Read Masana ESAYA 36 Bible Online

ESAYA 36 - Masana bible

ESAYA 36

¹Hay busata doogo yam fiɗita vi mulla vi Ezekiyas kayni, Sankerib mulla vi Asiriya co'o, hoyok-ziy ma donona vi Yuda kaf nam mokomu, yawam kaw.

²Hay Lakis pa, mulla vi Asiriya gi Rabsake hay Yerusalem tam Ezekiyas hiɗi sojen kuɗum ŋolo. Nam col kulo vun ɦiira vi goloŋ ma ŋolla, hay hagata vi sinena vi sum sa muz sligara.

³Ki kayn nala, Eliyakim goora vi Hilkiya, ma ŋolla hay ziyna vi mulla kali goy kiramu, hiɗi Sebna ma ɗo slena, hiɗi Yowah goora vi Asaf, ma ŋom sle ma ɗoyna.

⁴Rabsake di tisiya: Nan siɗawgi kay nigi ma di tam Ezekiyas ala: Mul ŋolla, mulla vi Asiriya ka di ala: Vida vaŋ na'ta naŋ tuna' kayn kay gige?

⁵Nan fi daŋ ala yoboyna vaŋ yawni mi yoboy ma jar simeɗ ɦawa, a san li duur kayni, ŋra-vunda ma li'e, nam ma li hiɗi dono'o kaw. Wulin kayni, naŋ tun vida vaŋ kayni kay gige kay fok kulo kanu?

⁶Wulini naŋ tun vida vaŋ hay Egipte, Egiptena sa naŋ min ala nisi gut kuɗaŋu kayni, nisi ŋray ca ki cerew ma kusin nala, sa ma ret ɓaŋ gaa kalamna nam duɓum kulo ɦuluk', Farawn mulla vi Egipte kaw nam nala kay sum sa tun vida visi hayamu.

⁷Kla, nigi ma dan ala nigi tun vida vigi kayni kay Ma-Vatɗina Lawna vigiya. May kayni mi Lawn namna ma Ezekiyas to liyn ma ɗiŋiriŋŋa hiɗi giwin-ma-ɗifinna valam goyna, hay li ma nam di tam jafna vi Yuda hiɗi Yerusalem kaf ala: Nigi ma girif gaa vok giwin-ma-ɗifinna zawni, naɗi su?

⁸Wulin kayni nan siɗawaŋu, laŋ ŋra-vunda hiɗi mulanna, mulla vi Asiriya, nan ma vulaŋ kulumayn birim ma', la naŋ as gar sum sa ɓe kalamna,

⁹(hiɗi kulumay namna) naŋ fi digiɗ soje ma gooro jar sa sunda vi mulanna su? Naŋ tun vida vaŋ kay Egipte kayni kuɗ keke-ma-duura hiɗi sum sa ɓe kalamna.

¹⁰Naŋ var ala nan co kay ɓulak liyn tan kayni bay minda vi Ma-Vatɗina su? Kay Ma-Vatɗina dan ala: Tuɗaŋ dur naga na'ta, toŋgi gaa'a.

¹¹Eliyakim, Sebna hiɗi Yowah di tam Rabsake: Naŋ ma law tuma'a hiɗi vun Arameena, numa as humumu, naŋ ma law tuma'a hiɗi vun Yudiyanɗi, kay a sum sa dakay kulo kay gulmunna ma humɗige!

¹²Rabsake hotsi dit ala: mulanna ganay kayni kay nan ma law taŋ naŋu hiɗi mulaŋŋa tuta su? May tam sum sa moli kulo kay gulmunna tani, nisi sa (hay buur ma vokŋa) ma ti suɗoysiya ci zumursiya hiɗi nigi kaw lakŋɗi su?

¹³Ki kayn nala Rabsake ɦur kulo goboyo, nan siwel hiɗi delem kulo ŋolo hay vun Yudiyan ala: Humgi dita vi mul ŋolla, mulla vi Asiriya!

¹⁴Mulla vi Asiriya ka di ala: hin Ezekiyas ɗutgiɗi, kay nam as butgi goy hay ɓanɗi.

¹⁵Hin Ezekiyas muɗgi a nigi tun varta vigi kay Ma-Vatɗina ala nam as butgi goyoɗi, hoyok-ziyna vigi tani ma vulis goy hay ɓam mulla vi Asiriya.

¹⁶Humgi kuɗ Ezekiyas noŋɗi, kay mulla vi Asiriya ka di ala: toygi hiɗi nanu, vulgi tuwgi hay ɓanu, nala gigekaw ma ti gulda-guldana hiɗi gu-gumna valamu, gigekaw ma ci niy-kaara valamu may,

¹⁷ta-ta hay buur ma nan ma ma'a, buur ma nan ma nargi hay nagata ta ki nagata vigi nala, hay nagata vi alkamarena hiɗi vinna, nagata vi funa hiɗi gulda-guldana.

¹⁸Hin Ezekiyas zutgi a di ala Ma-Vatɗin ma butma goyoɗi. Lawayna vi jaf-sumuna but nagata vi sum nisina goy hay ɓam mulla vi Asiriya but su?

¹⁹Lawayna vi Hamat hiɗi Arpad ka arige? Lawayna vi Sefarvayim ka arige? Nisi but Samariya goy hay ɓan but su?

²⁰Jar lawayna vi naga namna lakŋi, law mara ma but nagata valam goy hay ɓan mayɗi ni, Ma-Vatɗina vigi as but Yerusalem goy hay ɓan ɗawni hiɗi yal mige?

²¹Sumuna zan ɦim', min hotom dit noŋɗi, kay mulla vul hagat ala nisi ma hotom dit noŋɗi.

²²Bugol kayni Eliyakim goora vi Hilkiya ma ŋolla hay ziyna vi mulla, Sebna ma ɗo slena, hiɗi Yowah goora vi Asaf ma ŋom sle ma ɗoyna kaw, nisi co kat mulla, hiɗi sligara visi goy jetiya, nisi maram dita vi Rabsake.