Read Masana ESAYA 28 Bible Online

ESAYA 28 - Masana bible

ESAYA 28

¹Joot kay bogoray ma subur-tuwta vi sa ɦoyay ki dolayna hay Efrayim, ganta visi kayni mi us ma ɓoyna ɦawa, na' tuni kulo kay lokŋa ma vuɗ slen ŋolla vi nisi sa vinna kol kisiya.

²Ɗuwgiya, sa mara ma dono'o ma kursuliya ka co'o, hay semda vi Bum-Sumuna, nam ka co ki mogoyna ka si gaa ŋolo nala, ki hiwliŋ ma to slen goyn nala, ki niyna ma si dono'o nala; nam hinim si gaa kay nagata hiɗi dono'o.

³Na' ma tays gaa sem sumuna, bogoray ta subur-tuwta vi sa ɦoyay kay dolayna vi Efrayim;

⁴hiɗi us ma ɓoyna ma muɗi ganta va'a, kulo kay lokŋa ma vuɗ slen ŋolo. Nisi ma liys ki gumda ta niy goy vok koloyo, ta san fa' jew feɗna, hay li ma san fa'awa ɓalamu, nam liga' gaɗam' nala.

⁵Hay buur namna ɗawni, Ma-Vatɗina vi vok-ma-duura ma li ki bogorayta ta wileta, hiɗi jakawata ta jifiyta nala, kay dir sumuna valam sa hinina.

⁶Nam ma muɗ ti ŋusta vi gasita kay nam ma musi ka kitata, nam ma muɗ ti donota kay nisi sa digiɗ sa ma gawt goyo, ta-ta hay vun-galana valamu.

⁷May nisi kaw ka tuwura hay vinna, dolay ma galakŋa viysi goyo; muliyan-sa-ɗifinna hiɗi sa jobta-lawna ka tuwur hiɗi dolay ma galakŋa, dolayna ligsiyawa, nisi viyi goyo kay dolay ma galakŋa, nisi tuwura hay li ma nisi di vun-jobta, nisi gi duwliya hay li ma nisi col kitata.

⁸table ma voksin kaf hobay hiɗi vinna visiya, hiɗi gesna, liy ma ŋaana may loɗi.

⁹Nam min hat wida mi gige? Nam min ɗek yali mi gige? Nam min hat yal ɗawn mi guro sa vunsi sliy wulin su? Mi guro sa ci miir loɗin su?

¹⁰Gatta lo gatta lo, gatta lo gatta lo, ɗeksi slen lo, ɗeksi slen lo, ɗeksi slen lo, ɗeksi slen lo, tan neeɗa, ɗawn neeɗa.

¹¹Awa, ŋaa'a, Ma-Vatɗina law tam sum nisin ɗawni, hiɗi vunna vi sum sa vunsi ci dari, Ma-Vatɗina law tisi ɗawni hiɗi vun mara'a.

¹²Nam di tisiya: tun-sukka tani, sa ma makayna nigi hinim tun-suku, lakgi kiliŋ, may nisi min kay humɗi.

¹³Nala yoboyna vi Ma-Vatɗin li kisi ɗawni, gatta lo, gatta lo, gatta lo, gatta lo, hatsi slen lo, hatsi slen lo, tan neeɗa, ɗawn neeɗa, kay nisi tuɗ kaw nisi tupa tiŋ-tiŋ', cap puk goy gaa'a kusa kaw, kay jawta ma visiya a sumun ma yawsiya.

¹⁴Kuɗ kayni, nigi sa burahta, humgi yoboyna vi Ma-Vatɗina, nigi sa ka ti mulda kay jaf-sum sa hay Yerusalemna.

¹⁵Nigi ka di ala: numa jun bonotawa jarma hiɗi mitta, numa li ŋra-vundawa hiɗi liyna vi mitta; hay li ma bakmara ma suwina jikawa, nam ma co tumaɗi, kay numa ŋay tam sinda, ɗutta kayni mi liyn ma ŋayna vuma'a.

¹⁶Kuɗ kayni, Bum-Sumuna ma-Vatɗina di'e: Fay tuwayawa! Sem Siyon ma gaana nan tunumawa hiɗi hiɗiyna, hiɗiy ma waki-wakŋa, hiɗiy ma gef-ziyna ma tuni gaa ɗeŋe; sa ma deŋ tuwamawa tam hiɗiy namna ma pir jaŋ koloyɗi.

¹⁷Nan sli ɗigertawa ki zigew ma ŋaɓ ziyn nala, nan sli gasitawa ki plomna ma zigewn kuɗumna nala, mogoyna ma dol ziyna vi sinda, niyna ma ti kalaf hay ziyna vi ɗutta.

¹⁸Bonota ta jargi hiɗi mitta ma kus goyo, vungi ma nigi ŋram jar tuwgi hiɗi liyna vi mitta ma mus ta-taɗi; hay li ma bakmara ma kulfutna jikawa, nam ma taygi gaa kuɗ selemu.

¹⁹Dok-dok hay li ma nam jikawa, nam ma motgiya, kay hay graw culumta kaf nam ma jika, falayta hiɗi henjeta kaw, ma muɗgi nar ɗawni mi winekŋa valam kay tuwamu.

²⁰Va ma buura ma heb kulo tigiya, borgona ma kiɗa goy tigiya kaw.

²¹Kay Ma-Vatɗina ma fok kulo'o, ki hay hiɗiyta vi Peratsim nala, ki hay lokŋa vi Gabawon nala, kay li lopna valamu, lopna valamu ma may ŋra hiɗi maraɗina, kay li lopna valamu, lopna valamu ma ɦuyum' ŋolla.

²²Wulin kayni, kal tuwgi hay burahtaɗi, kay a zigewna ma zlar kulo tigiɗi, kay lawta coliya kay ɓulak nagat kaf goyo, nan hum kayni vun Bum-Sumuna, Ma-Vatɗina vi vok-ma-duura.

²³Jakgi humgiya, humgi delanu, lakgi kiliŋ', humgi yoboyna vanu.

²⁴Sa ma zum kay cuk jafna zum zumi dok-dok su? Nam dilaɓ sinena, ŋra yam nagan gaa'a tuta su?

²⁵Hay li ma nam ŋra yam nagatawa, nam cuk ɗewn gaa'a, fat dakalawn gaa hayam lay naɗi su? Nam zlar alkamaren hay borona, cuk orgena hay liyna valamu, nam cuk dana kulo deŋel may su?

²⁶Lawna valamu hatam hagata ta nam jik haya'tawa, nam ɗekem yalda valamawa.

²⁷Kay to ɗewna, san as ligat gu ma nekŋ kalamɗi, sem saretna jik kay dakalawnɗi kaw, may ɗewna tom hiɗi zugulla, ɗewna tom hiɗi goor zugulu kaw.

²⁸Lut alkamaren kayni kay gar futuw ma yi funa, nala kaw, as hot tom lo tom loɗi, san as tomu hay li ma nam jik sem saretna kalam lo kalam lo kay kirapam goyɗi.

²⁹Kayn kaf may goy vi Ma-Vatɗina vi vok-ma-duura pa, gatta valamu na' ɗuw jifiya, wida-yalla valamu na' ŋolo.