Read Masana ESAYA 24 Bible Online

ESAYA 24 - Masana bible

ESAYA 24

¹Wulini Lawna ka po yam nagat goyo, nam ka vat sum sa haya'na goyo, nam ka muɗa' ya' gaa'a, nam ka mer sum sa haya'n goyo:

²Van ma li tam mul-ɗifinna ki sumun kaf kaw nala, tam mul-ziyna ki sa ma sunda nala kaw, tam sum-ziyna ki cata suna'ta nala kaw, tam sa ma gus goyna ki sa ma gus slena nala kaw, tam sa vul bal goyo ki sa ni bal nala kaw, tam sa ma vul slen bali kay niyamu, hiɗi sa ma yaw slena kay wurakam hiɗi niyamu nala kaw.

³Yam nagata poy goy noŋ kafe, vurumi noŋ kafe; kay Ma-Vatɗina di yoboyn kaynawa.

⁴Nagat ka hay do'olla, sutiya' toya, sum sa sutaysi toyna ka zo'ota, nisi ka zo'ota, nisi sum sa lakay ŋulona vi nagata.

⁵Nagat muɗi liwisi kay sum sa haya'na, kay nigi raw gatta goyo, gun ɗota-gattawa, nisi kus bonota ta hiɗi Lawnawa.

⁶Kuɗ na'ta kayni be'da ka ti nagata, sum sa hay nagatna ka ziy tuw-tita vi joota visiya; kuɗ na'ta kayni sum sa hay nagatna ma ŋalis goyo, sumun ma hin kiɗaya may.

⁷Vin ma jibetna ka vun do'olla, gulda-guldana ka liwek goyo; nisi kaf sa diksi ay firiya ka yora.

⁸Firita vi darayna vatawa, winekŋa vi liwna vatawa, firita vi dilla vatawa.

⁹Sa as ci vinna hiɗi nulla kuɗum loɗi, dolayna muɗi galaki vun sa cumna.

¹⁰hoyok-ziy ma hini goyna toy gaa'a, vun-ziyn kaf dukiya, sa as kal hayam loɗi.

¹¹Nisi ka siwel goy hay hagana, kay mige vinna may loɗi, firit kaf sleɗay gaa'a, cenda may hay nagat loɗi.

¹²Ɓulakka ka hini tam hoyok-ziyna, hoyok-ziy ma toy gaana ɓulakay goyo.

¹³Kay nam ka hay nagata, jar sumuna, ki hay li ma sumun gaz vuɗ gu-oliven gaa'a nala, ki hay li ma sumun gar ɦelena bugol jana vi gulda-guldana nala.

¹⁴May nisi ka siwela, nisi ka pat ciriyna; hay gal ma vulatina, nisi ka pat ciriyna kay subur Ma-Vatɗina.

¹⁵Suburgi Ma-Vatɗina hay liyn ma haraŋa ka wile'e, suburgi semda vi Ma-Vatɗina, Lawna vi Israyel, hay jokona vi niy-lumna.

¹⁶Goy hay sin-nagat ma vat goyna, numa ka hum del nulla: Suburta tam ma ɗigera. May nanu, nan di'e: Nan baawa goyo, nan baawa goyo, nan fi lawtawa! Sa di newta ka di newta; newta, sa di newta ka di newta.

¹⁷Narta, zulla hiɗi jawta vigiyawa, nigi sum sa hay nagata.

¹⁸Sa ma pir jaŋi kay narta ma nig gaa'a hay zulla, sa ma piray goy hay zulla pa jawt ma vumu; kay baŋa ma dukalawna vunam malawa goyo, sem nagat ma tuni gaana geɗawa.

¹⁹Nagat muniya, nagat ɦoy gaa'a, nagat geɗiya,

²⁰nagat ka tulura ki sa ma dolayn ka lumna nala, nagat ka geɗa ki balakŋa ka geɗa nala, sulukŋa va'a ka ca' neke, na' ɦo gaa'a may fok kulo loɗi.

²¹Hay buur namna ɗawni, Ma-Vatɗina ma wat vok-ma-duura ma kulo dukalawna, muliyana vi nagata nam ma watsiya kaw.

²²Nam ma toksi yisi hay zulla, ki sumun tok sum sa daŋgayna yam tuwsi nala; nam ma duksi vunsi hay daŋgayna, bugol buura ir ŋol neeɗa kayni nam ma watsiya.

²³Tilla ma viy goyo, fatta ma muɗ zulo'o; kay Ma-Vatɗina vi vok-ma-duura ka ti mulda kulo kay hiɗiyta vi Siyon, hay Yerusalem kaw. Sa maariyana valamu irsi ma wi gajijita.