Read Masana ESAYA 37 Bible Online

ESAYA 37 - Masana bible

ESAYA 37

¹Hay li ma mulla Ezekiyas hum kayni humna, nam jet sligara valam goyo, ɗut sligar-bolla talamu, kali kalaf hay ziyda vi Ma-Vatɗina.

²Eliyakim ma ŋolla hay ziyna vi mulla, Sebna ma ɗo slena hiɗi sa maariyana vi muliyan-sa-ɗifinna kaw, hiɗi bolla ɗuti katsi ɗut', nam cuksi kat Esaya ma jobta-Lawna, goora vi Amos.

³Nisi dumu: Ezekiyas ka daŋay ala: Buurta vaydit zawni ti buur ta yorta, buurta vi kitata hiɗi zulota; kay guro sa sumaysi goboy puksi goyn kaw donosi ma ersi mayɗi.

⁴Kla, yoboy ma mul ma Asiriyan gi sa ma sunda valam Rabsake aya, kay ŋul Ma-Vatɗina ma irina hiɗi namna, Ma-Vatɗina Lawna vaŋu humi kalamu klasige. Ma-Vatɗina ma ka kitat kalamu kuɗ yoboy ma nam humumna klasige. wulin kayni siɗawaŋ kay dir sumun ma hinna.

⁵Sa sunda vi mulla Ezekiyas kali kat sa ma jobta Esaya.

⁶Esaya ka di tisiya: Yoboy ma naŋ humumna, ma sa sunda vi mulla ma Asiriyan ŋul semda van hiɗi namna naŋ ma li nar kalamɗi.

⁷Ŋusta ta nan min kala' hayamta ɗawni, labar mara ka'a, la nam humumawa, nam ma hot hay nagata valamu, nan ma calam hiɗi kew-gaferaŋa kuɗum vo hay nagata valamu.

⁸Rabsake hot goy bugolomu, nam fi kayni mulla vi Asiriya ka dur Libna, kay nam hum ala mulla hin Lakisawa.

⁹Kay mulla vi Asiriya humi labara ala: Tirhaka mulla vi Etiopiya ka tuɗay hay hagata kay durumu. Nala mulla ma Asiriyana gi sunda tam Ezekiyas kay dum ala:

¹⁰Nigi ma di tam Ezekiyas mulla vi Yuda ala: Naŋ tun vida vaŋ ŋol kayn kay Lawna vaŋu, hiɗi varta ta ala nan ma sli Yerusalemɗita, may hin tuwaŋ ɗut naɗi.

¹¹Naŋ kay tuwaŋu humi labara kay sle ma muliyana vi Asiriya lum tam naga hen kafna, naŋ humi ala nanige numa ɓulak nagana vi sum segen goyo, may naŋu, naŋ ma hulot goy may su?

¹²Jaf-sum sa sumiyan ɓulak nagana visi goyna, ki Gozan, Karan, Retsef, hiɗi gurona vi Eden sa ka hay Telasar, lawayna visi butsi goy hay ɓan but su?

¹³Mulla vi Hamat, mulla vi Arpad hiɗi mulla vi hoyok-ziyna vi Sefarvayim, hiɗi Hena, hiɗi Ivva, nisi wulin ka arige?

¹⁴Ezekiyas sli ɗerwelda hay ɓam sa mar sunda, nam jaŋa' goyo. Bugol kayni nam jik kulo'o hay ziyna vi Bum-Sumuna, nam bisleɗa' goyo vok ir Ma-Vatɗina,

¹⁵Ezekiyas ka siɗaw tam Ma-Vatɗina ala:

¹⁶Ma-Vatɗina vi vok-ma-duura, Lawna vi Israyel, naŋ ma ka musi kulo kay kerubena*, mulda gaa kay nagat kaf kayni Lawna va' mi naŋ kepe, naŋu mi ma li wuralawna hiɗi nagata,

¹⁷Ma-Vatɗina, jak humaŋ gaa'a humaŋu Vatɗina, mal iraŋ goyo ɗuwaŋu, humaŋ yoboyn ma Sankerib cuk sumun aya kay ŋulaŋ naŋ Lawn ma irina hiɗi namna.

¹⁸Awa, Ma-Vatɗina, nan wi ala muliyana vi Asiriya ɓulak nagan goy kafe, hiɗi nagata visi kay tuwsi kaw,

¹⁹hay li ma nisi cuk lawayna visi hay kuta, may nisi may mi laway gasiɗi, may sle ma koti hiɗi ɓam sana, guna hiɗi hiɗiyna nisi vatam goy kafe.

²⁰Wulin kayni, Ma-Vatɗina Lawna vuma'a, suɗma goy vun ɓam Sankerib suɗge, a muliyana vi nagat kaf ma wi ala Lawn mi naŋ Ma-Vatɗina kepe.

²¹Bugolda Esaya goora vi Amos gi sunda tam Ezekiyas, ka dum ala: Ma-Vatɗina Lawna vi Israyel ka di ala: Siɗawta vaŋ tanu kuɗ Sankerib mulla vi Asiriya nan huma'awa.

²²Kayni mi yoboyna ma Ma-Vatɗin dum kalamna: Na' ka burahaŋu, na' ka cen kuɗaŋu, goota vi Yerusalem. Na' ka gila ya' kataŋu, goot-cata vi Yerusalem.

²³Sa ma naŋ ŋulumu, cen kuɗum kaw kayn mi gige? Naŋ siwel delaŋ kulo ŋol kayn kat gige? Naŋ tun yaŋ kulo tiriŋ' kayni kat Ma-Peldetna vi Israyel.

²⁴Hiɗi del ma sunda vaŋu naŋ ŋul Bum-Sumunawa. Naŋ di ala: hiɗi keke-ma-duura van ŋolo, nan jik kulo kay sin-hiɗiyna, sin Libaŋ ma vatayna; sin gu-gamna vi Libaŋ nan ma kaam gaa'a, nan ma ka gu-siprena valam ma ŋaana, nan ma co ta-ta kulo sinamu, juruta valam ŋray ca ki gu ma tina nala.

²⁵Nan jugoɗa, nan ci niy ma pullawa, niy-lumna vi Nil kaf nan ma hiɗakam hiɗi wur-senu.

²⁶Naŋ may humi ala sle namna nan lumi kayni goy jew pa ɗisu? Nan kotomi kayni hay buur ma jew ɓa-ɓan pa. Wulin kayni nan hinim co'o, hoyok-ziy ma donona nan ma muɗum goy mi yam-jono'o.

²⁷Sum sa hay nagat na'ta donosi mayɗi, nisi muɗi nari, viy goyo kaw; nisi ki us ma hay sinen nala, ki hat ma ŋulomna nala, ki us ma day kulo yam ziyn nala, ki sinena jew a gayna day hayam nala.

²⁸May nan wi'e citige naŋ mus gaa'a, citige naŋ kal goyo, citige naŋ kal kalafi, citige naŋ muɗ ɦiy ŋol katanu kaw,

²⁹kay naŋ muɗi ɦiy katanu, kay law ma galakŋa vaŋu cuki ta-ta hay humanu, nan min cuk jaɓna van hay humaŋu, cuk jamata van hay vunaŋ kaw, nan min hotaŋ hay hagata ta naŋ may haya' pata.

³⁰Kayni ti ɗekka ta hini taŋ naŋu: cukudayni nigi ma tum mi jaf ma yaki gaana, hay busata ma'ta nigi ma tum mi jaf ma day kay tuwamna; may hay busata ɦidita nigi ma cuk jafna, nigi ma feɗemu, nigi ma pi gulda-guldana, nigi ma tum vuɗamu may.

³¹Caw sum sa suɗ goy jar jafna vi Yudana, caw sle ma hinna kaw so'olom ma cuk gaa'a, yalam ma cuk goy lay.

³²Kay goy hay Yerusalem pa cawsi ma hin goyna ma kali goyo, dirsi ma hulot goyna ma kali goy hay hiɗiyta vi Siyon pa. Kayni mi va ma Ma-Vatɗina vi vok-ma-duura ma lum hiɗi ciwerta valamu.

³³Kay mige Ma-Vatɗina ka di ki kayn nala kay Asiriya: Nisi as kali kulo hay hoyok-ziyn tan noŋɗi, nisi as gi goorhoyo goy noŋɗi, nisi ma co hiɗi maray noŋɗi, nisi ma ŋuy Yerusalem noŋɗi kaw.

³⁴Nisi ma hot hay hagata ta nisi may haya' pata, nisi ma cuk kulo hay hoyok-ziyn tanɗi, Din mi Ma-Vatɗina.

³⁵Nan ma ŋom hoyok-ziyn tani kay butum goyo, kuɗan nanu, kuɗ David ma sunda vanu kaw.

³⁶Sunda-wuralawna vi Ma-Vatɗina kal goy hay kaŋŋa vi sa Asiriyana, nam ci sumun birim kis kalam dok-glafandi yam vasl, hay li ma sumun fok kulo graw culumta kayni, yam nagat hobay hob' hiɗi sum sa mitina.

³⁷Nala Sankerib mulla vi Asiriya but kaŋŋa valam kulo'o, kaliya, hotay hay Ninive.

³⁸Fattiɗeŋ kep nam kal kalaf hay ziyna vi lawna valam Nisrok kay li girifta, hay na'ta kayni gurona valamu Adramalek hiɗi Saretser calam goy hiɗi kew-gaferaŋa, nisi pir hay nagat Ararat may. Goora valam Esar-Haddon ti mulda hay baŋalamu may.