Read Masana ESAYA 38 Bible Online

ESAYA 38 - Masana bible

ESAYA 38

¹Hay na'ta kayni, moyn vi Ezekiyas, goboy cum mati. Sa ma jobta Esaya goora vi Amos co katalamu, Ka dum ala: Ma-Vatɗin ka di ala naŋ ma gi bolaŋ mi ziyna vaŋu, kay naŋ ka mita, naŋ ma mus iri loɗi.

²Ezekiyas muɗ iram goy kat tuw-ziyda, ka siɗaw tam Ma-Vatɗina,

³nam di'e: Varaŋ kaŋ varge Ma-Vatɗina, humaŋ ma gaŋ ala nan poyay vok iraŋu hiɗi ɗigerta, hiɗi dikga ta ɗigerta, nan li sle ma ŋaana vok iraŋu kaw! Ezekiyas tiy hiɗi zimiyn ŋolo.

⁴Ma-Vatɗina ka di yoboyn tam Esaya ala:

⁵Tuɗaŋ daŋ tam Ezekiyas ala Ma-Vatɗina Lawna vi buŋ David ka di ala: Nan hum siɗawta vaŋawa, nan wi zimiy ma jaŋ goy kiraŋŋawa. Wulini nan min cuk busat doogo yam vasl lo vun buura vaŋu.

⁶Nan min butaŋ goyo, naŋu hiɗi hoyok-ziyn tani, nan min butgi goy ɓam mulla vi Asiriya, nan min ŋom hoyok-ziyn tani.

⁷Kayni ti ɗekka ta Ma-Vatɗin min li taŋu, ɗekka ta naŋ ma wi ala nam ma hob vun va ma nam dumna:

⁸Wulini nan min hot ŋus-fatta goy bugola' kay vun-ziy ma jikŋa vi Ahaz doogo. Fatta hot goy bugola'a ir va ma jikŋa doogo ma na' jiki gaa kalam pana.

⁹Ɗota vi Ezekiyas, mulla vi Yuda, hay li ma nam li moyo, bugolda nam muɗ ŋaa'a.

¹⁰Nan di tuwan ala: hay li ma buura van ka tun suku, nan as kala hay vun-galana vi liyna vi sa mitina, busata van ta hinita nan fa' loɗi.

¹¹Nan di'e: Nan ma wi Ma-Vatɗin loɗi, Ma-Vatɗina gaa kay nagata vi sa irina nan ma wum loɗi. Nan ma cuk iran kay sa-wura'a jar sum sa hay nagat loɗi.

¹²Liyn ma musta van yaway goyo, sliy goy gine'e hiɗi nanu, ki guɗukŋa vi sa ma ŋom farayna nala; nan ɗut irita van kulo'o ki sa ma duɓar barawta nala, nam yaw lopna goy ɓanu. Hay falayt pa ta-ta henjeta, nan vatan iranawa goyo.

¹³Nan zan vunamawa ta-ta goy graw culumta; ki zlon nala, nam kusan zokanawa kafe, hay falayt pa ta-ta henjeta, naŋ vatan iranawa goyo.

¹⁴Nan ka pat ciriy ma gurayna ki lay-ŋusta ka ciriya hay li ma na' ka fok kulo nala; nan ka tiya ki gukka nala; iran ka ɗuw kulo'o hiɗi hawta: nan ka vun zlata, Bum-Sumuna, naŋ ma ŋomanu.

¹⁵Nan ma dum mi mige? Nam hotan ditawa. Nam kay tuwamu fokawa kulo'o; nan ma poy hiɗi yan gaa hotiya hay busata van kaf, kuɗ yorta vi dikanu.

¹⁶Bum-Sumuna, san mus iri kayn kuɗ ŋaata vaŋu, nan gi suk tuwa kayni kuɗa' naa'a; naŋ hotan iriya, naŋ vulan irita.

¹⁷Wulini yorta vanu muɗi goy ŋaata, naŋ kay tuwaŋu dikaŋ li firiyawa kay yaw ciwta vanu goy hay zul ma wiŋŋa pa, kay sulukŋa van kaf naŋ cukumawa goy bugoloŋu.

¹⁸Kay liyna vi sa mitina as tiyaŋ seŋɗi, mitta as suburaŋɗi; nisi sa jiki gaa hay zulla may zam ɓam ŋaata vaŋ loɗi.

¹⁹Sa ma irina, sa ma irin klani mi sa ma tiyaŋ seŋŋa, ki nan ka vaydi nala; sumayna ɗek ŋaata vaŋu tam gurona.

²⁰Ma-Vatɗina suɗanawa goyo, nay ma ci darayna vanu hay buura vi irita vay kaf, hay ziyna vi Ma-Vatɗina.

²¹Esaya di'e: Sligi vuɗna vi gu-gumna ma beɗay hambulla kepe, ligit vun mil-goɗoŋŋa, Ezekiyas ma muɗ ŋaa'a.

²²Ezekiyas di goy jew ala: Va ma ɗekan a nan ma wi ala nan ma jik kulo hay ziyna vi Ma-Vatɗina mi mige?