Read Masana ESAYA 31 Bible Online

ESAYA 31 - Masana bible

ESAYA 31

¹Joot kay nisi sa tuɗ hay Egipte kay gar gutda, sa tun vida visi kay kulumayna, sa gar gutda tam keke-ma-duura kay nam ka ŋolo, sa tun vida visi kay sa jaŋ kulumayna kay nisi dono'o, May cuk irsi kay Ma-Vatɗina vi Israyelɗi, gar Ma-Vatɗinɗi kaw.

²Nam kaw, nam yali kay mar joota kisiya; nam may yaw dita ta nam da'ta goyɗi; nam fok kulo'o kat ziyna vi sum sa joona, hiɗi gutda vi nisi sa li bay-ɗigerta.

³Sa ma Egipten mi sa-wura'a, may mi Lawnɗi; kulumayna visi mi sliwi, may mi ŋusɗi, hay li ma Ma-Vatɗina meɗ ɓalamawa goyo, sa ma gut kisina dugum ma cumu, sa ma nisi sa fi gutda kuɗumna ma puk gaa'a, nisi kaf ma ba goyo.

⁴Kayni mi va ma Ma-Vatɗina di tanu: Ki zlona hiɗi ki goor-zlona ci gumu kay sliw va ma nam vumna nala, la sum sa ŋom farayn ka ŋolo, la nisi ka winek ŋolo kaw, nam as muɗ nar kisiɗi, ki kayn nala kaw Ma-Vatɗina vi vok-ma-duura ma jikay gaa'a, kay li duura kulo kay hiɗiyta vi Siyon hiɗi hiɗiyta valamu.

⁵Ma-Vatɗina ma bar glaŋam goyo ki layna nala, kay ŋom Yerusalem, nam ma gut ka'a, nam ma buta' goyo, nam ma hulota' goyo, nam ma suɗa' goyo kaw.

⁶Hotgiyay tam nam ma nigi cal goy hiɗi nam ginena, nigi gurona vi Israyel.

⁷Nala hay buur namna ɗawni, gigekaw ma noy lawayna valam ma waana, ma doorona hiɗi ma ora goyo, namu ma nigi kotom kigiya hiɗi ɓigiya.

⁸Nala sum sa Asiriyana ma puk gaa'a vok kew-gaferaŋa ma may kotom mi saɗi, kew-gaferaŋa ma may kotom mi sa-wuraɗina ma calsiya, nisi ma pir jaŋi vok kew-gaferaŋa, gurona visiya sa joriyona ma kal goy li lop ma gorvo'o.

⁹hiɗiyna[12] visiya ma pir jaŋi kay narta, sa ŋulona visiya ma li nari vok drapona, Din mi Ma-Vatɗina, ma kuta valam ka hay Siyon, ma kuta slaw keŋga valam ka hay Yerusalem.