Read Masana ESAYA 33 Bible Online

ESAYA 33 - Masana bible

ESAYA 33

¹Joot kaŋ naŋu ma ka vuruma, bay nisi vurumaŋ naŋu. joot kaŋ naŋ ma di newta, bay nisi di newt kaŋu. Hay li ma vurum ma naŋ vurumumna vatawa, nisi ma vurumaŋ naŋu; hay li ma di newta vaŋ vatawa, nisi ma di newt kaŋ naŋu.

²Ma-Vatɗina, laŋ slugot kuma'a, numa ka zamaŋ ɓaŋu. Naŋ ma li mi donota vuma'a, hay graw culumta kafe, naŋ ma li mi su'da vuma'a, hay li ma numa ka vun-zlata.

³Hay li ma suwan ka'a, sumun mun jaŋi, hay li ma naŋ fok kulo'o, jaf-sumun mer goyo.

⁴Nisi ka ti slena vigi ɓuraŋi, ki baar-bobona ka ti slen nala, nisi ma mol gaa kay slena, ki baar-burina mol gaa kay wan nala.

⁵Ma-Vatɗina ka kulo gine'e, kay ziyna valam ka kulo'o; nam hob Siyon hiɗi ɗigerta hiɗi gasita.

⁶Nigi ma lak ɗawni hay sle'ta. Yalda hiɗi wida kayni mi yalla ma suɗ san goyo; narta kuɗ ma Ma-Vatɗina, kayni mi farayna visiya.

⁷Ɗuwgi sum sa donona ka ci lulu goy jiy tige! Sum sa jaŋ labara vi toyta ka tiy dono ŋolo.

⁸Hagata hini goy ɦawa hiweŋ'; sa ma jik hay hagat may loɗi, nam kus bonotawa, nam noy hoyok-ziynawa goyo, nam may sli yam sa kulo loɗi.

⁹Nagat ka ti do'olla, na' ka so goyo, nagata Libaŋ muɗi zulo'o, slen ka liweka; fulda vi Saron soy goyo; hum-gu ma hay Basan hiɗi Karmel ka yak goyo.

¹⁰Wulin kayni nan ma fok kulo'o, din mi Ma-Vatɗina, wulin kayni nan ma col kulo'o, nan min ɗek ŋolda van goyo.

¹¹Nigi sli hayawa hiɗi hosona, nigi vuɗ usnawa, sukŋa vigiya ti kuta ta min ŋalgiya.

¹²Sumun hayɗin ma muɗ ki giwin ma ŋal butuw-kun hayamna nala, nisi ma muɗ ki zigiy-olla ma kaay goyo ma ka ŋal hay kuta nala.

¹³Nigi sa ka goy gine'e, humgi va ma nan lumna, nigi sa ka goboyna, wakgi donota vanu.

¹⁴Sum sa sulukŋa muɗi nari hay Siyon, sa li semda van goy waana tuwsi ma visi bat-bat', sa ma jaraya ma as mus kulo vun kuta ta ŋal hiɗi dono'o mi gige? Sa jaraya ma as mus kulo vun veŋ ma kuta valam vatɗina mi gige?

¹⁵Kayni mi sa ma poy hay ɗigerta, sa ma law hiɗi gasita, ma min fi gurjuta hiɗi hagata ta gunitaɗi, sa ma po ɓalam goyo kay yaw va kay saɗi, sa ma duk humamu kay hum law ma ɦok busuwn goynɗi, sa ma duk ɓalam kiramu kay iram wi jootɗi.

¹⁶San kayni ma mus hay liyn ma kulo jamna; hiɗiy ma donona ma lin mi liy ma ŋayna valamu; tina valam ma li dok-doko, niyna ma cina valam ma li dok-doko kaw.

¹⁷Iraŋ ma wi mulla hay gajijita valamu, nisi ma peɗ nagata hiɗi buɗukŋa va' kafe.

¹⁸Humaŋ ma gaŋ kay narta ta jewta: Sa ma ɗo slen ka arige? Sa ma tar slen ka arige? Sa ma ay cigeɗ simdira ka arige?

¹⁹Sum sa ɦawlana iraŋ ma wisi loɗi, sum sa vunna visi slugutiya, sa vunna visi hum kay saɗi, sa vunna visi lo'otoko, san as humum cawam ŋaaɗi.

²⁰Iraŋ ma wi Siyon, hoyok-ziy ma nay ma ŋaf haya. Iraŋ ma wi Yerusalem, liyn ma musta ma ŋal kiliŋga, guɗukŋa ma san as giram kulo kay ziyim kalam loɗi, gu-ɓalla valamu ma pat kulo loɗi, zigewna valamu ma but goy loɗi.

²¹Kayni mi liyn ma Ma-Vatɗina ŋaa ŋolo kay naya, namu mi niy-lumna vaya, namu mi niy-ɓatna ma goy beɗayna vaya, batoona ma duura as jik hay niy-lum namna loɗi, lumay ma ŋulona as jik hayamɗi kaw.

²²Kay Ma-Vatɗina mi ma ka kitata vaya, namu mi ma kot gatta kaya, Ma-Vatɗina mi mulla vaya, namu mi ma suɗay goyna.

²³Zigewna vi lumayna vigi cukawa halɓati, nam as vi guna vi drapot kulo ɗeŋ loɗi, nam as vi sligara kulo ɗeŋ loɗi. Nala nay as ɓuraw sle ɓuraŋŋa ma zututna jaraya, sum sa dirlayn kaw as ti ɓuraŋi.

²⁴Sa ma hay nagata ma as di ala «nan moyo» may loɗi. Sum sa ziy hay Yerusalemna fi gidawa kay joota visiya.