Read Masana ESAYA 21 Bible Online

ESAYA 21 - Masana bible

ESAYA 21

¹Law joo'o kay fulda vi niy-lum ma ŋolla. Ki ɦiwliŋ ma ŋolla jik hay fulda Negeb nala, nam may goy hay fulda pa, hay nagata ta san as li nar ka'a.

²Sle ma li sa ɦuyumu vul tuwam kiranu, sa ma di newta ka di newta, sa ma ɓulak slena ka ɓulak slena. Tuɗgi vun duura, sum sa Elamna, sligi nagata, sum sa Mediyana. Nan vat yorta visiyawa kafe.

³Kuɗ kayni dikan hobay hiɗi lasta, tuw-tita vanawa, ki tuw-tita vi cata ta ka puk nala; sutiyan ma junina hinan humɗi, tuwan ma wiranna hinan ɗuwɗi.

⁴Nan viy goyo, narta hobanawa, henjeta ta lan firiya nam muɗa' goy va ma lan nari.

⁵Nisi col tablena goyo, sa ŋomda lak jigere, sumun ti'e, sumun ci'e, yawgi kulo'o, nigi sa yerimana, setgi mul tam kuroŋŋa.

⁶Kay Bum-Sumuna di tan ala: Tuɗaŋu, colaŋ sa ma ŋomda goyo; hinim siwel goy kay va ma iram ma wumu.

⁷Iram wi sum sa ɓe kulumayna, sum sa ɓe kulumayna kuɗ tuwsi ma' ma', sum segena ɓey kay kurona, segena ɓey kay lamgana; sa ma cigeɗna musi kiliŋ', musi noŋ kiliŋ'.

⁸Bugolda nam ka siwel ki zlon nala ala: Bum-Sumuna, nan busa he' kulo coli kay simdira na zaw', nan bur tos' kulo hay liy ma ŋomda na zaw',

⁹nan ɗuw kayni nisi ka co'o, sum sa ɓe kulumayna, sum sa ɓe kulumayna kuɗ tuwsi ma' ma', nam sli diti lo di'e: Na' nigawa gaa'a, na' nigawa gaa'a, ti Babilon, lawayna va' ma ceɗayna kaf, nam tomawa goyo.

¹⁰Nigi sumuna vanu, nigi sa ay toy ki san to wan hay muɗakŋa nala, slen ma nan humumi vun Ma-Vatɗina vi vok-ma-duura nan digitawa.

¹¹Law joo kat Duma. Goy hay Seyir pa nisi ka siwel tan ala: sa ma ŋomda, henjet muɗ kayn muɗtige? Sa ma ŋomda, henjet muɗ kayn muɗtige?

¹²Sa ma ŋomda hot dita: Liyn ma fo'o, may henjet ka hotay lo. La nigi min joba, jobgiya; hamgi goyo, nigiyaya.

¹³Law joo kat Arabiya. Nigi ma bur goy hay fulda vi Arabiya, nigi sa ɓe kulumayna vi Dedan.

¹⁴Nargi niyn kat nisi sa laat ka cisiya; sum sa hay nagata vi Tema ka jaŋ kir sa muni jaŋŋa hiɗi funa.

¹⁵Kay nisi ka mun vok kew-gaferaŋa, kew-gaferaŋa ma ka patay goyna, vok ɓarawta ta ganayta, vok zumalda vi duura.

¹⁶Kay Bum-Sumuna ka di tan ala: hini busat kepe, ki busata vi sa ma li lop kay gurjuta nala, gajijita vi Kedar ma vat goy kafe.

¹⁷Kay jar gurona vi Kedar kayni, sa wi duur ŋaa'a ma hin kuɗsi kiɗaya. Kay Ma-Vatɗina Lawna vi Israyel daawa.