Read Masana ESAYA 35 Bible Online

ESAYA 35 - Masana bible

ESAYA 35

¹Fulda hiɗi naga ma soy goyna ma li firiya, ful ma us hayamɗina ma li firiya, ma ɓo ki duɓar-ŋakŋa nala;

²na' ma hob hiɗi ɓona, ma siwel hiɗi nul ma firina ta-ta haya' ma sleɗa; gajijita vi Libaŋ ma vulis ta'a, jifiyta vi Karmel hiɗi Saron kaw. Nisi ma wi gajijita vi Ma-Vatɗina, nisi ma wi jifiyta vi Lawna vaya.

³Muɗgi ɓigi ma maŋayn dono'o, vulgi donot mi ŋulofgi ma ka vigi bat-batna.[13]

⁴Sum sa diksi ka visi bat-batna nigi ma di tisi ala: Muɗgi tuwgi dono'o, lakgi bay-narta; Lawna vigi zawni, job-yamda ma co'o, wurakŋa vi Lawna ma co'o; nam kay tuwam ma co'o, ma suɗgi goyo.

⁵Ki kayn nala ir sa dukin ma mal goyo, hum sum sa gidiŋŋa ma mal goyo kaw.

⁶Ki kayn nala sa ma dirlayna ma muɗ pir kulo'o ki buɗugoora nala, sa ma vunam diɗina vunam ma muɗ di'e. Kay niyna ma muɗ riŋ goy hay fulda pa, niy-ma-riŋŋa ma jaŋ goy hay fulda vi Araba pa.

⁷Yam-nagat ma wilena ma muɗ goy goloŋo, nagata ta soy goyta ma muɗ goy kaar ma niyna; cerewna hiɗi zlayna ma day hay baŋal liy ma cekemna ay bur haya.

⁸hagat tara'a ma gi'e, haga heta ma gi'e kaw; nisi ma ya' ala hagat ta peldetta, sa ma liwisi as jik haya' noŋɗi; na' ma li visi nisi tuta, nisi sa jik haya' ɗawni, la si sum sa ɦay-ɦayn kaw nisi as viy goyɗi,

⁹zlona ma li hay haga na'ta loɗi; muur ma siyna as sli haya' loɗi, sa as ŋaf muur ɗawni loɗi. Ma poy haya' ɗawni si sa buti goyna;

¹⁰ki kayn nala nisi sa Ma-Vatɗina butsi goyna ma hota, nisi ma co hay Siyon hiɗi nul ma kolda, firita ta vatɗita ma tun kisi bogoraya; cenda hiɗi firita-ŋolda ma fi tuwa'a, yor-tuwta hiɗi tiy-tuwta ma pir jaŋi.