Read Masana ESAYA 3 Bible Online

ESAYA 3 - Masana bible

ESAYA 3

¹Awa, wulini Bum-Sumuna Ma-Vatɗina vi vok-ma-duura ka yaw tina hiɗi gutda goy hay Yerusalem kafe, tina hiɗi niyn ma ŋomi kulona nam ka yawam goyo,

²sa ma donona hiɗi sa ma duura, sa ma ka kitata hiɗi sa ma jobta, sa ma tun gireyta hiɗi sa ma maara,

³sa ma ŋolla vi vok ma dok-vaslna hiɗi sa ma hay jaf-mulda, sa ma vul gatta, sa ma nagay ŋaa'a kay kot slena, sa ma li gul-yalda.

⁴Nan ma tun sum sa joriyon kisi mulu, gurosgurayna ma ti mulda kisiya.

⁵Jar sumuna, sa hena ma curoɗ sa hena, gigekaw ma curoɗ sugolomna; sa ma joriyona ma nef sa ma maara, sa ma niyam mayɗina ma nef sa ma sumun slum yalam kulona.

⁶Hay na'ta san ma bow ɓasulumna vo hay ziyna vi bulumu, ma dum ala: Naŋu sligar-tuwna vaŋ ka'a, tunaŋ mul kuma'a, liyn ma ɓulakay goyn kayni naŋ ma slum lawam hay ɓaŋu.

⁷Hay buur namna ɗawni, nam ma pat delem kulo'o kay di ala: nan may mi doktorɗi, vo vanu fu mayɗi, sligar mayɗi lay; nigi ma tunan ŋol kay sumunɗi.

⁸Yerusalem ka geɗa, Yuda ka ɦo gaa'a kaw, kay yoboyna visiya hiɗi lopna visiya gaw hiɗi Ma-Vatɗina, nisi min cuk irsi kay ŋolda valamɗi.

⁹Irsi ma ɗuwna li di-goyt kisiya. Ki Sodoma nala, nisi siwel goy kay sulukŋa visiya, nisi may ŋayamɗi. joot kisiya, kay nisi kot joota.

¹⁰Digi ala: Sa ma ɗigera ka hay hagata ŋaata, sumun ma ti vuɗna vi lopna valamu.

¹¹Joot kay sa ma dikam joona, kay nam ka hay hagata joota, kay va ma nam kotom hiɗi ɓalamna ma hot kalamu.

¹²Sumuna vanu muɗi curoɗsi si gurosgurayna, boyna ka ti mulda kigiya, sumuna vanu, sa tuni vokgina viygi goyo, hagata ta nigi poy haya'ta nisi ɦasa' goyo.

¹³Ma-Vatɗina colawa kay ɗiger lawta, nam colawa kulo'o kay ka kitat kay sumuna.

¹⁴Ma-Vatɗina kitat ka jaram hiɗi sa maariyana vi sumuna valamu hiɗi sa ŋulona visiya; nigi mut gulda-guldanawa, slena vi sa ma hawna ka vo hay ziyna vigiya.

¹⁵Nigi min tay sumuna van gaa'a kay mige? Nigi li ɦawlat tam sa ma hawna kay mige? Din mi Bum-Sumuna, Ma-Vatɗina vi vok-ma-duura.

¹⁶Ma-Vatɗina di'e: kay guro-boyna vi Siyon subur tuwsiya, nisi poy hiɗi delsi kulo tuni tiriŋ', ɗuw hiɗi irsi pekiya, nisi giɗaya, muzuk girliŋ ma gaa sesina,

¹⁷guro-boy sa hay Siyonna Bum-Sumuna ma welsi yisi goyo, Ma-Vatɗin ma foksi goy nala'a.

¹⁸Hay buur namna ɗawni, slen ma san gan tuwam hiɗi namna Bum-Sumuna ma yawam goy kafe: girliŋŋa, sle ma gum kelsina ma beɗay ki fatta nala, hiɗi sle ma beɗi ki tilla nala,

¹⁹sle ma gum humsina, tuju ma ɓamna, hiɗi sligar ma bar kisina,

²⁰Jakawa ma nisi kuluɓum kisina, jaɓ ma nisi cukum sesina hiɗi kanti ma ciliyna, gasas ma urdin hayna hiɗi sle ma duɓina,

²¹wayta-ɓamta hiɗi sle ma gum cinsina;

²²sligar ma ŋaana hiɗi rob ma fiyokŋa, sligar-ciliyna hiɗi birimna,

²³daraŋgalla hiɗi sligar ma iram goy yalalla, sligar ma ɗutum kisina hiɗi mantilla.[3]

²⁴Hay baŋal urdina, nisi ma fi milla; hay baŋal kantina, nisi ma fum mi zigewna, hay baŋal yam ma giy gaa ŋaana, nisi ma fum mi yam ma goy welina; hay baŋal sligar-ciliyna, nisi ma fum mi birim ma ɗutina; tuwsi ma mun kil kil', ma hot li jifiy loɗi.

²⁵Sumuna vigiya ma cuk gaa vok kew-gaferaŋa, sa donona vigiya ma mit vun duura.

²⁶Vun-galana vi Siyon ma kal hay yorta, sumun ma foksi goy nala'a, nisi ma lak gaa butuwu.