Read Masana ESAYA 34 Bible Online

ESAYA 34 - Masana bible

ESAYA 34

¹Nigi jaf-sumuna, nigiyay goboyo kay huma, nigi sumuna, jakgi humgiya. Hin nagat huma, na'a hiɗi sle ma hobay haya' kafna, nagata hiɗi sle ma vuɗ gaa ka' kafna.

²Kay ɦiyda vi Ma-Vatɗina ka nig gaa kay jaf-sumun kaf, purcakka valamu ka nig gaa kay vok-ma-duura visi kaf: Nam min cisi goyo, nam ka vulsi tam cimta-goyta.

³Sa mitina visiya ka cuki goyo, tuwna vi sa mitina visiya ka his buwiya, hiɗiyna muɗi slawi hiɗi busuwna visiya.

⁴Vok-ma-duura vi dukalawna ma ɓulak goyo, dukalawna ma ɗut kulo'o ki zlatn nala. Vok-ma-duura visi kaf ma so goyo, ki hum gu gulda-guldana so goy nala, ki hum gu-gumna so goy nala kaw.

⁵Kay kulo hay dukalawn pa kew-gaferaŋa van ɦoyawa; nam ma jik gaa kay Edom, kay sum sa nan tunsiyawa goy kay cub kitata.

⁶Kew-gaferaŋa vi Ma-Vatɗina hobay hiɗi busuwna, seti hiɗi mula, hiɗi busuwna vi fok-dimina hiɗi busuw fok-ŋekŋa, hiɗi mul-glesna vi fok-gamalana; kay ɗifinna vi Ma-Vatɗin ka hay Bosra, cimta-goyta ŋolda ka hay nagata Edom.

⁷Funna ka cuk gaa hiɗi nisiya, luwayna hiɗi luway-jufayna kaw; nagata visi ka ɦoy hiɗi busuwna, butuwna vi nagata visiya ŋuruɓi hiɗi mula.

⁸Kay kayni mi buur ma job-yamna vi Ma-Vatɗina, mi buur ma job wurakŋa kay sum sa hay Siyon.

⁹Lokŋa vi Edom ma muɗ goy ki dubaŋŋa nala, butuwna va' ma muɗ goy ki kuta sufre* nala; nagata visiya ma muɗ ki diyakŋa ma war sana nala.

¹⁰Na' ma tew hay henjetɗi hay falaytɗi kaw, kut ma pat kulo'o dok-doko, busat ŋolo nagat ma hin goyo, ta-ta lancitige kaw sa as jik ka' noŋɗi.

¹¹Gudufna hiɗi cem-cemna ma sli liy namna, glaw-glawna hiɗi jarakŋa ma li ziy haya, zigewna vi ɦo-gaata hiɗi plomna vi ɓulak-goyta sumun ma vum goy gaa hay liy namna.

¹²Sa hay jaf-mulda visiya ma tuɗ ɗawni kay tun mulda noŋɗi, sa yerimana visiya ma muɗ say loɗi.

¹³Gu-zigiyna ma day baŋal ziy ma mulda visiya, sa'arayna hiɗi jikisna ma day baŋal gulmunna visiya. Ma li ɗawni mi liyn ma musta vi cekemna, liyn ma rigetna li ziy haya;

¹⁴muuriya ma hay fulda ma ŋaf hiɗi durnay ma fulla, fok-ŋekŋa ma yi tuwam jar tuwamu; ful ma henjetna ma li ziyna valam haya, ma fi liyna valam ma tun-sukŋa kaw;

¹⁵Ɗawni guyna ma tun tokosayna valamu, ma gi sena valam haya kaw, ma esl sen goyo, ma yaw gurona valam kuɗ ŋusamu, ɗawni bakŋa ma tok tuwam noŋ kafe.

¹⁶Sargi ɗerwella vi Ma-Vatɗina, jaŋgita, ma jaram kiɗa goy kep kaw mayɗi. Hena hiɗi hen kaf, mara as hin goyɗi; kay nam vul hagatawa. Ma toksi yisi ɗawni ti ŋusta valamu.

¹⁷Nam li ŋaɓta kuɗ haytawa kisiya, nam yaw zigewnawa kay li ŋaɓta misiya. Naga na'ta ma muɗ ir visiya kay dok-doko, nisi ma li ziy haya'a busata busata kaf.