Read Masana ESAYA 2 Bible Online

ESAYA 2 - Masana bible

ESAYA 2

¹Yoboy ma Esaya goora vi Amos wi goy vokom jewe kay Yuda hiɗi Yerusalem.

²Liyn ma co'o hay buur ma cawna, hay liy namna hiɗiyta vi ziyda vi Ma-Vatɗina ma inis kulo kay hiɗiyna, na' ma wul kulo suw hiɗiyn kaf, jaf-sumun kaf ma tok hay liy namna.

³Jaf-sumun ŋolo ma tuɗ hay liy namna, nisi ma di ala: Nigiyaya, jikaygi kulo hay hiɗiyta vi Ma-Vatɗina, tuɗay hay ziyda vi Lawna vi Yakub, kay nam ma hatay kay hagata valamu, kay nay ma poy hay hagata gurayta valamu. Kay gatta ma kali goy hay Siyon pa, yoboyna vi ma Ma-Vatɗina ma kali goy hay Yerusalem pa.

⁴Nam ma lin mi sa ma ka kitat jar jaf-sumuna, nam ma kot lawt jar sumun ŋolo. Kew-gaferaŋa visiya nisi ma zlam goy ɗugumu, kaway-ma-duura visiya nisi ma zlam goy hirami, jaf-sum sara'a ma yaw kew-gaferaŋa kulo'o tam jaf-sum sara'a loɗi, labara kay duura nay ma humum loɗi.

⁵Jafna vi Yakub, nigiyaya, tuɗay hay haraŋa vi Ma-Vatɗina.

⁶Kay naŋ noy sumuna vaŋawa goyo, jafna vi Yakub, kay nisi hobay hob' hiɗi sle ma sum sa gal kuɗuwn lumna, hiɗi gul-yalda ki sum sa Filistin nala, kay nisi tap vunsi hiɗi gurona vi sum sa pulla.

⁷Nagata visi hobay hiɗi doorota hiɗi ora, farayna visi may vatɗi, nagata visi hobay hiɗi kulumayna, ŋaɓta vi keke-ma-duura visi vatɗi.

⁸Nagata visi hobay hiɗi lawayn ma waana; nisi girif gaa'a vok lop ma nisi lum hiɗi ɓisina, nisi girif gaa'a vok sle ma nisi kotom hiɗi ɓisina.

⁹Sa-wurana heray gaa'a, san guɗofi gaa'a, naŋ ma vulsi gidɗi.

¹⁰Cukgi hay zul-hiɗiyna, ŋaygi tuwgi jar butuwna, goy gine'e hiɗi ɦiyda vi Ma-Vatɗina, hiɗi wileta vi ŋolda valamu.

¹¹Ira vi sumun ma ɗuw hiɗi subur-tuwta ma hot gaa'a, subur-tuwta vi sana ma hot goy bugolo, Ma-Vatɗina kep ma fi suburta hay buur namna ɗawni.

¹²Kay Ma-Vatɗina vi vok-ma-duura col buurawa kepe, nam col buurawa kepe kay sa subur tuwsiya hiɗi sa sli yisi kulona, nam col buurawa kay nisi sa sli yisi kulo'o, sa nam min hotsi yisi gaa'a;

¹³nam col buurawa kay gu-gamna vi Libaŋ ma fiyokŋa, ma kulo gine'e kaw, nam col buurawa kay gu-ma'asna vi Basan.

¹⁴Nam col buurawa kay hiɗiy ma kulo fiyokŋa, hiɗi liyn ma kulo ɗiŋiriŋŋa kafe;

¹⁵nam col buurawa kay simdir ma kulo fiyokŋa, hiɗi gulmun ma donona;

¹⁶nam col buurawa kay lumayna vi Tarsis kaf, hiɗi sle ma dik sumun daramna kafe.

¹⁷Subur-tuwta vi sa-wurana ma hot gaa'a, sli-yam kulota vi sumuna ma hot gaa'a, Ma-Vatɗina kep ma fi suburta hay buur namna ɗawni.

¹⁸Lawayn ma waan kaf ma vat goyo.

¹⁹Sumun ma cuk hay holokŋa vi hiɗiyna, sumun ma pi tuwsi gaa kuɗ butuwna, kay ŋay tuwsi kay ɦiyda vi Ma-Vatɗina, kay ŋay tuwsi kay wileta vi ŋolda valamu, kayni hay buur ma nam ma fok kulo'o kay wir nagata.

²⁰Hay buur namna ɗawni, sa-wurana ma cuk lawayn ma waana valam ma doorona hiɗi lawayn ma waana valam ma ora goyo, lawayn ma waana ma nam kay tuwam kotomu kay girif gaa vokomu, nam ma cukum goy mi kulomna hiɗi bay-bayna.

²¹Sumun ma cuk hay baŋana vi hiɗiyna, hiɗi holokŋa vi hiɗiyna, goy gine'e hiɗi ɦiyda vi Ma-Vatɗina, hiɗi wileta vi ŋolda valamu, hay li ma nam ma fok kulo'o kay wir nagata.

²²Vida vigi ta nigi tuna' hay sa-wurana nigi ma hina' goyo, kay sana gi suk hiɗi cinam ɦawa, sana ŋaata valam mi mige?