Read Masana ESAYA 32 Bible Online

ESAYA 32 - Masana bible

ESAYA 32

¹Mul kep ma ti mulda hiɗi hagata gasita. Sa yerimana ma ti mulda hiɗi ɗigerta.

²Gigekaw jarsiya ma li mi va ma kusuɓ sumun kay simeɗna, liyn ma san ŋay talamu kay billa. Ki niy-ɓatna hay liyn ma soy goyn nala, ki ŋus hiɗiy ŋolla hay yam naga ma soy goyna nala.

³Sum sa irsi wina irsi ma duk loɗi, sum sa humsi humna ma muɗ jak humsiya.

⁴Sum sa vaara visi kiɗayna ma muɗ yali kay huma, sum sa vunsi daari vunsi ma muɗ law koloyo, law cet-cete kaw.

⁵Sa ma ɦay-ɦayna sa ma yum ala sa ma ŋolla loɗi, sa ma li yam sumuna sa as yum ala sa ma ŋolla loɗi.

⁶Kay sa ma ɦay-ɦayna dum mi law ma waa ɗaara, dikam vuli tam joota kaw kay li jiw-zlata, nam di sle ma waana tam Ma-Vatɗina, nam hin sa ma mayt cumna goy hiɗi goslom liyok' ɦawa'a, nam sli niyn goyo kay sa ma laat lumna.

⁷Sa ma li yam sumuna ɗutta valam guni ŋolo, nam ŋra law ma slugutin, kay ba sa ma hawn goy hiɗi yoboy ma sinna, la lawta vi sa ma hawna hay hagata va'a kaw.

⁸May sa ma ka hiɗi varta ŋaata niŋam mi law ma ŋaana, nam col kay varta ta ŋaata.

⁹Nigi boy sa may kis kigiɗina, yawgi kulo'o, humgi delanu, nigi guro-boyna sa sar tuwgi hay sle'ta, jakgi humgi tam dita vanu.

¹⁰Hini busat kep hiɗi buur neeɗa, nigi ma geɗa, nigi boy sa may kis va kigiɗina; kay jana vi gulda-guldana ma li loɗi, feɗna as co loɗi kaw.

¹¹Jiriygiya, nigi boy sa ɗeŋ kiŋ-kiŋŋa! Hin tuwgi muɗ geɗa, nigi boy sa sar tuwgi hay sle'ta. Fokgi sligar ma tigin goyo, tuɗgi goy nala'a, cukgi kantin furgiya.

¹²Togi ɓigi war-diggiya, tigi do'olla kay sine ma ŋaana hiɗi gulda-guldana vigi ma vuɗ ŋaana.

¹³Tiygi kay sinena vi sumuna vanu ma popon ka ɗuf haya, tiygi kay ziy ma ay jew hobay hiɗi firita, tiygi kay liw ma ay jew giji-giji hay hoyok-ziy namna.

¹⁴Ziy ma mulda noyay goyo, hoyok-ziy ma winekŋ ay hayam ŋolla noyay goyo; hiɗiyta hiɗi simdira ma muɗ ɗawni, mi liy ma musta ŋaata vi kuro ma fulla, hiɗi liy ma farayn ti hatna.

¹⁵Ta-ta hay li ma ŋusta mer goy kaya ay kulo pa, ta-ta hay li ma fulda muɗ mi liy ma pi gu ma tina, ta-ta hay li ma gu ma tina muɗ goy juru'u.

¹⁶Ki kayn nala ɗigerta ma mus hay fulda, gasita ma mus jar gu ma tina may.

¹⁷Vuɗna vi gasita ma li ɗawni ti toyta, wurakŋa vi gasita ma li ɗawni ti tun-sukka hiɗi sle'ta kay dok-doko.

¹⁸Sumuna vanu ma li ziy hay liy ma sleɗna, hay ziy ma ɦo gaaɗina, ŋayay goy hay liy ma tuni kiliŋŋa.

¹⁹May mogoyna ma par fulda goyo, hoyok-ziyna ma toys gaa kurup',

²⁰Sle'ta ka kigiya, nigi sa cuk jafna deŋel niyn kaf, nigi sa gra dirla ma sem luwayna hiɗi kuron goyna.