Read Masana ESAYA 23 Bible Online

ESAYA 23 - Masana bible

ESAYA 23

¹Law joo kat Tirus. Yorgi tuwgiya, nigi lumayna vi Tarsis, kay na' ɦoy gaa'a. Ziy may loɗi, liy ma kal kalaf may loɗi. Labar kayni ɗekay kirsiya hay nagata vi Kittim pa.

²Muɗgi gidiŋi kay narta, sum sa ziy kay jokota ta sum sa filiwna vi Sidon hoba'awa, hay li ma nisi jik hay niy-lumna.

³Jar niy ma ŋulona, alkamarena vi Nil, wana vi niy-lum ma ŋulona kayni mi va ma na' fumna; na' muɗi ti lumuta vi jaf-sumuna.

⁴Muɗag zulo'o Sidon, kay niy-lumna hiɗi gulmunna vi niy-lumna ka di ala: Nan may fi tuw-titɗi, nan may pukɗi, nan may wul guro joriyoɗi, nan ma wul guro-boyɗi kaw.

⁵Hay li ma labara coowa hay Egipte, sumun ma geɗa ki Tirus geɗ kuɗ labar namna nala.

⁶Jikgi hay Tarsis, yorgi tuwgiya, sum sa li ziy kay jokota,

⁷Tani mi hoyok-ziyna vigiya ma firit ay hay jewna su? Hoyok-ziy namna so'olom ay gaa jew ɓa-ɓa, may sesi ma narsi goy hay liy ma ginena.

⁸Tirus ta ay ɓuraw bogorayn goyta, na'a ta sum sa li filiwna va'a ay si yerimana, na'a ta sa li filiwna va'a sesi tiy goy hay nagat kafe, wulini sa ma fok kulo ka'na kayn mi gige?

⁹Fok kulo ka' kayni mi Ma-Vatɗina vi vok-ma-duura, kay sum sa subur tuwsina kaf, nam min kus subur-tuwta visi goyo, kay nisi sa sesi tiy hay nagat kafna, nam min hotsi yisi gaa'a.

¹⁰Ŋuyag nagata vagu, ŋray ca ki Nil nala, goota vi Tarsis, kay jukŋa may loɗi.

¹¹Ma-Vatɗina meɗ ɓalamawa goy kay niy-lumna; mulda mulda kaf nam geɗawa; nam vul hagatawa tam Kanaan kay ɦo liy ma donona va' gaa'a.

¹²Nam di ala: nak ma liw loɗi, naku ta nisi burawa dono'o hiɗi naku, nak goor-wayata, goota vi Sidon. Fokag kulo'o, capag hay nagata vi Kittim, la ɗawn kaw, nak ma fi tun-sukka loɗi.

¹³Ɗuwgi nagata vi sum sa Kaldeena, nisi ay jew si sum noŋɗi, sum nisi sa hay fulda, sa sum sa Asiriyan kotsi nagat kisiya; nisi in simdir kulo'o, nisi ɦo ziy ma mulda vi Tirus gaa'a.

¹⁴Yorgi tuwgiya, nigi lumayna vi Tarsis, kay gulmunna vigi ɦoy gaa'a.

¹⁵Hay buur namna ɗawni, sumun yisi ma jok Tirus ir busat dok-siɗiya, ŋray ca hiɗi busata vi sa ma ti mulda. Bugol busat dok-siɗiya, Tirus ma muɗ ki cata gawlaŋga ta nisi ka gi nul ka' nala ala:

¹⁶Slag dilla, ŋuyag hoyok-ziyna, nak gawlaŋga ta sumun yisi jokagawa, lag nul ŋaa'a, lag nul ŋolo, kay humgi ma gisi kagu.

¹⁷Hay li ma busat dok-siɗiya vatawana, Ma-Vatɗina ma cuk iram kay Tirus, na' ma hot tam wurakŋa va' ma liwisna; na' ma muɗ tuwa' viyuwu kuɗ muliyan hay nagat kafe, sa gaa kay nagat kafe.

¹⁸May fita va'a hiɗi wurakŋa va' ma liwisna ma vulis goy ɗifini tam Ma-Vatɗina, sa as molom kuloɗi, ŋomomɗi kaw; kay fita na'ta ma li vi nisi sa lak ziy vok ir Ma-Vatɗina, nam ma lin mi tin ma hobsi haysiya, hiɗi sligar ma ŋaana kisiya kaw.