Read Masana ESAYA 22 Bible Online

ESAYA 22 - Masana bible

ESAYA 22

¹Law joo'o kat lokŋa vi slen ma vul tuwam kir sana. Sum sa hay Yerusalem kaf jik kulo'o kay yam-ziyna kay mige?

²Hoyok-ziy ma winekŋ hayna, hobay hiɗi ciriyna, hoyok-ziy ma firita hayna. Sa mitina vagu may cisi kayn mi kew-gaferaŋaɗi, nisi ma mit ɗawni may vun duuraɗi.

³Sum sa ŋulona vi duura vagu muni kuɗ tuwsi jaŋi, nisi yaway daŋgaya kay sa gi ɓarawta, sum sa hayagŋa kaf yaway daŋgaya, hay li ma nisi pir jaŋi goy gine pa.

⁴Kuɗ kayni nan di'e: muɗgi irgi goy gine hiɗi nanu, nigi hinan tiy dono ŋolo, nigi ma so tuwgi tanu, kay teŋan iran kuɗ ɓulakka vi goota vi sumuna vanɗi.

⁵Kay kayni mi buura vi viy-goyta, buura vi kirapta-gaata hiɗi yorta, buur namna gumi mi Bum-Sumuna, Ma-Vatɗina vi vok-ma-duura, nam gumi hay lokŋa ma slen vul tuwam kir san haya. Gulmunna toy gaa'a, siwelda tam hiɗiyna kay job gutda.

⁶Sum sa Elamna ziy ŋuloŋŋa, keke-ma-duura hiɗi kulumayna tuɗ vokomu, sum sa Kir pat marayna visi goyo.

⁷Lokŋa vigi ma ŋaana hobay hiɗi keke-ma-duura, sum sa ɓey kay kulumayna zlari goy vun-galana kay li duura.

⁸Nisi yaw borgona vi Yuda goyo, hay buur namna nigi muɗ irgi kir sle-ma-duura vi ziyna vi juruta.

⁹Nigi ɗuw baŋan coy ŋolo tam hoyok-ziyna vi David, nigi vi niyn hay goloŋ goora.

¹⁰Nigi ŋaɓ ziyna vi Yerusalem goyo, nigi to ziyn gaa'a kay muɗ gulmun dono'o,

¹¹nigi kot liy ma vi niyna jar gulmun ma ma'na, kay niyna vi gulmun ma jewna, may nigi min muɗ irgi kay nam ma li slen kaynɗi, sa ma kot slen kayni ir busat ŋolo nigi min wumɗi kaw.

¹²Bum-Sumuna, Ma-Vatɗina vi vok-ma-duura yigiyawa jar buur lakŋi kay nigi ma tiya, yor tuwgi kaw, kay wel yigi goyo, kay jun bolla furgi kaw.

¹³Ɗuwgi haysi ka sleɗiya hiɗi firita ŋolda visi natige! Nisi ŋat luwayna hiɗi fukunayna, nisi mut sliwna, ci vinna kaw: Taya, caya, kay jifini nay ma mita.[9]

¹⁴Ma-Vatɗina vi vok-ma-duura ɗek kaynawa kiranu, a'a, nan ma por joota vigiɗi ta-ta tam mitta vigiya, din mi Bum-Sumuna, Ma-Vatɗina vi vok-ma-duura.

¹⁵Ki kayn nala Bum-Sumuna, Ma-Vatɗina vi vok-ma-duura di'e: Tuɗaŋ faŋ Sebna, ma ŋolla ma di law faatana vi mulla, dum ala:

¹⁶Va vaŋ ma ka tani mi mige? Sa vaŋ ma ka tani mi gige? A naŋ jugoɗ zul ma pi san tan kayni? Zulla san jugoɗom kayn kulo kay hiɗiyna, san kot liy ma musta valam kayn kulo kay hiɗiyna!

¹⁷Ma-Vatɗina ma gaŋ goy did', nam ma ɗutaŋ konoloŋ',

¹⁸Nam ma ligadaŋ goyo ki wurlayta gaa kay nagata, ta ya' goy haraŋi nala. Ɗawni naŋ ma mita, keke-ma-duura vaŋ ma ŋaana ma mol hay liy namna, He! Naŋu ma mar zulota kay ziyna vi mulaŋŋa.

¹⁹Nan digiɗaŋ goy hay lopna vaŋu, Ma-Vatɗina ma yawaŋ goy hay ŋolda vaŋu.

²⁰Hay buur namna ɗawni, nan ma yi sa ma sunda vanu Eliyakim goora vi Hilkiya,

²¹nan ma cukum sligar-tuwna vaŋ talamu, nan ma ɗutum katamulla vaŋ kalamu, nan ma vul ŋolda vaŋ hay ɓalamu; nam ma muɗ mi bumna kay sum sa ziyna visi hay Yerusalem, hiɗi sum sa hay Yuda.

²²Klena vi jafna vi David nan ma burumti pelemu, hay li ma nam mal vun-ziynawa goyo, sa as dukum loɗi, hay li ma nam dukumawa, sa as malam goy loɗi.

²³Nan ma cum kulo'o ki oslna nala hay liy ma ŋaana, nam ma lin mi liyn ma musta vi gajijita kay jafna valamu.

²⁴Slen kaf ma vul suburta tam jafna valamu ma gaɓis kulo talamu, ɓam-gu ma ŋulona hiɗi ma gurayna, doway ma gurayn kaf, fokay tam kaway ma niyn pa ta-ta tam tiliyna.

²⁵Ma-Vatɗina vi vok-ma-duura di ala: Hay buur namna ɗawni, wella ma juni kulo hay liy ma ŋaana ma yawis goyo, ma jam gaa'a, nam ma ja goyo kaw, jak ma lakay kulo kalamna ma ɓulak goyo. Kay Ma-Vatɗina di dita valamawa.