

¹⁹Hay buur namna ɗawni, nisi ma in giwin-ma-ɗifinna mi Ma-Vatɗina jar nagata Egipte, hay jar nagata, nisi ma in naga ma molina kulo'o tam Ma-Vatɗina.

²⁰Kayni ma li ti ɗekka hiɗi di-goyta vi Ma-Vatɗina vi vok-ma-duura hay nagat Egipte, hay li ma nisi min siwel tam Ma-Vatɗina kuɗ sa curoɗsina, hay li ma nam ma gi sa ma su'da ay kepe kay gi diram kuɗsiya, kay butsi goyo.

²¹Hay buur namna ɗawni, Ma-Vatɗina ma ɗek tuwam kir sa Egiptena, sum sa Egipten ma wi Ma-Vatɗina, nisi ma girif hiɗi ɗifinna hiɗi sle ma vulla, nisi ma yi va kisi vok Ma-Vatɗina, ma hobom vunam kaw.

²²Ki kayn, Ma-Vatɗina ma wat sa Egiptena, nam ma watsiya, may nam ma hot yersi goyo. Nisi ma ham hay Ma-Vatɗina, nam ma hot yalam gaa'a, ma yersi goyo.

²³Hay buur namna ɗawni, hagata ma gi jar Egipte hiɗi Asiriya, sum sa Asiriyan ma tuɗ hay Egipte, sum sa hay Egipten ma tuɗ hay Asiriya kaw. Sum sa Egiptena hiɗi sum sa Asiriyana ma girif Ma-Vatɗina.

²⁴Hay buur namna ɗawni, Israyel ma li mi ma mul ɦidina jar Egipte hiɗi Asiriya, nisi ma vul bolda mi nagat kuɗulu.

²⁵Hin Ma-Vatɗina gi bolo hiɗi dita ala: Bolda ka kay sa Egiptena, sumuna vanu. Bolda ka kay sa Asiriyana, lopna vi ɓanu, bolda ka kay Israyel, vocota vanu.