Read Masana ESAYA 40 Bible Online

ESAYA 40 - Masana bible

ESAYA 40

¹Teŋgi ir sumuna vanu, teŋsi irsiya, din mi Lawna vigiya.

²Lawgi kalaf hay Yerusalem, siwelgi ta' ala duura va' yalam dabawa, sulukŋa va' porawa, na' fi gidawa kay sulukŋa va'a sem ma' hay ɓam Ma-Vatɗina.

³Del san ka siwel hay fulda: Pargi hagata vi Ma-Vatɗin goyo, torgi hagata hay fulda goyo, kotgi hagata kay Lawna vaya.

⁴Liyn ma lokŋa nigi muwum kulo'o, hiɗiyna hiɗi jiŋiliŋŋa nigi ŋram gaa'a, liyn ma ɗiŋiriŋŋa nigi muɗum gaa pahi, liyn ma kulo ɗumurukŋa nigi muɗum beɗe.[14]

⁵Ki kayn nala gajijita vi Ma-Vatɗina ma ɗek tuwa' goyo, sumun kaf ma wumu, kay vun Ma-Vatɗina daawa goyo.

⁶Del san ka di ala: Siwelaŋu. Nam hotom dit ala: Nan siwel anige? Sliwna kaf ki us nala, wileta valam kaf ki us ma ɓo hay sinena nala.

⁷Usna so goyo, ɓona yak goyo, hay li ma simeɗna vi Ma-Vatɗina fo kalamu, Gasiya sumun kayn mi usu.

⁸Usna so'o, ɓona yak goyo, may yoboyna vi Lawna vaya mus ta-ta hay vatɗita.[15]

⁹Jikag kulo kay hiɗiyta fiyokka, Siyon, naku ta vul labara ma ŋaana, siwelag hiɗi delag kulo ŋolo, Yerusalem, naku ta vul labara ma ŋaana; siwelag kulo ŋolo bay li nari, dag tam hoyok-ziyna vi Yuda ala: Lawna vigi zawni!

¹⁰Bum-Sumuna vanu Ma-Vatɗina ɗawni, nam ka ma'a hiɗi gajijita, ɓalam vulum gaŋeraŋa; wurakŋa valam hen ka kalamu, wurakŋa valam hen ka kali vokomu.

¹¹Ki sa ma ŋomda nala, nam ma ŋom farayna valamu, nam ma tor fok-dimin kulo hay glaŋamu, nam ma ziyim kulo war-digamu; nam ma tun fok-dimina ma gurona valam ka ci miir tuwana.

¹²Sa ma li ŋaɓta vi niyna hay ɓalamu mi gige? Sa ma vi vun-dukalawn gaa'a hiɗi way-ɓalamu mi gige? Sa ma ŋa butuw ma gaa kay nagat kafna hay dutta mi gige? Sa ma ŋa nekka vi hiɗiyna hay va ma ŋa nekka mi gige?

¹³Sa ma sli ŋaɓta vi ŋusta vi Bum-Sumuna mi gige? Sa ma ɗekem kay varta valamu mi gige?

¹⁴Sa ma nam li ŋra-vunda hiɗi namu kay fi yal kuɗumu mi gige? Sa ma ɗekem hagata ta ɗigerta mi gige? Sa ma hatam yalda mi gige? Sa ma ɗekem hagata vi yamda-wida mi gige?

¹⁵Ɗuwgi jaf-sumun tige! Nisi ki niy ma tol gaa hay soon tuɗok tuɗok nala, nisi ŋray ca ki butuw ma tunum kulo kay va ma ŋa nekka nala, ɗuwgi jokon tige! Nam ki butuw ma simeɗ patam kulona nala.

¹⁶Gu ma hay Libaŋ as ŋal kuta valamɗi, muuriyana haya'na as ɗifin ma ŋal-goyna valamɗi.

¹⁷Jaf-sumun kaf vok-iram mi va ma waa'a, nisi kaf vok-iram kayni ki va ma waa'a ma ɦawana.

¹⁸Nigi min ŋra Lawna hiɗi gige? Va ma nigi min kotomu kay ŋram hiɗi namu mi mige?

¹⁹Va ma sli tuw-sana yorom mi sa'a, sa ma yor ora kotom hiɗi ora, ci jaɓ ma dooron talamu may.

²⁰Sa ma ɗuw tuwam maŋaya kay ɗifin namna sli guna ma may fotiɗina, nam gar sa ma ceɗemti hay liyamna, kay pi va ma sli tuw-sana ma ge'ɗin kulo'o.

²¹Nigi may wi kaynɗi su? Nigi may hum kaynɗi su? Sa may digi kay kayni hay tun-cawt paɗi su? Nigi may humi kay so'ol nagat ma tun gaa panɗi su?

²²Namu ma ziyna valam ka kulo gine'e kay nagata, sum sa hay nagatna kiram ki baara nala, nam meɗ dukalawna goyo ki sligar ma hefteŋŋa nala, nam vum goy gaa'a ki tantan nala, kay muɗum mi liyn ma musta valamu.

²³Namu mi ma vat muliyan goy waa'a, sum sa ka kitat gaa kay nagat kaw nam muɗsi goy waa'a;

²⁴nisi may piy gaa noŋɗi, nisi may cuki gaa noŋɗi, so'olsi may cuki gaa vi nagat noŋɗi, kay hay li ma nam fo sukŋa valamawa kisiya, nisi so goyo, ɦiwliŋŋa kal hiɗi nisiya ki hosona nala.

²⁵Sa ma nigi min ŋran hiɗi namu kay nan ma slum nam nala mi gige? Din mi Ma-Peldetna.

²⁶Poŋgi irgi kulo'o ɗuwgiya, sa ma kot sle namna mi gige? Mi namu ma cuk vok-ma-duura visi ay goy kuɗ tuwam kafe, nam yisi hiɗi semda visi kafe, kuɗ gaŋeraŋa valam ma ŋolla hiɗi donota valam ta ŋolda, va ma koti kalam joo kep kaw mayɗi.

²⁷Nigi jafna vi Yakub, nigi sa Israyella, nigi ka di'e, nigi ka hot dit kaw ala: Hagata vuma hini hay ɓam Ma-Vatɗina, may Lawna may tun ŋalda kay ɗigerta vuma'ɗi.

²⁸Nigi may wi kaynɗi su? Nigi may hum kaynɗi su? Lawna Ma-Vatɗina, Yaweh,[16] ma kot sin nagata, nam may makɗi, sutiyam may toɗi, yamda-wida valamu sa as feka'ɗi.

²⁹Nam vul donota mi sa ma makaya, sa ma donota valam tun caw kiɗa goyna nam hot jor donota valam voko.

³⁰Guro-joriyon maka, sutaysi to'o, sum sa joriyona sli zlaraŋgadaya ŋaa'a ŋolo;

³¹may nisi sa vi hay Ma-Vatɗina donota visi jora. Nisi fok kulo'o ki bakŋa ala, nisi jaŋa, sutaysi as toɗi, nisi tuɗa may makɗi.