Read Masana ESAYA 27 Bible Online

ESAYA 27 - Masana bible

ESAYA 27

¹Hay buur namna ɗawni, hiɗi kew-gaferaŋa valam ma ɗeŋŋa, ma ŋolla hiɗi ma donona, Ma-Vatɗina ma ka kitat kay turmaŋgolina, guy ma pir jaŋŋa, turmaŋgolina, guy ma torɗayna; nala gana-gan ma goloŋ hay niy-lumna nam ma cum goyo.

²Hay buur namna ɗawni, gigi nulla kay gulda-guldana,

³Nanu Ma-Vatɗina, nanu mi ma ŋomomna, nan ɦok niyn kuɗum hay liyn kaf, kay a sumun ma ɓulakamɗi, nan ŋomom hay falayta hiɗi henjet kafe.

⁴ɦiyda may hay dikanɗi; la nan fi a dur zigiy-olla hiɗi gu-zigiyna, nan ma tayam gaa'a, nan ma ŋalam goy kafe.

⁵La nisi ŋay tuwsi tanu, la nisi toy jarsi hiɗi nanu, la nisi li toyt hiɗi nanu.

⁶Hay buur ma vokŋ ɗawni, jafna vi Yakub ma day sutaya, Israyel ma ɓo'o, ma busuk goyo, yam-nagata ma hob hiɗi nisiya.

⁷Ma-Vatɗina watsiyawa, ki nam wat sum sa watsin nala kaw su? Nam cisiyawa goyo, ki nam ci sum sa cisi goyn nala kaw su?

⁸Naŋ watsiya hiɗi gi-irta goyta, hiɗi yawta goy gorvota. Ma-Vatɗina gisi irsiyawa goyo, hiɗi simeɗna valam ma donona, hay buura vi simeɗ ma may kuɗuw pana.

⁹Ki kayn ala joota vi jafna vi Yakub porawa, kayni mi wurak ma nisi fum kuɗ poora vi sulukŋa visiya: hiɗiy ma in giwin-ma-ɗifinna visi hiɗi namna nam guɗufum goyo ki hiɗiy ma kor tuw ziyn nala; lawayn Astarte* hiɗi dolla ma ini kay fatta as fok kulo loɗi.

¹⁰Kay hoyok-ziy ma donona hini goy ɦawa'a, kayni mi ziyna ma noyay goyo, hini goy ki fulda nala kaw, ɗawni guro-luwayn ka ti hatna haya, nam mut gu ma gurayn goy kafe.

¹¹Hay li ma ɓalam so'o, nisi kusum goyo; boyn co'o tun kut kuɗumu. Nisi kayni si jaf-sum sa yisi wi vaɗi, sa ma kotsin kaw may wisi hawsiɗi, sa ma kotsina may lisi slugotɗi.

¹²Hay buur namna ɗawni, Ma-Vatɗina ma gaz guna, tun caway tam liy ma niyn jaŋ goy hayamna pa, ta-ta tam niy-ma-riŋŋa vi Egipte; nam ma vilekgi kulo kep kepe, nigi gurona vi Israyel.

¹³Hay buur namna ɗawni, gozo ŋolla ma buwa, ki kayn nala nisi sa ay bay goy hay nagata vi Asiriya hiɗi nisi sa ay meray goy hay nagata vi Egipte ma hotiya; nisi ma dab voksi gaa'a vok Ma-Vatɗina, kulo kay hiɗiy ta Peldetta, hay Yerusalem.