Read Masana ESAYA 30 Bible Online

ESAYA 30 - Masana bible

ESAYA 30

¹Joot kay guro sa ŋel gatta, din mi Ma-Vatɗina nisi li ŋra-vunda bay nanu, jun bonota bay ŋusta vanu, kay zat sulukŋa tam sulukŋa.

²Nisi tuni goy hay hagata kay kal hay Egipte bay jobanu, kay tuɗ gar liy ma ŋayna kat Farawn, nisi gar liy ma ŋayna kuɗ ɗuŋus Egipte.

³Ŋayta vigi kat Farawn ma muɗ zulo kigiya, ŋayta vigi kat Egipte ma viygi goyo.

⁴Sa ministrena visiya coy hay Sowan vatiya, sa nisi cuksi sunna coy hay Hanes.

⁵Nisi kaf ma muɗ zulo'o kay sum nisina as gutsiɗi, as gi dirsi kuɗsiɗi, gut kisiɗi kaw, may sum nisina ma hinsi muɗi zulo'o, hinsi cawi yuloŋ'.

⁶Law kat muuriya ma hay fulda. Hay nagata ta vun lawta hiɗi yorta, nagata ta zlo ma jufta hiɗi zlo tan-cata ka haya, nagata ta guy-golina hiɗi gana-ganna ma pir kulona ka haya, nisi ka ziy jakŋa visi kulo ŋor kurona, nisi ka ziy timgilla visi kulo ŋor lamgana, kay naram tam sum sa may as gutɗi.

⁷Gutda vi Egipte na' ɦawa'a, waa'a kaw, kuɗ kayni nan yi gutda visi ala: winek ŋolla ma vat goy ɦawana.

⁸Naŋay wulini, ɗoŋ slen kayni vok irsi hay tablona, naŋ ma ɓirim gaa hay ɗerwele, kay nam ma mus ta-ta hay buur ma cawna, kay nam ma mus dok-dok hay vatɗita.

⁹Kay nisi si sum sa ŋel gatta, kay nisi si guro sa wuli joo, guro sa min hum gatta vi Ma-Vatɗinɗi.

¹⁰Nisi di tam sa wi slen ala nigi ma wi slenɗi, nisi di tam sa wi voksin ala, sle ma vokŋa nigi ma dumat goy hay liyamɗi, nigi ma dumat mi sle ma ɗutna, nigi ma dumat ti sinda.

¹¹Vigi tuwgi goy hay hagana, calgi goy hay haga gurayna, yawgi Ma-Peldetna vi Israyel goy vok irma'a.

¹²Ki kayn nala Ma-Peldetna vi Israyel ka di ala: kay nigi noy yoboyn kayni goyo, kay nigi tun vida vigi hay ɦawlata hiɗi calta-goyta, nigi gah tuwgi tisiya kaw,

¹³Joota na'ta ma li kigi ɗawni ki gulmunna ma hoyokom kulo muni til', bugolda hoyokom ma kulona curoɗ goyo, ɦo-gaata valamu co wulini wulini, mus ta-taɗi nala.

¹⁴Nisi tom goyo ki to doŋolayta vi sa ma in dowayn nala, nisi tom goy huɗum huɗum', ŋarak ma hin goyo kay sli ku hayam mayɗi, diram ma hin goyo kay go niy hay kaar mayɗi kaw.

¹⁵Kay Bum-Sumuna, Ma-Vatɗina, Ma-Peldetna vi Israyel ka di ala: Su'da vigi ma may goy ɗawni hay li ma nigi hot tanu, hay li ma nigi lak hay kiliŋga, hay musta-ŋalda hiɗi vida, nigi ma fi donota. May nigi minɗi.

¹⁶Nigi di ala a'a, numa ma mun jaŋi kay kulumayna! Kuɗ kayni nigi ka mun jaŋi. Nigi di ala numa ma ɓe kay kulumay ma jaŋ koloyna! May nisi sa digiɗgina ma jaŋ koloy lay.

¹⁷Sumun birimi ma mun jaŋi vok sa ma kepna, vok sumun vasl ɦawa nigi kaf ma mun jaŋi, ta-ta nisi ma ɓal kulo kay hiɗiyna, ki gu ma gaɓ drapon kulo talam kay hiɗiyna nala, ki va ma ɗek-goyna nala kulo kay hiɗiyna.

¹⁸Kay na'ta Ma-Vatɗina ka cuba kay ligi slugo'o, ki kayn nala nam ma fok kulo'o kay wigi hawgiya, kay Ma-Vatɗina nam mi Lawn ma gasiya, sle'ta ka kay nisi kaf sa zamam ɓalamu.

¹⁹Kay sum sara ma li ziy hay Siyon, hay Yerusalem lo, nigi ma tiy loɗi, nam ma ligi slugota hay li ma nigi siwelawa talamu; hay li ma nam hum yita vigiyawa, nam ma hotgi dita.

²⁰Bum-Sumuna ma vulgi funa hay li ma nigi ka vun zlata, nam ma vulgi niyna hay li ma laat ka'a, sum sa hatgiya ma lak goy gine loɗi, may irgi ma cuk kay sum sa hatgina.

²¹Humgi ma hum sa siwel ŋorgi ala: hagat ɗawni, jikgi haya'a, hay li ma nigi jik gal gulu lebo hay li ma nigi jik gal jufu.

²²doorota ta nigi kor tuw sle ceɗayna vigi hiɗi na'a ma muɗ kirgi liwisi, ora ma kori talamna kaw, nigi ma cukum goyo ki sle ma liwisi nala, nigi ma di talam ala «vaŋ tuwaŋ goy tanu».

²³Ki kayn nala nam ma si niyn gaa kay jafna, ma nigi cukum gaa hay nagata, tin ma nigi ma fum hay nagatna ma li jibete, as hobgi kaw. Hay buur namna ɗawni, liyn ma farayna vigi ma ti hat hayna ma li siriŋ siriŋ'.

²⁴Luwayna hiɗi kurona ma zum sinena, ma ti hat ma liŋŋa, hatna ma fatay goy gaa'a hiɗi cikakŋa. Gasay hiɗi bisina kaw.

²⁵Hay buura vi ci-goyta ŋolda ɗawni, hay li ma simdira ma ɦo gaa kaf ɗawni, niy-ma-riŋŋa hiɗi goloŋŋa ma hob kulo hay hiɗiyna hiɗi diŋiriŋŋa,

²⁶haraŋa vi tilla ma muɗ ki haraŋa vi fatta nala, haraŋa vi fatta ma li ŋolo sem siɗiya suwa, ki haraŋa vi buur siɗiya nala. Hay buur ma Ma-Vatɗina ma jun vun milla vi sumuna valamu, hay li ma nam ma cit vun mulla ma nam kaam goyna.

²⁷Humgiya, semda vi Ma-Vatɗina may goy gine pa, ɦiyda valam dono'o, kayn mi hiwliŋ ma neke, vunam hobay hiɗi purcakka. Sinamu ki kuta ŋalta nala;

²⁸sukŋa valamu ki niy-ɓatna ma kulfut goyo, ma co ta-ta kulo del sana. Kay gaz jaf-sumun goyo hiɗi temena vi ɓulakka-goyta, ki jaman ma ɗutna kuɗ gaŋ-sana nala.

²⁹Nigi ma gi nulla ki henjeta ta sumun li yuldet haya'ta nala, dikgi ma li firiya ki sa ma giɗay kuɗ del zlekemna nala, kay kal hay hiɗiyna vi Ma-Vatɗina, tam hiɗiyta vi Israyel.

³⁰Ki kayn nala Ma-Vatɗina ma di delem ma gaŋeraŋa, gilaŋam ma ka hiwet hay ɦiyda valamu nam ma vum goyo, hiɗi kuta wileta ta ŋal slena, hay niy ma tiyna, simeɗna hiɗi mogoyna.

³¹Ki kayn nala, kuɗ della vi Ma-Vatɗina, sa ma Asiriyana ma muɗ nari, Ma-Vatɗina ma cum hiɗi zugulla valamu.

³²Hay li ma Ma-Vatɗina cum hiɗi zugulla sem kep kayni, sumun ma hum del darayna hiɗi del dilla; Ma-Vatɗina ma durum hiɗi ɓalam goy meɗiya.

³³Kay liyna vi Tofet,[11] ka koti goy jew ɓa-ɓa, tuwam ka koti kot kay gi mulla hayamu. Nam gaa zulu, goy beɗay hiriŋ-hiriŋ' kaw; gun ka moli kalam ŋolo, kut ka ŋal kuɗumu ŋolo kaw, sukŋa vi Ma-Vatɗina ka fo kut kuɗumu, ki kut sufre* ta ka riŋ ki niy-ɓatna nala.