Read Masana ESAYA 29 Bible Online

ESAYA 29 - Masana bible

ESAYA 29

¹Joot kay Ariyel[10] joot kay Ariyel, hoyok-ziyna ma David pi guɗukŋa valam hayna. Cukgi busat vun busata, hingi yuldet hob goy hay liya'a,

²may nan ma hot Ariyel gaa'a; tiyna hiɗi yorta ma li'e, nala hoyok-ziyn ma muɗ kiran ki Ariyel nala.

³Nan ma ŋuyag tuwag noŋ cusl', nan ma ŋuyag hiɗi sojena, nan ma gi zlaɓ tagu.

⁴Yak ma hot gaa'a, dita vagu ma may goy vi nagata pa, delag ma dina ma may goy jar butuwn pa, delag ma kali goy jar butuwn pa, delag ma kali goy jar nagan pa ki sa ma kiwena nala, nak ma di yoboy ma hoso-hoson ɗawni, ay goy jar nagan pa.

⁵Sa gaw kag ŋolla ma muɗ ki butuw ma guɗufin nala, sum nisin sa gu'-gu'na sa curoɗ sumuna ma muɗ ki hosona ma dol kuɗ simeɗna nala, kayni ma li koloyo, gosoy wit'.

⁶Ma-Vatɗina vi vok-ma-duura ma co kagu, hiɗi niy-ma-bayna, wiira vi nagata hiɗi suwan ŋolo, hiɗi biira hiɗi simeɗna, hiɗi kuta ta ŋalta.

⁷Jaf-sumun ŋolo sa dur Ariyel, nisi sa min ŋuya'a hiɗi gulmun ma ta'na kaf, nisi ma min co to' gaa'a kaw, nisi kaf ma muɗ ki duwayta ta di sa'a nala, ki va ma vul tuwam kir sa'a hay henjeta nala.

⁸Ki sa ma mayt cumna duwayt dum ala nam ka ti fu dami, bugolda nam fok kulo'o kayni, va may vunamɗi nala, ki sa sa laat lumna duwayt dum ala nam ka ci niy dami, may nam fok kulo kayni, delem soy patat' nala, jaf-sumuna kaf sa dur hiɗiyta vi Siyon nisi ma li ki kayn nala kaw.

⁹Lakgi kiliŋ, muɗgi ɦuyum' yo, dukgi irgiya, muɗgi goy dukiya, nisi tuwura, may kuɗ vinnaɗi, nisi tupa tiŋ-tiŋ', may kuɗ dolay ma galakŋaɗi.

¹⁰Kay Ma-Vatɗina fat ŋusta ta liŋ-liŋgawa goy kigiya, nam dukgi irgiyawa, sa jobta nam kusuɓgi yigiya, sa wi vokgina.

¹¹Slen ma vul tuwam kirgiya kaf, muɗi kirgi ki sle ma ɗoy hay ɗerwella, ma vunam sliraɓi gaa nala, hay li ma vulum mi sa'a kay nam jaŋamu, nam hot dit ala nan asɗi, kay vunam sliraɓi gaa'a;

¹²Lebo ki ɗerwel ma vulum mi sa ma wi jaŋgaɗi, may dum ala jaŋaŋga, nam hot dit ala nan wi jaŋgaɗi nala.

¹³Bum-Sumuna di'e: Ki kayn nala, hay li ma sumun kayni co vok iranu, nisi suburan hiɗi vunsi ma kulon ɦawa; may diksi ka goy gine hiɗi nanu, nisi li nar kuɗan kayni kuɗ vun-ma-gatna ma sumun hatay hiɗi namna ɦawa.

¹⁴Kuɗ kayni, fuma tuwma'awa, nan min muɗ sum nisin ɦuyum' hiɗi ɗekka, hiɗi ɗekka hiɗi sle ma ŋaana; sa yalla, yalda visi ma ba'a, sa yisi wina, wida visi ta kisit ma ŋay goyo.

¹⁵Joot kay nisi sa ŋay tuwsi vok Ma-Vatɗina, kay ŋay lopna visiya, nisi li slen goy hay jufunda, nisi di ala: Sa ma wuma gige? Sa ma ɗuwma gige?

¹⁶Nigi tiwini kayn tiwintige? Sa ma in dowayna ŋra ca hiɗi naga-dirginna su? Dowayna as di tam sa ma inimna ala naŋ may inanɗi su? Doŋolayta as di tam sa ma kota'na ala yalla vaŋ mayɗi su?

¹⁷Hini ir liyn neeɗa, Libaŋ ma muɗ mi gu ma vuɗna, gu ma vuɗna ma muɗ mi juru ma ɦizikŋa may ɗisu?

¹⁸Hay buur namna ɗawni, sa gidiŋŋa ma hum yoboy ma hay ɗerwella, sa dukina ma but goy kay jufunda hiɗi jufunda ta nilta, irsi ma muɗ wi'e.

¹⁹Sa yisi hoti gaana ma li firi suwa hay Ma-Vatɗina, sa hawna jar sum-wurana ma li firiya hay Ma-Peldetna vi Israyel.

²⁰Kay sa ma las sumuna ma li loɗi, sa ma burahta ma hin loɗi, sum sa ay yaway kulo kay sesiya kay li joota ma vatis goyo.

²¹Nisi sa vunsi kal sumun hay kitata, nisi sa gan jawt vok sana hay li ma kitana, nisi sa zut sa ma bay joota gaa hay zulla.

²²Kuɗ kayni Ma-Vatɗina, namu ma gus Abraham, nam ma di tam jafna vi Yakub ala: wulin kayni Yakub ma li zulo'o loɗi, wulin kayni iram ma liwek loɗi.

²³Kay hay li ma gurona valamu, irsi wi lopna vi ɓanawa jarsiya, nisi ma li semda van goy peldete, Ma-Vatɗina vi Yakub nisi ma li semda valam goy peldete, nisi ma li nari kay Lawna vi Israyel;

²⁴Nisi sa ŋusta visi ay viy goyo yisi ma muɗ wi'e, nisi sa ay ŋurnaya ma fi hatta.