Read Masana ESAYA 25 Bible Online

ESAYA 25 - Masana bible

ESAYA 25

¹Ma-Vatɗina, naŋu mi Lawna vanu; nan min suburaŋu, nan min tiyaŋ seŋu; kay naŋ li va ma ŋaanawa; slen ma naŋ var jew ɓa-ɓa kay lumna ka coli dono'o, ge'ɗi.

²Kay hoyok-ziyna naŋ muɗumawa goy hiɗiy ma moli kay tuwamna, hoyok-ziy ma donona naŋ muɗumawa goy mi yam-jono'o, ziy ma ŋaana vi sum sa pulla vatawa goy hay hoyok-ziyna, sa hot inim kulo loɗi.

³Kuɗ kayni sum sa donona ma tiyaŋ seŋu, hoyok-ziyna vi jaf-sum sa las sumuna ma wi ŋolda vaŋu.

⁴Kay naŋ ay mi liyn ma ŋay sum sa maŋayna, liyn ma ŋay sum sa hawna sa vun zlata, liy ma ŋay sana kay niy ma biwna, ŋus-guna ma ŋay san kay fatta ta tita, kay sum sa las sumuna suksi ma gina ŋray ca ki niy ma wat tam gulmunna nala.

⁵Ki fatta ti gaa kay yam nagata ta soy goyta nala, naŋ tay winekŋa vi sa pulla gaa ki kayn nala kaw, ki ŋusna vi ɗugulla sah' fat ma tina goy nala, sum sa las sumuna, nulla visi ma nisi gumna ka ki kayn nala kaw.

⁶Ma-Vatɗina vi vok-ma-duura ma li yuldeta mi sum nisin kaf, kulo kay hiɗiy na'ta, nam ma li yuldeta hiɗi tin ma jibetna, yuldeta hiɗi vin ma busayna, tin ma ŋaana, tin ma jibetna ma hobay hiɗi mul-zokŋa, vin ma busayna, ma yorayna kaw.

⁷Kulo kay hiɗiy na'ta ɗawni, sligar ma sumun kusuɓ tuwsi hiɗi namna kaf ma yawam goyo, borgona ma jaf-sumun kaf ka cukum tisina kaw.

⁸Nam ma vat mitta goyo kay dok-doko; Bum-Sumuna, Ma-Vatɗina ma ɦas zimiyn goy kirsi kafe, zulota vi sumuna valamu gaa kay nagat kafe; kay Ma-Vatɗina daawa.

⁹Hay buur namna ɗawni nisi ma di ala: Lawna vuma zawni, numa tun vida vuma kalamu; suɗma goyo mi namu; mi Ma-Vatɗina, namu mi ma numa ka cubum hiɗi sle'ta; lakay hay firita ŋolda, firiyaya kay su'da valamu!

¹⁰Kay ɓamta vi Ma-Vatɗina ka buri hay hiɗiyt kayni; Mowab ka tayay gaa'a hay baŋala'na, ki hatna ka tayay jar zigidikŋa nala.

¹¹Nam ma meɗ ɓalam goyo ki sa ma nusna meɗ ɓalam goyo kay nusa nala; may Ma-Vatɗina ma kus subur-tuwta valam gaa'a, la nam mak ɓalam ta-ta kaw.

¹²Ma-Vatɗina ma to gulmunna ma kulo fiyokŋa vi Mowab gaa'a, nam ma ɦom gaa'a, nam ma pukum gaa kay nagata, jar butuwna.